dcsimg
2018年10月19日 星期五 00:29
會員登入 密碼    忘記密碼    會員尊享  
 進階搜尋
   分類資訊:
   投資者關係
   公告
   投資基本功
   華富通訊
   資訊中心
名家縱論
華富名家 股票投資 宏觀經濟 財富管理 外匯策略 商品期貨 地產物業 生活品味
積財有技 | 龔成 | 區塊解密 | MoneyKOL | 周濟 | 李慧芬 | 小富派 | 晉裕錦囊 | 卓爾不凡 | 王榮昆 | Hea富優閒投資 | 九十後投資記 | 李聲揚 | 三代保險情
龔成
-《80後百萬富翁》(系列)、《財務自由行》作者 -曾於銀行從事投資相關工作 -曾以萬元月薪工作5年,憑投資股票於28歲累積到$100萬 - 曾接受《經濟日報》、《東方日報》、《星島日報》、《晴報》、《經濟一週》、《壹週刊》、「商業電台」、「新城電台」、「澳門電台」等傳媒訪問 -於網上分享投資心得,瀏覽量過百萬,為人氣博客,解答理財問題1000條 -創富課程導師,學生人數逾500人 -網台財經節目主持人 -淨流動資產逾數百萬 -Facebook專頁 www.facebook.com/80shing -龔成個人網站 http://80shing.skx.io
Click here to toggle text size
【龔成問答信箱】(Q3881-Q3960)
18年2月14日


Q3881:

我搵到兩隻疑似潛力股,唔知老師你既睇法係點呢?

第一隻係3380龍光地產,因中國樓市都發展得快,我見佢roe都升左不少,而且算係大的地產商。第二隻係2111 超盈國際,佢早前盈利下跌,令股價大幅下跌,我覺得依家算係平宜,唔知龔成老師你點睇?

聚焦粵港澳大灣區。截止 2017 年 6 月 30 日,公司土地儲備總貨值達 3,880 億元人民幣,總建築面積約 2,789 萬平方米。

其中 80%的貨值位於粵港澳大灣區,貨值約 3,145 億元人民幣,建築面積約 1,830 萬平方米

中意佢有好多土地儲備而且大灣區係未來發展區域

其實我仲讀緊大學year 4,但我好有興趣研究股票,我目標係希望我grad後有資金就可以有足夠投資知識進行投資。我已經決定第一份糧就報老師你既堂架啦!!!


龔成老師:

龍光地產(3380)係中國有多個物業發展地點,深圳、廣州、佛山、南寧、東莞、珠海、惠州、中山、成都等地都有。近年中國物業市場興旺,佢都有唔錯的發展。

不過要留意,中國樓市開始有泡沫,如果逆轉的話,會對內房有不少影響,加上內房股近年的股價大幅上升,要平衡當中的風險。

另外,其他內房都有負債較高的問題,佢算是較少了,算是可接受。

至於超盈國際控股(2111),佢係一家提供一站式解決方案的女性內衣物料供應商。主要客戶包括愛慕(Aimer)、仙黛爾(Chantelle)、安莉芳(Embry Form)、曼妮芬(Maniform)、馬莎(Mark&Spencer)等。

雖然近年生意上升得唔錯,但要留意,佢剛公布的中期業續,出現盈利倒退的情況,你要分析下,這是行業週期的轉變,還是只是一些短期生意或其他問題。

好,期待課堂見到你!但你都要留意,上堂前這段時間,要保持增加投資知識,因為愈早得到知識,就愈快啟動財富增值。


------------------------------------------------


Q3882:

成哥
你點睇101恆隆?


龔成老師:

恒隆地產(0101)本質不錯的,除左香港持有不少收租物業外,近年都不斷發展大陸,成為增長動力。

佢物業組合包括商場、商舖、寫字樓、住宅、服務式寓所、工業╱寫字樓、以及停車場物業等。而物業項目遍及上海、瀋陽、濟南、無鍚及天津多地。佢的長遠目標是擴展中國內地業務。

現時息率有4%以上,其實不錯,絕對有穩中求勝的效果。這股正面的。


------------------------------------------------


Q3883:

龔sir, 我終於上車了
買左一間單橦樓,$500 萬
請教一下

1. 按揭用H好定P好?
現時P比H貴小小,但H好似波幅好大

2. 問過銀行最多借8成,能力上可借少d,可借7.5成。借少d係咪有著數?但就真係清袋了


龔成老師:

1)恭喜你!H按的波動會略高,不過,如果你用總數去計,H按始終較為著數,同埋H按始終有封頂,所以不同太擔心。

2)現時仍在低息環境,借平息提升總財富的方法。你可以假記同一筆資金,可以還錢或投資,還錢就可減少利息支出,投資就可得到回報,在回報高於利息成本的前提下,不還錢去投資,對總財富更有利。

另外,如果完成買樓過程後,自己一d現金都無,這不是好的理財方法,寧願借多少少,但自己有現金,同時可投資增值,策略上較好的。

8成與7成半相差不遠,但8成可令你手頭有一點現金,其實可減少風險。


------------------------------------------------


Q3884:

請問下越秀交通基建(01052)可以長期去持有嗎?
打算現在月供這隻股票如何?


龔成老師:

越秀交通基建(1052)主要從事投資、經營及管理位於中國廣東省及其他省份的高速公路及橋樑。現時投資及經營的收費公路及橋樑項目合共13個,控股項目應佔權益收費里程約為301公里(總收費里程約為357公里)。

整體來說,越秀交通算是不過不失,公路橋樑都處不差的地區,持項目都算有一定質素,但回報率不算高,而人民幣變動亦對這企業略為造成風險。

雖然收費模式被政府控制,成為了這企業收入的不確定性,但政府總會平衡市民與企業雙方的利益,加上政府近年鼓勵私人企業參與建設公路項目,因此總要給予企業合理的回報,故這方面的風險不大。

雖然過往股價保持平穩上升,但由於股本回報率偏低,以至投資價值略減,現時股息率接近6%,算是不錯,可以進行月供,無問題。


------------------------------------------------


Q3885:

成哥! 你點睇大陸REITS? 有無股票推薦? 另匯賢(87001)現價是否值得買入?


龔成老師:

我會略喜歡香港的房託,因為減少了人民幣波動的風險。

匯賢(87001)不錯的。

佢現時主面有兩項資產:包括於2011年收購的北京東方廣場之零售、寫字樓及服務式公寓業務;以及兩家酒店(北京東方君悅大酒店及瀋陽麗都索菲特酒店)。

加外有新增投資,於2015年才收購的重慶大都會東方廣場。

人民幣及中國樓市略有過熱的情況,都是其中的風險,而當市場擔心中國房地產市場下跌時,這股都會下跌,令股息率上升,所以股息吸引,其中一個原因是其中的風險。

因為佢原理是有樓收租,若往後的租金下跌,就會令到你收到的股息減少,而人民幣波動,亦有可能令你收息減少。

從整體及本質上,這房託是不錯的,適合長線投資。雖然有上述所講的潛在風險,但高股息率,可說能抵償當中風險。

但要留意,根據北京市人民政府於2006年6月26日發出的國有土地使用證(京市東港澳臺國用(2006出)第10128號),該發展項目總土地面積為7萬7千平方米的土地使用權已授予北京東方廣場公司作綜合用途,到期日為2049年4月21日。

所以,佢的價值會減少,股息高,如同包捨部分本金。


------------------------------------------------


Q3886:

多謝成兄的回覆,你說我年紀輕,可以略有風險,可投資比亞迪的比例亦可較高,因我年紀輕所以有時間守,當中守的意思是?可否深入解釋一下?


龔成老師:

我們投資股票,其實是投資企業。

「投資」就是我們這刻將現金,投入到這間公司,慢慢等這公司成長,等佢收成。比亞迪(1211)生產電動車,這是新興的行業,中間一定有風險,要經過好多年的努力,才會有收成。

如果你年紀大,投資太大比重在這股,若這公司中短期出現了生意上的不利情況,因而令股價出現較大的跌幅,作為長者,若中途資金有用要賣出,風險就大。

相反,年輕人時間長,可慢慢等企業成長,就算中短期企業股價大跌,也不用理,慢慢等佢上升,即是「可以守」的空間較大。


------------------------------------------------


Q3887:

龔sir ,如果在興趣,以及人工方面,你會點揀呢?


龔成老師:

如果比我,我會選擇興趣。

你將會從事呢一門數十年,如果唔係自己興趣,都幾辛苦。相反,如果果邊係你興趣,你自己會發展得好好,就算工作時間較長都頂得到,整體的成就會較高。

這是一個兩難的問題,因為無人知邊條路先係最好,你要多從「整體」、「長遠」的角度去想。你想象下10年後的你,從事那一邊較開心,會有較大的成就?相信你就有答案了。

記住,你每一個決擇,都是最好的決擇,加油!


------------------------------------------------


Q3888:

老師,我聽你講買入陽光房地產,港燈,香港電訊,深高速,也有少量莎莎及數碼通,其實我心中一直很想找機會入手港鐵、港交所、中電、金沙/銀娛、盈富。

但一直覺得不算便宜,想等調整時才趁低買入,現時是否應該等待股市爆破後有較大的調整時才買入?

