一般股民睇業績慣咗只看盈利增長，點解增長唔錯都要急回呀，好消息出貨成為了萬能key，事後孔明雖然可以省卻很多麻煩，但無助於分析股份，尤其是你揸住隻股，出完業績都唔識分好壞，呢個都幾弊。

睇業績真係冇乜速成法，只能靠睇得多，睇得細，中伏中得多自然就會有進步，如果你對自己的心水股好熟，相信唔需要太多時間就睇到份業績得唔得，做得心水股，梗係有一兩個重點，令你覺得大有可為，會支持股價向上，而當份業績出咗，你那兩個重點是否仍然有效，還是轉差了，而較多人犯的錯，就是出現了轉差的情況，卻認為不足以成為沽出理由，今天的我否決定昨天的我，但市場是殘酷的，你唔沽不代表唔跌的。

日清食品(1475)及香港電視(1137)昨天齊齊公佈業績，可用作例子作闡述。早前看好日清，都是看重中國市場的增長，在內地減增值稅的情況下將會受益，雖然這幾個月個市咁差，日清都偶有跟市跌，但總括來說都是強勢股份，本周更衝破七蚊，但昨午業績一出就大插，又係時候可以用萬能key啦，不過中期盈利升四成只係表面數，稍作細閱便見到原來整體的營業額只有1%增長，主要是香港分部收入下跌拖累，中國市場仍有6%增長，分部盈利更增加了四成，亦是今次靚數的推動因素。公司早前將香港杯裝麵加價，是在7月生效，而國內的減稅降費，是由4月開始，換言之，下半年效果應該更明顯，所以如果之後還有跟市而超跌的情況，應要好好把握機會。

早前說香港電視會受惠士多的自殘，股價上月一度衝到5.60元，是七年高位，但香港近月的市道係點，相信大家都清楚，這份業績已反映了6月的影響，但整體來說，銷售增長、訂單數目、毛利率、配送成本等指標，其實全部都向好的，但點解昨天午後會急瀉呢，主因就是調低今年銷售目標，由32億減至27.5億，亦減慢門市擴展計劃，由增加120間減少至65間，兩者其實都反映了王維基對未來香港消費市道的預測，勒緊褲頭迎接挑戰。由於佢玩嘅模式係全力谷銷售，從而做到規模效應減成本，及有更大的議價能力去提高毛利率，所以個銷售目標向下調，變相就是全年盈警了。

香港電視的業績，係好值得戰友去細閱，半年業績用了40頁去畀數據你，分晒唔同產品的毛利率走勢，將直接銷售及特許銷售又分開報，客戶年齡層分佈又有，不過奈何，有heart做生意又有高透明度，相信短期內仍難敵殘酷的市場，希望事過境遷，維基可以快速彈起啦。

Fb個人專頁 http://www.fb.com/chingbing888