以上我持有的股票應保留至什麼時候/那個價位才算遠高於內在價值再賣出?我還未懂如何估價,所以股市升或跌我都沒有信心應在那一點賣出或買入,我應該怎樣做?

另外想請教你,數碼通股價一直慢慢向下,現在算是便宜,還是股票質素下降呢?應該加碼再增持嗎?


龔成老師:

你原本持有的,可持有,這些都是有質素的股票,持有愈耐增值愈高,為何要急於賣出會增值的資產,變回貶值的現金呢?

所以,我們以長線持有、永遠持有優質股為原則。除非出現股價比企業價值,嚴重高估的情況,否則持有都問題的。

至於其他股票,的確不平宜,所以要睇你本身的持貨,恆指29000點,未到狂熱期,但又不算平。若果你已夠貨,已有一定數量的股票,那該不用再入了。

不過,若你未夠貨,手頭現金多過股票,那就要選擇一些估值相對不太貴的優質股,小注小注去買入,不要在未到狂熱期前,自己處於無乜貨的狀態。

數碼通仍有質素的,不用太擔心,現時處合理價,可以分注買入,但要留意,近期電訊業有價格戰,中短期股價會波動的,但長期的行業結構無變。


------------------------------------------------


Q3889:

成哥,中交建1800我9.8元買了兩手,值唔值得再加注,呢隻算不算優質,現價是不是便宜? 謝謝


龔成老師:

中國交通建設(1800)有質素的,過往的盈利增長不錯,近年有增長放緩的情況,所以市場估值都有調低,相信中短期股價仍會少少波動,但長期正面的。現價合理,可分注入少少都得。


------------------------------------------------


Q3890:

龔老師你好,一路都有睇你的文章和書,知道投資是要長線,但近日真的開始有點迷惘,我的投資有17,000 (平均@$28.60)股中入壽和4萬股交行 (平均@$6.80) 。

知道投資是要長線持有,所以係2015大時代的時候高位 28,000都沒有沽出兩股;但現今恆指已升穿29,000,可惜以上兩股連成本價都未到,是否我的操作有問題?

是否應該於2015年高位時要減持一部份?
還是我的平均買入價太高?

兩股的合理買入價又應多少才應買入?
最後,現時我是否應繼續持有?

還是跟我的朋友建議換馬至其它防守性高的收息股如港燈、中電、中煤、越秀(405) 、建行、朗廷(1270)等股呢?

前面的收息股那一隻較好?還是要分開買兩三隻收息呢?謝謝老師解答我的疑難!


龔成老師:

有3個概念要清楚翻。

第一,優質股長期會上升,但中短期總會有波動,我地好難去足中短期的波動,所以,長線投資是最好的策略。而愈優質的股票,長遠升值能力愈強,持有愈耐增長愈高。

第二,每隻股票都有佢的合理估值,「價格」與「價值」是不同的兩回事。每隻股票都會處「平宜」、「合理」、「昂貴」,如果你在貴的價位買入,就要一段時間才能回到當時的買入價,因為「長遠股價必然回歸價值」。

第三,每間企業都有佢的特性,中人壽(2628)除左本身的保險業盈利外,同時會利用淨存金投資,因為有投資到國內的A股市場,因此,當大陸股市波動,佢的股價都會受影響,很易令股價過份換高或推低,這是特性。

至於交行(3328)已是一間平穩,增長不快的企業,你睇翻佢盈利,5年來都是$600億左右,增長不多,所以股價都難以大升,但就有穩定同派息吸引這兩個優點。

至於轉到其他股票,其實無乜無謂,因為你本身持有的不是沒有質素,要睇下你看好那隻。轉到防守性股票的好處,是當大市跌的時候,你影響較少,同時有不錯股票,但當大市升的時候,你升幅較少。

越秀(0405)同建行(0939)收息不錯的。


------------------------------------------------


Q3891:

想問點睇 隻1478 同6088 如果擇其一長渣前者係咪會好D.? THANKS


龔成老師:

丘鈦科技(1478)正面的,企業有相當的發展力,近年的生意增長亦不錯,唯一擔心的是股價過高,始終一年內已升左幾倍,現時市盈率去到70倍,就算當佢下年盈利增長一倍,市盈率都去到35倍,點睇都唔平。

FIT HON TENG(6088)其實都正面的,但潛力不及丘鈦。所以,好睇你個人要d乜,如果想潛力高d的,就買丘鈦,不過就要面對少少風險,中短期股價波動,或者小注買入。


------------------------------------------------


Q3892:

你有玩過牛熊個d嗎?


龔成老師:

十幾年前炒過窩輪同孖展(當年都未有牛熊證),試過一段投機時期,大上大落。最後發現玩呢d根本輸多贏少,潛在成本極高,發行商一定賺你錢,所以十年前開始唔玩。之後都無玩過了。


------------------------------------------------


Q3893:

你覺得1363中滔環保值得月供投資嗎?
去年10月到現在曾經幾次大跌,應該怎麼分析?


龔成老師:

中滔環保(1363)的業務變化都幾大,早幾年新上市,之後生意以倍計增長,股價都有一斷時間唔錯,但當時估值已經過高。

之後增長放緩,股價開始下跌,到近期生意有下跌情況,股價當然受壓。佢主要從事提供工業廢水集中處理、工業供水、固體廢物處理等,都有一定的賺錢能力,但業務有波動。

其實整體都正面的,月供不是不可,但行業結構未完全穩定,如果注碼不太大,可以的。


------------------------------------------------


Q3894:

龔sir,想請教3311在宣布供股後股價反複下跌
供股本身是否有影響公司的基本質素?

下跌是反映公司質素變差,或是下跌正好令股價返回抵買區,可以分段買入長線持有?


龔成老師:

中國建築國際(3311)本身不過不失的,但供股加上供股後不斷下跌,都是略不利的消息,反映市場對這股的估值有所調低。基本因素不算有太大的下降,算是少少減少。

市盈率不高,但供股後擴大了股數,現時勉強合理,分注都可。


------------------------------------------------


Q3895:

龔Sir, 可否分析1888?
現價合理嗎?


龔成老師:

建滔積層板(1888)盈利都幾波動,雖然生意額每年都有增長,但唔代表增長就有錢賺,有時大賺有時賺得少,估值方向比較困難。

現時市盈率約9倍,但若考慮佢盈利的不確定性,加上近年股價上升倍計,風險略存在。現價雖合理,但投資不能太大注買。


------------------------------------------------


Q3896:

1448已家入作長線得唔得,6蚊會否太高?


龔成老師:

福壽園(1448)有質素,有發展潛力,入左當然長線持有。

這股一直都不平,但又一直升,所以要入都唔量,$4.5以下買入當然穩陣,但結果可能是一直買唔到。$6有少少高,市盈率去到30倍,但企業又真的有潛力,所以有時貴少少都無問題,只要注碼上不要去得太盡就可以了。


------------------------------------------------


Q3897:

你好,想問下你會唔會提供資產管理服務?


龔成老師:

抱歉,我無提供這類股務。

如你不懂投資,最簡單是將部分錢,買入指數基金,例如盈富(2800),長線已有不錯的回報,同時不用打理。


------------------------------------------------


Q3898:

成哥,請問你怎樣看科通芯城(400)及嘉華國際(173)
我賬面現時是虧損的,是否應該繼續持有?

這兩個公司都有不錯的盈利增長,尤其是嘉華國際的市盈率市賬率都好低,奈何價錢一蹶不振,似乎價錢同盈利不掛鉤
謝謝!


龔成老師:

持有與否的關鍵位,不是你的賺蝕數,而是該企業的質素、長遠發展。

科通芯城(0400)盤數幾好,但最大的問題,是這股之前受到一家研究公司狙擊,並遭其質疑財務數據造假。

雖然這股已發表澄清公告,並通過回購股份支持股價,但股價仍不斷向下,反映市場對這股的數,仍然是「半信半疑」。

要分析賬目真假,難度好高,而睇佢的現金流量報表,的確有d地方是令人未敢100%信晒,所以,這股有無問題,其實未有答案。如果你持有太多,可減少少先,以減風險。

嘉華國際(0173)其實都正面的,近兩年股價升了不少,要調整都好正常,另外,做地產有時因入數問題,盈利好難完全反映該年度的情況,就算盈利波動,也不等如業務波動,要睇平均的,但股價就會在這段時間上上落落。


------------------------------------------------


Q3899:

成老師!原來你出過幾本書,我暫時未看過你的說你認為我應該適合看邊本先?


龔成老師:

係呀,我現時出了6本書:

《80後百萬富翁》(第5版)
《80後2百萬富翁》(第2版)
《財務自由行》(第3版)
《50優質潛力股》(第3版)
《大富翁致富藍圖》(第2版)
《50穩健收息股》(新出版)

入門來說,《80後百萬富翁》最好,下本是《財務自由行》


------------------------------------------------


Q3900:

你好,有野想問,我是進取型投資者,年金計劃如何?

我買個份基金都是蝕很多錢的,所以不知道這些會不會和基金一樣有很大風險!

我年薪大約600,000我一年買50,000會否佔很多,還是你建議我將這些錢,自己買藍籌股,長線投資好些?


龔成老師:

我地理財,要攻守兼備,年金可作防守,一年買$5萬不算多。年金是低風險項目,回報不高,可視作防守部分。

但如果你是進取型的投資者,好想財富有更大的增值,可考慮將更多資金,投資其他增值力更強的項目,以作為進攻,年金可減至一年$3萬。但進取有利有弊,過往你投資都試過虧損,太進取就令資金總計的回報減少。所以要取一個平衡點。


------------------------------------------------


Q3901:

龔老師,我之前以4.62元買入9000股福壽園(1448),現價6.45元,請問我應該先沽了部分先獲利嗎?謝謝!


龔成老師:

福壽園(1448)是我很喜歡的股票,企業有質素,有潛力,雖然升了不少,但暫時仍可持有,你不用心急獲利。

佢發展的業務,將不斷利用佢本身的規模優勢,攻佔市場,因為中國的殯儀業十分散,佢企業化,其實會漸漸食到市場,因此前景正面,你耐心持有先。


------------------------------------------------


Q3902:

龔成老師,想請教一下你對ETF有什麼看法嗎?用ETF平衡自己的投資組合風險可取嗎?

最近得知股神巴菲特和基金經理進行了一場10年賭局,股神只投資了一隻ETF便已得到很好的回報,所以我都開始留意香港的ETF,最近留意到(03140) 領航標普500,請問這一隻可以買入長線持有嗎?


龔成老師:

我對指數基金看好的,如你有留意我的問答,盈富基金(2800)是我叫人買得最多的,這些指數基金,管理費低,投資容易,本身已是一個不錯的組合,長線憑大市上升,已有不錯的回報。

領航標普500(3140)同樣是指數基金,同樣有投資價值,所投資的是美股,長線都能保持上升的。如你看好美國,就可投資3140,如看好香港及中國,就投資2800,兩隻都有質素的。


------------------------------------------------


Q3903:

龔老師,你好!我係一個大專生,睇完你的書本後,我希望開始月供股票離儲錢。

暫時想每月?二千蚊離投資,當中有五百一直係供儲蓄保險,都已經有一年,宜家想?一千離做供股票,但一千會吾會太少?而淨返五百就儲現金。

股票見宜家盈富好似有d貴,但見中華煤氣因為這兩年有十送一的以股代息,股價一直都大約係13,14元左右,吾知我的分析是否正確?月供中華煤氣會吾會好d?

另外,龔老師點睇國泰航空同載通國際兩隻股票?謝老師解答!


龔成老師:

大專生能月儲$2000已不錯,保持這習慣,財富會慢慢累積。

月供$1000雖然較少,但都可以進行,問題是我擔心手續費佔比太高,因不少銀行都會收最低佣金,你要找一間手續費好低的銀行才可。(我聽網友講南洋商業銀行較平,你周圍比較下先)

股價的大小,不等於平貴。

我地定義平貴,會用另一角度:比例股價與企業價值,這是複雜的問題,無法三言兩語講到,你多學習股票知識先。

如果月供$1000,盈富(2800)有較大的分散風險能力,所以較好。

國泰(0293)的質素不斷下跌,已變成較為一般的股票。相反,載通(0062)的質素會略高,但未到好高的水平,因為價格自主能力較弱,無乜成本轉嫁的能力。


------------------------------------------------


Q3904:

龔成,你好!因為睇左你幾本書,所以想學價值投資,跟著買了 2388 175 3 同埋 799

其中799 買入後股票由升轉跌,開始懷疑自己計錯數,請問799 是否值得持有?

另外,唔明白這公司回購了不少股票,但又看不懂為什麼會回購,請指教。


龔成老師:

價值投資的原理,你一定要了解企業,這是一個花時間的過程,你要睇佢的年報,上佢個網了解企業,你買股票,就如同買入企業一樣。價值投資法最花時間,但卻是最賺錢的。

4隻股票中,頭3隻無問題,可以長線持有。

至於IGG(0799),不是無質素,但就有d特別,當你了解這企業後,就明佢波動是好正常的。

佢係網絡遊戲開發商及營運商,以F2P(玩家可免費暢玩遊戲,但可能須付款購買遊戲中所售的虛擬物品,以提升其遊戲體驗)模式經營並提供多種語言的網頁遊戲、客戶端遊戲及手機遊戲。

我無研究過佢的遊戲,但手機遊戲呢樣野,是一個變化好大的市場,一年前熱玩的遊戲,今日可以無人玩的,一個新遊戲出左,舊的可以無價值。

係咁樣的前提下,根本無法對公司作出估值,業務變化好大,就算佢之前幾年盈利增長唔錯,都唔代表之後係。

我唔係話這公司有問題,只想說明業務不確定,分析好難,同時股價一定好波動,根本無路足。你要分析這類股票是否適合你。這類股不是不可投資,但就可可大注。

至於回購方向,企業回購有好多原因,可能想拉高短期股價,又或資金過多,又或佢覺得現時股價太低,所以買翻d。


------------------------------------------------


Q3905:

大師,匯豐點睇?


龔成老師:

匯豐(0005)的質素不差的,但不能稱為好高質素。

銀行企業本身是高負債的業務何,本身有一定的風險,過往銀行企業較好賺,但在金融海嘯後,賺錢能力減弱,加上國際金融市場的不確性增加,令國際大銀行比本地銀行的風險更高。

另外,近年不斷的罰款,都減弱了銀行的賺錢能力。整體來說,匯豐不算差,但之後只能平穩增長,收息不錯的,但比起其他收息股,匯豐的股價會略波動。


------------------------------------------------


Q3906:

龔老師你好, 本人追蹤你的頁面有一段時間,知道比亞迪有升值潛力,想跟老師追捧,但現時資金約有6萬,只能買一手。

請問老師建議我暫入一手待長期升值,還是先入其他較便宜的增值股或是收息股才能有效發揮我僅餘資金的效益。


龔成老師:

比亞迪(1211)是有潛力的股票,但股價都有點波動,所以我地都要平衡當中的風險,$5X安全,$6X分注,股價再上就只能月供了。如果你能月供,每月入少少,以現時來說的策略是最好的。

如你這刻只持有現金,應該入少少其他股票,令組合裡不是100%現金,有一些資產項,可為你提供增值,以現時的市況,你買少少在其他優質股先,同時等比亞迪回落才入,策略上是較好的。


------------------------------------------------


Q3907:

龔成老師你好。睇左你專頁一段時間,見你建議我地月供股票,我本身零投資知識

想問下月供股票第一步要點做?
我可以點樣得多d呢方面既資訊同知識呢?
同埋月供邊隻股票比較理想?

依家有大約十萬現金可以投資,另外每月月供股票大約可以有$2000可以投資,應該如何運用呢?我想平隱同長線投資,希望龔成老師可以指點下。thanks


龔成老師:

首先,你要增加投資方面的知識,例如睇多d書、上股票班等,無知識就去投資,是一件危險的事。你可以睇《50優質潛力股》、《50穩健收息股》,都是適合你的。

你去一般的財經網站,都有好多股票資訊的,例如AASTOCK,你可先了解下先。同埋你到銀行開一個股票戶口,佢地都會提供好多月供股票的資料比你。

月供股票,就是每月投入相同資金,不斷去買某一隻或多隻的股票,原理如同儲股票。如你無選股能力,就供盈富基金(2800)。每月供$2000是可以的。

另外,$10萬你可動用其中的$5萬,但由於你投資經驗不足,這筆錢暫時只可投資低風險股票,例如收息股,作為開始先。


------------------------------------------------


Q3908:

你好,如果選收息股,以派息比率同派息記錄作參考足夠嗎?


龔成老師:

其實在《50穩健收息股》,都有解釋一隻「理想」收息股的特點。

過往5年的派息是分析點,派息比率、股息率、派息政策,我地都會考慮,但這只是初步分析。

進一步分析是「業務」,企業有生意,才會有盈利,有盈利才有條件派息。我地要分析佢業務的穩定性,是否身處一個有利位置,行業結構是否穩定,這反而是重點。


------------------------------------------------


Q3909:

成哥,想問超威動力(951)現價是合理或便宜?可入嗎?你會看好其前景和可長線投資嗎?謝~


龔成老師:

超威動力(0951)本質不差的,佢為鉛酸動力電池製造商,產品主要用於電動自行車,亦生產風能與太陽能儲能電池,一直與吉利及江淮等汽車製造商合作,開發電動車用鉛酸動力電池原型。

企業整體不過不失,前幾年增長較快,市場估值較高,到近年增長開始有放緩情況,股價都明顯受壓。企業規模唔算大,業務不是沒有風險,現時市盈率約7倍,主要反映增長放緩及當中風險,所以估值算是合理。這股都可投資,但不要太大注。


------------------------------------------------


Q3910:

你好 成哥 想問隻3311中國建築國際如何?

同埋隻九龍倉004 分析香港既地產上巿 我認為影響都幾大 因為佢盈利有三分一係香港 甘佢依家跌6成都好合理 對嗎?


龔成老師:

中國建築國際(3311)本質不錯的,近幾年的生意增長唔錯,但就有放緩的情況,所以市場對佢的估值都有所下調,不過現價合理,長遠的生意穩定,有投資價值的。

至於九倉(0004),佢分柝左商場部分出去,股價並非下跌,而是除淨反應資產分柝的調整,所以是正常的。之前除淨後的股價,合理反映佢餘下的業務。


------------------------------------------------


Q3911:

你好龔成先生、想問1928 金沙,如果現時價位入市的話,會貴嗎?


龔成老師:

金沙(1928)的合理價約在$27-$40,這個估值基礎建基於長期發展,現時價格處合理區的範圍,有投資價值,可分注買入。


------------------------------------------------


Q3912:

請問一下,我本身對股票不懂,如果526此股票值得快投資嗎?


龔成老師:

投資股票就是投資企業,你要分析這企業的業務、財務情況、長遠前景,以現時的股價投資這企業,是否合理。

利時集團控股(0526)從事製造及貿易家用品;經營百貨公司及超級市場;酒類、飲品及電器批發;以及買賣及銷售進口汽車。業務有點波動,有時賺錢有時蝕錢,要分析並不容易。

睇翻近半年的股價,都幾波動,這類股的投資價值較少,只有投機成份,投機方面我不懂。最重要你要控制好注砸


------------------------------------------------


Q3913:

老師你好,我上月買入萬洲國際@7.72。請問你有咩看法?見咁多隻藍籌,佢係嚴重落後果隻


龔成老師:

比大市落後不是買入的理由,只有企業有質素,同時現價不貴,才可買入。

萬洲國際(0288)為豬肉食品企業,業務包括生豬養殖、生豬屠宰、生鮮豬肉和肉製品加工與分銷的各個環節。之前幾年的增長不錯,但近年已有增長放緩的情況,企業整體不過不失。

由於佢規模大,增長已有減慢情況,所以現時市盈率13倍是合理水平,股價不會高速增長,但長遠都能平穩增長的,前景正面。都算有投資價值。


------------------------------------------------


Q3914:

龔sir,現在騰訊700入市風險高嗎?


龔成老師:

少少高呀,我不敢看少這股的潛力,但同樣不能忽視背後的風險。

騰訊(0700)身處的行業,其實存有潛在的變化,佢的盈利可以有好大上落,加上市盈率已到了十分高的水平,市場已假設佢會「一直高速增長」,只要佢由高增長變成一般增長,股價將會有明顯調整。

所以,這股如想投資,不是不可,但只能小注,又或每月小小去月供。


------------------------------------------------


Q3915:

龔成老師,小弟第一次接觸股票,一個月可以儲$10000來投資股票,有無好建議,939建設一個月買一手好唔好,定儲兩三個月錢先買一手700騰訊好?謝謝!


龔成老師:

月供股票最好,你選擇數隻有質素的股票,每月月供,長期進行,這是最有效累積財富的方法。由於現時大市升了不少,你不用供$10000,每月供$7000已可,餘下的先儲現金。

你可以供盈富(2800)$3000、建行(0939)$2000、騰訊(0700)$2000,這已經是一個基本組合。

如可以的話,可加入多1、2隻股票,你可自己選擇,騰訊則可略為減,因為這股現時不平,現時供款不應太多。


------------------------------------------------


Q3916:

請問平保前景如何?
現價可入ma?


龔成老師:

中國平安(2318)有質素,前景正面,不過,雖然佢盈利保持好理想的增長,但保險企業有個特性,就是企業會將一部分的浮存金投資在股市中。

即是說,若然股市大好,對佢盈利有幫助,反之,就會令佢盈利不佳。這就會引至佢股價有較大的波動,這要留意。現價都勉強在合理價,但最好分注買入。


------------------------------------------------


Q3917:

不好意思打擾了,想問1063,現在點睇,繼續持有可以嘛
 
因為佢最近慢慢甘跌...
本人買了很多想知怎樣做


龔成老師:

新確科技(1063)有d麻煩,如何你有睇過佢盤數,會發現佢年年虧損,企業基本上沒有業務價值,這類股長遠只會不斷下跌。

這股曾經被散戶熱炒過一輪,但相信會再一次有主題才會被炒起,但暫時睇這可能性較低。如果你持貨較多,應先賣出一部分,餘下的,等反彈就要賣出。

長遠最好的策略,都是賣出這股。


------------------------------------------------


Q3918:

龔成sir,我想請教一下
依家股市去到刺熱時期

我手有1928 2手
823 1手
66 1手
6823 2手
178 1手

我有點擔心應否先走某些貨,謝謝你

因眼見 大家都爭住入市
我想起 別人貪婪 我就恐懼


龔成老師:

別人貪婪我就恐懼,這是正確的投資之道,當大市進入狂熱時期,就是賣出的時候。

不過,現時仍未到狂熱期。

雖然有些指標已出現,但不夠全面,我仍未定義這刻己是狂熱。所以,暫時持有上述股票,是最好的策略。

更何況,優質股持有愈耐,對我地的財富增值就愈明顯,即是就算狂熱期,也不一定盡賣,可以只賣出一部分,愈優質、增值力翁強的股票,就愈要股價過高,好超過企業價值,才會賣出的。


------------------------------------------------


Q3919:

龔成老師你好。請問你會否投資大折讓股票?

因為之前聽投資節目,主持人提及440大新金融,認為大新金融極大折讓,而且十分穩陣,可以買入,你認為可買嗎?

目前大新金融市值僅171億元,已經少於其手持的大新銀行74.6%的股權市值180億元,相當於每股53.7元。

即其剩餘保守估計價值60億元或每股17.9元的一般保險業務和現金全數為負。現價相對每股逾71元資產值折讓幅度高逾兩成八。


龔成老師:

我無研究這股,所以意見不多。

投資折讓大的股票,都是一種投資方法,因為明白股票的投資者都知,股票就是企業,企業都有一個價值,這價值不同股價。

當股價低過價值時,就是投資的時候,我及其他價值型投資者,都是用這方法的,所以,投資折讓大的股票,都是一個方向。

不過,這模式是希望我們能「買到平野」,而這個「價值」,一定要經過計算,而上述計法只是初步計法,當然有其道理,但內裡仍要深入分析的。

另外,「買到平野」不等如「買到好野」,這是兩個概念,質素不佳的股票,多平好不宜投資,若然是長遠前景向好的企業,略貴買入都值得。

我不是說大新金融(0440)無質素,因為這股質素不過不失的,但我未深入研究,所以只能表面去講。


------------------------------------------------


Q3920:

成哥, 近排唔知個市點搞, 我28000左右入了以下股票: 1928, 1357, 388, 178, 806. 你點睇呢幾隻?

眼見股市過度集中資金在某幾隻股上, 我應該點部署?
眼見手持幾隻慢慢跌落去, 應繼續持有嗎? 謝謝!

買入價為: 1928 (38.6), 1357 (11.98), 388 (225). 178 (3.08), 806 (8.43)


龔成老師:

投資,就是將現金轉化成資產項的過程,轉成優質股,長期持有,自然對財富增值有最大效果。好多野,要長期才會慢慢反映到的。

你唔好太著重短期股價,多d分析財富組合,視點是企業質素。所以,你唔好太多比較大市與自己持股,這是無意思的,長期的財富增值,以及組合的平衡才是重點。

你持有的股票都有一定質素,因此不用太擔心,可一直持有。如可以的話,可以投資部分資金在盈富(2800),你的組合會更為平均。

另外,買入時機都是一個關鍵,每隻股票都有佢的估值,而股價卻與估值不同,股價可以高於估值,這就是貴的價位。而年隻股票貴的價位都不同,當你在貴的價位買入,就算是優質股,你的回報也會被拉低。


------------------------------------------------


Q3921:

1. 成哥我見你之前講過水桶投資法 我而家26希望做到放多D錢係第一個水桶 想問仲有邊D快速增值的股票可以買呀? (跟你?建議已小注入左1928 1211 2800 1038)

2.  收息股好似港燈呢個年齡駛咪買住呀?

3.  現時是否狂熱期,而家成日$23X係咪唔好入住呀? 應該回到咩價位先入呢? 有無可能去番便宜區?

4.  同埋想問呢幾隻而家入唔得入得過呀仲見成哥有提過  0052, 3331, 0750,  1448, 1666, 0868

5.  我希望20年後可以做到財務自由, 但而家做埋part time都只係得萬八一個月.....其實有無可能達到呢個目標? 我應該要點投資法呢?

唔該哂成哥, 睇左唔少投資大師講教人炒股, 發覺都係成哥講的最有道理同最務實, 又易明, 因材施教, 連家人都讚, 佢地期待緊成哥的書!!!!


龔成老師:

1)年輕人應該著重增值,因此「潛力股」、「平穩增值股」都適合你的,但要留意,潛力股要有較大的投資技巧,若然你投資經驗一般,只能小注先。你上述的股票都無問題,可持有。另外,雖然我地都想財富快速增值,但有時唔可以太急,始終大市升了不少,要注意風險。

2)這個年齡,收息股只需佔組合一個好少的比例。如果你是保守人,年輕,那就可以投資一定的收息股,如果你是進取人,年輕,那就不用投資收息股。

3)要定義狂熱期,有好多指標,這刻已有少少熱了。港交所(0388)在$200以下買入較好,所以這刻未必是好時間,除非你進行長期月供股就可。

4)福壽園(1448)我很喜歡,潛力好大,但一直都不平,因此最好等等先。而興業(0750)的質素有下跌情況,有點失望,但不是沒有潛力的,建議再跌多d先考慮。以平衡風險。

5)如果你可以每月儲到$10000,假設回報率為15%,20年都可以累積到約$1200萬(如果你有投資技巧,有選股能力,15%回報不難的),如果你做唔到15%,當你回報只有10%,20年後都有$700萬,假設到時收7%股息,一年收息$50萬,每月收息$40000,雖然不算好多,但相信都能成功財務自由。

多謝支持!


------------------------------------------------


Q3922:

您好,我現在開始月供股票適合嗎?市場會否開始變狂熱?暫時睇中三隻股

盈富,置富同金沙。每隻都供1000至1500,這樣可以的嗎?
還有就是可以除時停供的嗎?
謝謝你,我是新手。

仲有一隻係銀河娛樂,佢OK ma


龔成老師:

這4隻都是有質素的股票及基金,月供無問題,只要長期進行就可以了。

恆指在30000點以上,的確不平,但如果長期供,就會平均,所以都可以開始,但注碼上不是訓身。例如你每月可儲$1000,你只可供$6000,餘下的要先儲現金。

所以,你每隻供$1000-$1500無問題,如果這不是你每月能儲數的全部。


------------------------------------------------


Q3923:

成兄,想請問跌市時如果問銀行借貸去買股票,風險大不大?

我現在睇緊Howard Marks 的《投資最重要的事》,係唯一能夠睇得明的書,《非常潛力股》同《彼得林區選股策略》只明一半。 《證券分析》係咪非常深,唔適合初階投資者呢?

如果有間公司處於破產邊緣但我判斷佢可以渡過難關,假以時日重回正軌,當佢跌到遠在估值之下時我買入,咁算不算價值投資?

嘉華國際(0173)的市盈率異常低,請問是否價值陷阱?有沒有投資價值呢?


龔成老師:

借貸投資不是不可,但要有明顯的息差回報才可以做,同時要確保不被斬倉才可以的。我認為借錢買股是一張「皇牌」,到了有「好明顯投資的機會」時,才會出手的,一般情況都不會動用。

我已出了6本書,基本上都用「初階者都睇得明」的角度去寫,你可以睇下,好多都同投資股票有關的。另外,你睇巴菲特的書,坊間有好多本,我相信你慢慢睇都會明的。

嘉華國際(0173)是地產股,賣樓有個特性,就是金額大,賣樓的一個項目,可以為企業帶來好大的利益。不過,賣樓同做飲食唔同,做飲食日日的生意都差不多,條數好易計,但賣樓的,項目以「年」做單位。

因此,就算今年賺錢多,不代表下年都是這個數,因為每年波動,在賣樓是好正常的,所以今年市盈率,不一定反映企業的全部價值。


------------------------------------------------


Q3924:

龔成老師,
想問下你對806的睇法


龔成老師:

惠理集團(0806)不錯的,佢係一定價值型資產管理集團,業務集中於大中華地區及亞太地區。佢透過惠理品牌管理多隻基金。過往的表現都不錯。

這股長期的發展正面的,有投資價值,但市盈率不算平,就算考慮下年的盈利大增,同時不算平。如投資最好分注。


------------------------------------------------


Q3925:

呀sir, 想問下你點看太古A,同中國忠旺?


龔成老師:

太古股份公司A(0019)正面的,雖然有些業務質素有下降,例如國泰(0293),但太古整體的質素,仍是不錯的。

但這類綜合企業,你唔好預佢會有快速增長,只會平穩增長,現時估值合理,算正面的。

中國忠旺(1333)生產的鋁型材產品,分為工業鋁型材產品和建築鋁型材產品。工業鋁型材產品主要用作火車貨運、客運車廂、城市軌道交通(地下鐵路及輕軌)、輕型貨車等。建築鋁型材產品主要用於組裝樓宇建築採用的門窗框、幕牆系統及室內裝修材料。

雖然近年生意增長唔錯,但盈利近年略有下跌情況,相信受成本等問題影響,而令佢的賺錢能力略有影響。整體不過不失的,但發展不會太快。現時估值合理的。


------------------------------------------------


Q3926:

龔成老師:金沙日後只會平穩增值,業務集中在澳門,但又沒有土地儲備,黎緊即將有大型資本開支,派息亦可能會減,會否擔憂會被其他對手超過龍頭地位的可能性?

例如:銀河的市佔率已十分接近金沙,又有高增長性投資項目,在作為平穩增長類股票而派息減的情況下,被銀河超越的時候是否代表它的質素已下降?


龔成老師:

質素不會因此而下降的,就算市佔率有降,都不一定令質素下降的。

同時,我多年前已對金沙(1928)及銀娛(0027)有這樣的定位,金沙的穩定性較強,風險較少,同時收息好,這是長遠都是的。

而銀娛同樣有質素,雖然穩定性不及金沙,及潛力大,因為橫琴項目將是潛力所在,但收息不及金沙。所以,要睇你自己的投資目標,兩隻都優質的。


------------------------------------------------


Q3927:

有野請教。巴菲特投資原則之一 是 除非變質,否則長抱
但係最近佢減持科技股,增持apple

係咪即係減持股價相對較高,來增持股價估值相對低既股票都係一個增加回報既做法?

而唔係一買左,只要股市唔瘋狂就唔放?


龔成老師:

買入後一直持有,是佢投資的大原則,但不代表中間沒有變化,例如佢認為,科網類只可佔佢組合的某個%,若然他認為其他科技股與APPLE是同一類,即是他進行的動作,就是將他認為回報較低,又或質素較弱的科技股,轉成回報較高的APPLE中。

又或者他認為部分股價已過熱,佢賣出一部分,買入現估值相對較合理的股票。

前提是買入持有,除非到狂熱才考慮賣,但中間有少許變化是可以的。


------------------------------------------------


Q3928:

你好 我係新手 想問下國泰可以購入 我大約想11蚊左右入 thx


龔成老師:

作為新手,我會建議你投資其他類別的股票。

國泰(0293)質素有下跌的情況,再加上除剔出恆指成份股,如果你有留意佢的盈利,其實都幾波動,這會引至股價的變化較大。不過,佢跌左好多,估值不高是吸引力之一。

但作為新手,投資股價相對較穩定的股票,會較好。


------------------------------------------------


Q3929:

Hi,龔sir,我報左你的投資班,想買收息股,你介紹過陽光房產,港燈,合和公路基建,係迷合和公路好d呢,因派息比率高。可以介紹其他收息股比較下嗎,謝謝


龔成老師:

如資金可以的話,你最好建立一個收息組合,因為想收息的人,一般都是低風險的,而單一股票難免有風險存在,同時,建立一個組合,可在不同時間收息,效果會更好。

其實上述的都是不錯的收息股,合和公路(0737)有質素,但不會過份著重息率數字,因為佢久不久都會派特別股息,而這個「特別股息」的意思,即是一年未必一定有,因此,你見佢現時息率好高,但不能作準的。

當然,佢本身的股息都不錯,每年股息都有$0.2,只是每年都會加上的特別息有點不穩,所以計算上略有困難。但這股是不錯的收息股。

香港電訊(6823)、置富(0778)、工行(1398)、建行(0939)都是不錯的收息股。其實你可睇我的新書《50穩健收息股》,50隻,相信你會找到適合你的。

股票班見!


------------------------------------------------


Q3930:

龔老師,想請問你點睇358江西銅?我12.9入左。當初係因為新能源汽車發展,覺得銅業應該可以受惠。請問可否長線持有?謝謝!


龔成老師:

江西銅業股份(0358)質素不過不失,銅業需求受多個因素影響,不易分析的。其實佢的經營情況有點被動,你睇睇佢盤數就明。

佢生意每年都平穩增長,反映產量正常的提升,自身情況無問題,但盈利就好波動,就算生意每年平穩增長,有時就大賺,有時無乜錢賺,這反映最終盈利,都會受資源價格影響,而這個價格要預測並不易。

雖然現時市盈率40倍,但預期佢盈利會大幅增長,下年的市盈率應會去到10倍-20倍水平,估值合理。至於接下來的股價發展,最終都是睇資源價格,因此有點被動,長線投資價值只屬中等,但你有貨都可以持有的。


------------------------------------------------


Q3931:

龔sir 我想問點樣先可以睇到間公司個股價高於公司既價值,有無d咩技巧方程式可以理解到。

因為我而家正處於這個問題,唔知道點樣可以確認到佢而家既股價係咪高過間公司,令到我唔知入唔入手


龔成老師:

每間企業都會有一個價值,這價值一般包括企業的「業務價值」,以及「資產價值」,前者的計算方法很多,例如現金流折現模式,市盈率估值法,後者則會用市賬率去計算。

各種計算方法,如同用不同的角度,去找出公司值幾多錢,記往,價值與價格是兩回事。價值計算時,往往會以長期分析作為視點,你要考慮佢將來的業務情況,生意、盈利、現金流等,從而作出評估。

要講估值方法,要花相當長的時間,講d唔講d反而容易誤用,因為我在股票班,足足要講5小時才講完,所以好難三言兩語講。


------------------------------------------------


Q3932:

成哥   信義光能(968) 你點睇?


龔成老師:

信義光能(0968)主要從事生產及銷售太陽能玻璃產品,以及發展及經營太陽能發電場。佢質素不錯的,加上都有潛力,可以考慮的。

佢近年的生意增長都幾好,盈利都不錯,雖然預期佢增長將會放緩,但前景仍然正面,加上現時市盈率不高,已反映了行業的潛力風險,因此這股不差。


------------------------------------------------


Q3933:

有個問題係關於比亞迪的。
我見比亞迪有分,2594比亞迪,1211比亞迪服份,285比亞迪電子。

其實有咩分別?佢地之間有咩關係?同埋,邊個最值得投資買入呢?

thx!


龔成老師:

比亞迪股份分做港股(H股)及國內的A股,這是同一隻股票,只是在不同市場上市,所以編號不同,香港的就是(1211),國內A股的就是2954。這是同一隻股票,但股價會略有不同,你睇翻1211就可以了。

業務包括汽車、手機組裝、電池、雲軌。

至於比亞迪電子(0285),就是1211的子公司,0285,業務主要生產手機外殼及部件。

其實兩間公司都有潛力的,個人較喜歡1211,不過近期升了不少,注碼上要控制。


------------------------------------------------


Q3934:

你好,我想請教下,係股市不斷創新高既依家,應唔應該開始月供股票呢?始終投資知識淺,本亦唔多低下,想搵風險較低既方法吸收經驗

另外,我見金沙同北控水務(371)都跌番落黎,佢地入場費唔算高,公司又有增長,後者更係水務工程既第一名,我應該以一手入定月股形式較岩我呢?


龔成老師:

大市升到30000點,已經不平,但如果進行月供,只要長期進行,買入價就會平均,所以無問題,不過注碼上不能太多。例如你每月可儲$10000,最多只可供$7000,餘下要先儲現金,等機會。

金沙(1928)同北控水務(0371)都是優質股,都可長線投資的,但以現時市況,月供會較好。另外,若然你是新手,最好在月供中,加入盈富基金(2800)會較好。


------------------------------------------------


Q3935:

想問新手應先看那本書?謝謝


龔成老師:

《80後百萬富翁》、《財務自由行》
如果你想直接了解股票,就《50優質潛力股》、《50穩健收息股》。


------------------------------------------------


Q3936:

龔sir,想問下1800中交建 & 488麗新發展前景如何?
無貨在手,市盈率只有幾倍,但麗新發展盈利負增長,負債都有增加。


龔成老師:

中國交通建設(1800)質素不錯的,但盈利增長有放緩的情況,所以市場估值不高,但這企業仍有平穩發展的能力。對這股評價正面。

麗新發展(0488)的業務都幾波動,本質算是不過不失,這股票分析不易。同時,佢股價近年升左好多,開始有少少風險,投資價值算是中等。


------------------------------------------------


Q3937:

你好, 想問在電動車的前景下,洛陽鉬業(3993)會否因此得益?現價是否合理?謝謝


龔成老師:

佢會受惠的,始終對相關資源的需求增加,長遠正面,但都唔好忽視,佢股價近年都升左幾倍,市場已完全反映了相關因素,這刻的值博率只屬中等。

現時估值有少少貴,投資只能小注。


------------------------------------------------


Q3938:

你好,龔成老師。現在我有幾隻股票,700升到咁係咪要沽貨呢。

另外有隻盛諾(1418)我1蚊買入,見佢因為業務簡單,有自家專利技術作護城河。應該都合乎價格,但幾年都未有浮出水面,自己睇財務報告又睇唔到黎緊有乜發展。所以請教一下呢隻值得長期持有嗎?

我之前睇過你本書,仲有睇緊另一本大富翁致富藍圖,希望多多指教。


龔成老師:

騰訊(0700)是有潛力的股票,只是估值不平,但以企業本質的發展來衡量,我不敢少看這股。當然,這類股票分析不易,因為業務變化大,所以有潛在風險的。

如果你已有貨,那就一直持有,無問題的。又或用「升一倍,放一半」作策略,餘下的一直持有不放。

盛諾集團(1418)佢係美國、香港及中國內地製銷售健康與家居產品及聚氨酯泡沫產品,而家居產品主要為枕頭、床墊及床褥,用「SINOMAX」品牌。

本質唔算差,但中期業績大跌,的確是問題,我未睇佢中期業績跌的原因,但你最好睇一睇佢中期業績份報告,點解會跌得咁勁。

如果是核心性的問題,即是企業的質素有轉弱情況,但如果盈利差同經營無關,又或只是週期性問題,那就不用擔心。

不過,佢上市年期不算長,只有3年。當企業上市前,一定造好盤數,業續好好,到上年後,慢慢先會見真章。


------------------------------------------------


Q3939:

您好,老師,我是未買過股票的,所以想投資買下d優質股賺下錢

之前睇你的POST話可以買下(2800)盈富基金,例如佢現在既價是30

點解我起網上銀行買佢一直都買唔到,例如:我落盤股數是1000股,而落盤價位是29.95,最後都是成交唔到一股銀行退返錢俾我既?

係咪因為我買得太少錢呀?


龔成老師:

同你多少錢無關的。

因為我地的交易所,是利用「排隊」的制度進行,如果你仔細睇,其實佢有兩個價,例如$30/$29.95,如果你想刻即入,就要用較高的價,一般都可以即刻入到(除非佢個價升得好快)。

若然你用$29.95,又或更低的價位如$29.9,你就是在「排隊」等買入,如果佢一直都$30唔跌落去,你就一直都買唔到。到佢跌落$29.95,而你是set個價在$29.95,你就有機會入到。這時候,就會按翻落盤的先後次序,而睇下做唔做到你個盤。


------------------------------------------------


Q3940:

龔老師您好,本人打算入港鐵,比亞迪,福壽園和金沙,請問現僄可入嗎?

另外,它們處於甚麼水平?便宜?合理?昂貴?最後,恭喜龔老師出新書!


龔成老師:

比亞迪(1211)$5X安全、$6X可分注,股價再上只可月供,因為股價不平了,但有貨的,可一直持有。至於福壽園(1448),$6以上同樣不平了。

對於這些不平,但又有潛力的股,其中一個方法,就是現價只小注,等回落才正式買入,這是無方法中的方法。

至於金沙(1928),合理區在$27-$40,因此在$3X仍可以分注買入。

多謝支持!


------------------------------------------------


Q3941:

你好,本人剛開始$5000月供2800。手上多數為銀行/內險股。

暫時手上仍每月有$5-6000可做投資,請問買金沙中國1928定銀河027好?


龔成老師:

由於現時市況不平,因此投資額不要去得太盡。例如你每月可儲$10000,月供/投資股票的部分,每月最多為$7000,餘下的要先儲現金,等待機會。

金沙(1928)較穩健,收息較好,銀娛(0027)則潛力較高,要睇你自己的投資目標。但兩隻都是優質股,前景都正面的。


------------------------------------------------


Q3942:

龔成兄。近排2238,2314,1299,都升左好多
而1928就回左

由於自己都十分睇好金沙,所以現時賣左果堆股,以36.6換買左幾手1928儲貨長線投資

打算跌10%買一次貨,但最唔明就係賭牌問題,會唔會有機會續唔到,或增加賭排令利潤減少
Thank you 龔成兄


龔成老師:

之前的3隻質素都不錯的,其實都有持有的價值,轉換股票好難講是好是壞。因為將3隻股集中在1隻股,就會略有風險。

金沙(1928)長線正面的,但只能平穩增長,收息及股價平穩增長,都可以的。

賭牌只是政府擺姿態的行為,不用擔心,金沙在澳門規模龐大,員工過萬,如果一間過萬員工的企業無得做,對社會的影響相當大,任何一個政府,都不希望這情況發生。

所以,若出現賭牌消息,令金沙股價下跌,就是買入時機。


------------------------------------------------


Q3943:

龔成你好!想請教一下以股票換樓的問題。

我現在25歲,希望在大約兩三年後置業。現持有股票二十多萬,現金十萬。

股票方面近一年開始月供盈富,亦持有早幾年買落的港交所、騰訊和港燈。想請教一下,當要買樓時,應全數賣出這些股票以支付首期嗎?

我心理上是有點不捨得的,因為賣掉了大概不能再以早幾年的買入價再買入。謝謝!


龔成老師:

首先,心理問題不應影響投資。
另外,這裡假設你兩個層面。

我假設你買樓是投資收租,你應該從「長遠總財富」的角度去分析,股票轉物業,只是資產轉換的過程,那得長遠增值最好,就應投資那個。過往買入價不應太著重,長遠計,如果有最大的總財富,才是最重要因素。

若然你是置業自住的話,賣出股價,的確會令部分的財富增值能力減少,所以要取一個平衡點,最好只賣出一半的股票(不是買入價的問題,而是財富增值的問題),賣出一半,你就能有一半股票留低,成為你住後財富增值的部分。但這有可能令你儲首期的時間增加,所以要取平衡。


------------------------------------------------


Q3944:

老師你好!本人經朋友介紹,認識你加FB。

本人對投資零認識,而且工作需要難以留意市況,在朋友提議下以月供股作低風險投資。今年6月開始在中銀以1000蚊供?豐(因派息唔錯)。

現時只有2萬蚊流動資金及每月可以有多1千蚊可作供股或儲蓄。以下很多問題想請教?老師意見:

1.以現時市況應否以流動資金作投資?
2.每月多1千蚊應否增加每月供匯豐,還是供其他股?
3.留意到老師經常提意大家投資穩健股盈富、港燈、港鐵,若投資應如何分配現有流動資金?

因收入低,現時努力減少支出,希望日後可以每月多5百或1千蚊作儲蓄/投資。感激!


龔成老師:

1)如果你只有$2萬的流動資金,而現時股市又不平宜,這筆錢不如先持有現金,到股市有較大下跌時才出動。如你真的想買,最多只能小注。

2)原本$1000供匯豐(0005)無問題的,但如果每月可再供多$1000,那最好供其他,以平衡風險,例如盈富(2800)

3)盈富(2800)佔的百份比最多。由於你是新手,應低風險,所以之後投資港燈(2638)較好。


------------------------------------------------


Q3945:

你好,我有d問題想問:

1.我買了新版的50優質股,如果拜讀著作,是否已不需報班呢?

2.另外債價跌,對 reits 應該都有影響吧。除了 823, 其他都跌了很多

3.其實呢,我望住 345 連升 10 日…, 依家新高先買 345 823 咪好戇居??

4.翻閱過50優質股, 可是沒提及估值在哪水平股價是多少, 迷惘


龔成老師:

1)課堂與書有好多唔同的地方,好多實戰及企業估值方法,書都無講過。所以課程比書更重要。

2)債價跌,有可能對房託股價影響,但真實情況會複雜好多,不能太過直線思維。

3)近期不少股的確上升了不少,可以在低位買入,回報率當然最高。當股價在高位時,回報率較少,不過,這刻比起持有現金(不斷貶值),就算低回報也不錯。當然,在正式投資時,我地會考慮好多好多因素,企業的質素,風險,估值是多少,現股價比股價高了還是低了。

4)書中只是給你一個方向,同時企業估值會因時間而改變,所以好多時無講到好實。


------------------------------------------------


Q3946:

有關87001,你講過佢部分物業有到期問題,而家距離大限仲有32年,但股價由幾年到現在一直慢慢在下跌,這趨勢會持續嗎?


龔成老師:

匯賢(87001)本質不錯的。但當中有物業到期日為2049年4月21日。這就會令物業的價值慢慢減少,但不代表你買入後會蝕本。

假設佢將得到的全派息,你每年都會收息股息,你會發覺佢的息率比其他房託更高,現息率近9%。即是說,股價雖然慢慢下跌,但股息部分就好高,從另一角度說,股息部分其實包括了本金,只是本金從另一模式轉化比你。

所以,你不會因投資這房託而蝕錢,雖然股價的確會慢慢向下(如果佢將所有收到的股息,都全部派出)。


------------------------------------------------


Q3947:

成兄,想請教
[email protected]入 要走嗎?見佢跌得好勁下!
另外除了2800(跟你買了)仲有冇d收息股推介?謝謝


龔成老師:

華信金融投資(1520)的確有d麻煩,佢2013年尾上市,除左2014年盈利見得人之後,到2015年盈利就開始大跌,到2016年就更加出現虧損。

所有公司,係上市前都會做到盤數好靚,往往要上市後先見真章,你睇翻佢幾年股價,波動好大,本質無乜質素,如果你持有好多的話,一定要減持一部分。但如果唔算多,持有等反彈賣出。長遠計,最好賣晒這股。

港燈(2638)、工行(1398)、合和公路(0737)、置富(0778)、香港電訊(6823)等,都是不錯的收息股,你亦可睇《50穩健收息股》。


------------------------------------------------


Q3948:

龔sir 你好,我想問一下0906,0753,0636可作長遠投資嗎?Thanks!(我是新手)


龔成老師:

中糧包裝(0906)質素中等,企業的賺錢能力不算強,近年股價上升不少,投資要注意風險,都算可投資的。

中國國航(0753)有質素的,雖然盈利有少少上落,但前景正面,可長線投資。

嘉里物流(0636)盈利都幾穩定,但增長力一般,市盈率不高是其中的賣點。都可長線投資的。

上述3股都不算差,但對於新手來說,未必是最好的選擇,但如果你注碼方面不太大,其實都無問題。


------------------------------------------------


Q3949:

老師, 你好. 我係90後大學畢業做左幾年野嫁啦. 我岩岩開始想學習買股票. 睇緊本the Intelligent Investor.

好多人話買股票唔可以亂咁買, 起碼都要清楚知道買緊間咩公司, 自己做緊d咩; 所以我遲遲都唔知幾時先開始好, 亦都唔係好夠膽開始

係網上做research時候見到你page, follow左一排; 想向你請教一下, 希望你比d guidance 我.

大約個plan 係6萬出黎買3隻股票 諗緊係騰訊控股(投資潛力) , 中電/港燈 (長期收息), 再加一隻美股Google/Facebook/Amazon; 我知道要分散投資, 但係我唔係好識, 求指教 Thanks!


龔成老師:

對,買股票一定要知間公司做乜,因為股票就是企業,你買股票,就是將錢投資在這間企業身上,你一定要知佢的業務、生意、盈利、財務情況、管理層因素、產品、行業、前景等。

投資,原理就是將現金轉化成優質股,長期持有,等企業慢慢成長。

你年輕,可以分配到潛力股+平穩增值股,因為你承受風險能力較高。不過,由於你是新手,潛力股只能小注,要到你有一定的投資經驗後,才可加大這邊的投資。

騰訊(0700)同Google/Facebook/Amazon,都是有潛力,但有風險的股票,最好佔你組合,合共不多於3分之1。中電(0002)港燈(2638)無問題,佔3分1,至於另外3分之1,可考慮平穩增值類別,例如盈富(2800)

記住,你的投資知識,與你的財富成正比,你要從睇書、上堂等途俓,不將提升投資知識。


------------------------------------------------


Q3950:

龔成老師你好,想請教下656復星國際, 我之前較高入左,現在應該睇長線還是止蝕好


龔成老師:

復星國際(0656)有質素的,不用太擔心,任何一隻股票,中短期O股價上上落落,都是好正常,而優質股,長期的股價總會上升的,所以一定要有耐性,同時投資後,不用理短期股價。


------------------------------------------------


Q3951:

你好,請問我是新手,想月供$2000-3000,盈富,銀河/金莎,港鐵/煤氣/港燈,友邦,騰訊,從呢幾揀,其實計吾計到約用幾多時間供到一手?

因我一、兩年後要用一筆錢約$20000,只靠儲好似冇乜用,想試下買股票,thanks !

我見銀河跌左好多日,今日升,我玩緊個摸擬投資,56買入今日58,真$幾好呢!我現在有時間日日看市,但之後冇因要返工


龔成老師:

幾多錢一手、幾時先供到一手,並不會影響我地投資這股與否。月供股票在不斷供的情況下,的確會有碎股,但好多銀行都有提供,月供股的碎股可以正股價賣出,所以不用擔心。你供自己想供的就可以,如不懂選,就盈富(2800)

如果你一、兩年後要套現,最好選擇股價波動較少的,因為無人知到時的股價會點。

首先,模擬與現實,是完全不同的兩個世界。

第二,以賺差價概念進行投資,並不正確,我地要追求長遠的資產增值。以買入持有為目的。

第三,睇住個市是無意思的,所以睇唔到股價仲好。買股票賺最多錢的人,巴菲特,佢無股價報價機的,從不看短期股價,只睇企業。


------------------------------------------------


Q3952:

龔老師你好,本人24歲,現職教師
月入 28000 元,額外每月兼職平均約 12000 元,因學校有宿舍,解決了住的問題,平均月儲3萬。

現有股票53萬多 (0001, 0003, 0005, 0062, 388, 916, 1299, 6886,長和 友邦 匯豐 比重最高,各超過10萬市值),現金20萬。

我有2方案:
1. 把所有股票沽出,買約 400萬樓 (8成半或9成按揭),再每月供樓當儲錢,但猶豫緊,因樓價高,且不能放租幫補供樓,因我唔夠錢做5成按揭

2. 長線一路儲股票 (我集中買大藍籌,收左息再用息買,如此類推),擴大股票組合,長線目標儲過200萬股票 (10年內,如約4厘息,年收8萬,平均月收7000元,已夠補貼生活費)。

如要二揀一,那個方案好一些?

又或者,龔老師有沒有其他理財建議? 謝謝!


龔成老師:

你不用限死在這兩個方法之中。

首先,5成樓都有方法放租的,這方面不是問題,但抱歉不便在這裡講,課堂上以「朋友」身份講會較方便,另外,你可以計請教地產經紀,有些都會講的。

如果以「價值」與「價格」偏離程度去分析,股港開始有少少貴,但物業就真的貴,物業的偏離程度較大。所以,投資股票的回報,會比物業大。

方法是先投資股票,利用類似方案二的方法,不斷儲股票增值,但不用定出一個固定$200萬的目標,你只需不斷儲就得。股票的增值比物業增值大,即是這些股票增值後,就算日後樓價升左,你反而有更大的本錢去「追」物業。

你保持股票的不斷累積,同時等機會,若樓市出現下跌,就是你將股票轉成物業的時機。這個時機不一定是你有自住需面,任何時間都得,轉到物業後,持有收租樓,一樣是增值方法。


------------------------------------------------


Q3953:

成哥,早前買入既易鑫/雷蛇都跌左好多,現階段應唔應該止蝕?


龔成老師:

我從不抽新股、不玩半新股,因為新股定價太多不平,企業一定把握最好的上市時機,同埋整到盤數好靚,以高估值上市,我地好難買到平野。

易鑫集團(2858)同雷蛇(1337)其實都是較新興的業務,可以有潛力的,只是市場估值過高,但隨著市場發展,除非有大逆轉,否則股價會慢慢上升的。如果你投資注碼不太大,可持有,但如果太多,就要先減持部分,因為這些股都有風險的。


------------------------------------------------


Q3954:

你好,有興趣上你的堂,請問有試堂嗎?


龔成老師:

多謝查詢,但由於我的股票班爆得好勁,過往每次都爆滿的,所以不設試堂,見諒。


------------------------------------------------


Q3955:

現時騰訊升到咁係咩原因?股市會否爆,好似騰訊托起成個恆指


龔成老師:

佢公布出來的業績,盈利有好勁的增長,企業只要有盈利,就會有價值上的提升,股價上升都好正常。當然,這股並不平宜,但有實際盈利支持,就是實在的提升。


------------------------------------------------


Q3956:

現價買比亞迪會否太貴?

前日主席話未來會重組業務,目標做一間百年老店,這算是利好消息嗎


龔成老師:

比亞迪(1211)早前發表了大計,除了想之後一直強,做百年老店外,另一重點是2025年,每年收入達到10000億人民幣,佢表示會透過重組,令這目標達成。這是利好消息。

現時佢的收入為1000億人民幣,如果佢真係做到這目標,就是收入的10倍增長,假設淨利率與現時相同,上年佢每股賺1.88人民幣,約$2港幣,如果升10倍,每股盈利就是$20。

現時比亞迪可增長,市盈率約35倍,到時一定不是高增長,市盈率可能只有15倍-20倍,即是2025年的股價為$300-$400。

當然,這個假設,建基於佢可唔可以將佢現時收入1000億,變成10000億。


------------------------------------------------


Q3957:

龔成老師,我睇你的書。係大富翁圖裡有些股票尾有-T如4337,或-SS如港燈是代表什麼?


龔成老師:

T是特別股票,在2000年時,港交所引入了7隻美股作試點,,比香港股民在港交所買賣,全是433X字頭的,但反應不佳,所以不再引入,只有這幾隻。

SS是信託的意思,即是佢的運作,要根據一些已定好的條款,例如港燈(2638),要100%將賺錢的作派息。


------------------------------------------------


Q3958:

你話長建(1038)是一只值得長期投資的好股,我之前在$70入了第一注,現想入第二注,咩位入好?

如果跌到$65,是否是一個好價?多謝


龔成老師:

長建(1038)優質,適合長線,但估值不平,因此用分注買入方法最好,一般分注可用10%-15%的。第二注在$65買入可以,如果股價再跌,到$58才第三注。


------------------------------------------------


Q3959:

你好!本人今年50,一直沒有任何投資, 最近在FB認識你, 突然有求知慾望, 希望不算太遲。

本人每月儲蓄5000 ,現計畫用3000供股,見你介紹盈富和金沙, 如果兩隻都放在供股,可行嗎 ? 謝謝!


龔成老師:

以現時大市在不平的情況下,用月供股票模式來儲股票,是較為穩健的,最好一邊供一邊儲現金,你供$3000可以。

盈富(2800)及金沙(1928)都可以月供,只要長期進行就可以。另外,要睇你是否有退休的計劃,因為若然你計劃在10年內退休,就宜將資金,慢慢投資在收息股上,除可減低風險,亦可增加你將來的現金流。


------------------------------------------------


Q3960:

老師,我買了你4本書了..

你其中一本書介紹了1448 、留意左一段時間..依家上到6個幾..還值得入市嗎


龔成老師:

福壽園(1448)係一隻我好中意的股票,做殯儀生意,高毛利,自己建立墓園再分銷,如同搞地產一樣,這股不是有質素,而且有潛力。

現時的情況有點兩難,現時估值不平,但這股又有潛力,其實可以到$6邊,先小注買入,再跌到$5.5才正式買入,策略上會較為穩健。


----------------------------------------------

多謝各位提問,若然你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網的,當然,會將發問者的身份,以及有關個人的部分刪去。

另外,由於提問人數眾多,見諒無法即日回覆,如果是普通的提問,預起碼要3天以上才能回覆,若然是較複雜的提問,起碼要7天才能回覆,希望各位能諒解。

免責聲明:上述觀點只代表作者本人或作者公司意見,與華富財經的立場無關
分享到:TwitThis   Facebook   LinkedIn       寄給朋友
【世界第一大風電,龍源的危與機】 18年10月18日
【龔成問答信箱】(Q7301-Q7400) 18年10月17日
【莎莎的估值問題】 18年10月16日
《財務自由行》第25回 【天使與魔鬼的工具】--【倒金字塔式槓杆投資法】 18年10月15日
【進入狂熱期的投資策略(下)】 18年10月12日
【澳博的發展潛力】 18年10月11日
【龔成問答信箱】(Q7201-Q7300) 18年10月10日
【進入狂熱期的投資策略(上)】 18年10月9日
《財務自由行》第24回【天使與魔鬼的工具】--【以借創造息差(下)】 18年10月8日
【除淨日過戶日派送日】 18年10月5日
市場最新消息
監視表
華富股評系列
市場動態:中國的債券出售與鷹派的美聯儲,可能導致美國債券收益率上升 18年10月18日
中石化(386):18年第3季度盈利指引低於預期 18年10月18日
征服基金:以風險管理為目的 18年10月18日
華富首評:中場博彩推動行業增長 18年10月18日
閱文(772):可能是近年唯一具有可靠盈利能力的香港上市科技股IPO 18年10月16日
華富財經:

常見問題  |  網頁指南  |  關於我們  |  聯絡我們  |  刊登廣告  |  免責聲明  |  私隱政策     
中國通海國際金融有限公司:
創會成員:
MyQuamnet華富財經免費會員服務可享:
【免費即時股票報價】【股票圖表分析】【圖表】【港股圖表】【行業比較】【港股資料】【認股證】【窩輪】【牛熊證】【預托證券】【即時財經新聞】
【財經新聞】【股市新聞】【港股新聞】【美股新聞】【港交所新聞】【新股】【港股分析】【股票監視表】【投資組合】【財經講座】【投資講座】【外匯】【匯率】

Quamnet華富財經資訊範圍:
【港股】【股票報價】【買入價】【賣出價】【現價】【開市價】【昨日收市價】【每手股數】【市值】【市盈率】【市賬率】【市帳率】【即時報價】【過往股價】
【最高價】【最低價】【52週高位】【52週低位】【買方動力】【賣方動力】【股價升跌幅】【成交量】【成交額】【認股證報價】【窩輪報價】
【牛熊證報價】【財經】【股市】【金融新聞】【大手成交】【圖表分析】【技術分析】【上市公司資料】【港股股評】【港股報價】【招股】
【新股上市消息】【異動股】【恆生指數】【創業板】【國企指數】【紅籌指數】【深圳AB股指數】【上海AB股指數】【恆生中國企業指數】
【香港AH股溢價指數】【外匯】【環球商品期貨】【公告】【股評】【財經專欄】【大行報告】【深圳股市】【上海股市】【香港伊斯蘭指數】
【股市策略】【監察器】【工商業】【金融】【投資】【電訊】【媒體】【科技】【醫療保健】【運輸】【能源】【地產】【公用】【資產管理】
【證券買賣】【個人財經建議方案】【美股】【商品交易所買賣基金】【ETFs】【期權】【日圓】【美元】【歐元】【英鎊】【澳元】【紐元】【加元】【期貨商品】

訂閱服務:
【華富股評系列】【華富股評】【問與答】【名家縱論】【華富財智】【華富股評系列升級版互動投資顧問】【異動訊號】【窩輪監察器】【投資工具】【股票監察器】【股票報價器】【智能資料庫】【期指數據服務】【穩定增長組合】【進取增長組合】【基金分析】【財富管理】【市場分析】【投資基準】【紅籌股】【國企股】【債券】【中、短線股票投資建議】【中短線投資者】【決戰正回報組合】【研究部雪球組合】【股市透視】【板塊淘金】【即市消息股】【最新買賣訊號】【大戶動向】【新股半新股追擊】【龐知灼見】【龐寶林】【環球大市分析】【每週市場分析】【模擬股票組合】【模擬基金組合】【策略更新】【股海無量】【江小魚】【股俠縱橫】【方新俠】【智通財技】【梅偉琛】【細股狙擊】【渾水】【價值航行】【李海欣】【股皇上聖旨】【許浩彰】【股壇風雷雨】【劉奇峰】【金股期匯攻略】【陸期峰】‧【蔡榮輝】【逆思維策略】【賴俊強】【文錦匯】【文錦輝】【天下第二倉】【潘彥銘】【倍升創富】【驍騰原】‧【股海盒子】【不二期權】