華富財經 Quamnet.com Logo
龔成
2021-12-29 14:00:12
【龔成問答信箱】(Q24051-Q24060)

Q24051:

阿Sir 見你之前話330唔係優質股,但係我做左少少資料,想請教你意見。

作為散户在有限的資訊平實分析此股,得知其本質和以前已有很大轉變。在前些時現任大股東入主後,其前管理層已轉為現新管理層,而前理層常被人罵不識時裝潮流,活在平行時空和管理不善等,亦已是明日黃花。

而由其公司資料所得現是關蝕錢的店舖,開拓網上財源,這種輕身上路的策略甚是成功;就是在此疫情打擊下百行百業就艱難下,仍能交出一份轉虧為盈的成績。

如果全年業績仍能延續,咁P/E已是單位數字,而現市賬率更得0.32左右,假定一如所料,咁肯定是一隻起超平和被忽略的股票。不知您看法如何

龔成老師:

第一,如果企業有優勢,過往的業績一般都會不錯,因此,「轉虧為盈」的企業,雖然是好轉跡象,但並不是最好類別的企業。

第二,一間企業剛剛業務轉好,是否代表之後都好?這刻不一定有答案,投資者要有更具體的指標才能投資。

第三,一些潮流企業,小心市場變化較大,我一向都擔心這類的。

當然,如果你現時買,佢日後生意持續向好,你會有回報,但考慮佢過往及現時的情況,只建議小注好了。

Q24052:

龔sir 點評價 三星彭博環球半導體ETF(03132)?

龔成老師︰

三星彭博環球半導體ETF(3132)投資目標是提供在扣除費用及支出之前盡量貼近彭博環球半導體20大指數表現的投資業績。

其投資包括7個市場上市的頂尖半導體企業:美國、台灣、韓國、荷蘭、日本、德國及法國。

未來全球對有質素半導體需求,將會有增無減。

此ETF組合中,包括不少優質企業,如台積電、NVIDIA、INTEL、SONY、ASML Holding N.V.等,故此ETF有投資價值。

但現時普遍半導體企業股票都唔平,故你用分注或月供形式儲貨,會較為理想。

Q24053:

龔成老師早晨,請問如何計算股票的合理價值?你有冇邊本書會教如何計算?

例如小米現價21元,點知佢系米合理價或貴呢?

龔成老師:

要計企業的價值,過程比較複雜,好難三言兩語就講到,就算在我的股票班,都要講5小時,裡面會講3種估值方法,有難有易,但同學都用到的。

簡單來說,你要考慮企業的生意、盈利、現金流、資產、負債等財務數據,同時要比較行業,考慮這企業的經營情況,之後的環境又會如何。這都是計算的基礎。

例如,我地會考慮佢有多少生意,有多少盈利、現金流,有多少資產,從而計算該業務值多少錢,同時會推算將來的盈利情況,去推算這企業長遠的價值。

如果要深入計算,基本上要好仔細的研究企業,要分析好多財務數據用比率,先至有較完整的答案。

你可以睇《股票勝經》、《年報勝經》。

小米(1810)有潛力的,佢的產品性價比高,相信在全球好多個國家都會有市場,佢長遠只會進一步增長。

同時,佢建立的平台是佢長遠的增長動力,先賣手機,再利用手機的平台延伸銷售小米家電。長遠正面的。

這股可長線,現價合理區中上部,小注分注可以,但唔好入得太急,預佢股價仍波動。

Q24054:

龔sir 好想請教你 我33歲匯豐57買入4000股 好想等到佢升番50大約有20萬就換碼去呢三隻股1177 1810 285 分散投資

仲有自己有

3067 20左右2000股

9988 252左右200股

其實都想加少少注,但宜家又有隻金莎18.8左右 2000股 手頭上無現金了 所以好想放哂匯豐 宜家每月生活都無咩錢儲了 好想希望投資幫到我

希望老師可以教下我 點樣可以番生 我老婆唔係太讚成我放匯豐 因為覺得每年有息派 怕我換碼會蝕好多錢 但我自己就想 但又無太大信心 希望你可以幫下我

每月都收支唔平衡 宜家仲有卡數分期清還 好想龔sir 可以解答我 感謝

龔成老師︰

首先,你要明白我地投資股票,其實等同投資一間企業。希望透過其自然增長,以達至財富增值的目的。

所以,我地投資一定係長線,而唔係短期炒賣,去賺差價。由於係長線計劃,你唔好預期佢對你短期財務上,會有任何幫助。

但長線計,你建立一個優質的增長組合,係可以令你有唔錯的回報。

我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。

以你33歲年紀,依然係好年青,投資上應以增值為主。匯控(0005)只係收息股,增長力不高,唔適合你。

你匯控(0005)現時持股都多,我建議你分段沽出,換碼至一些較有增長力股票。

你可以每隔一段時間沽1手,或者每升少少就沽少少。但唔好等到$50先做,每人知佢幾時會上$50,故分段做會較安全。

不過,係投資之前,你首先要做就清還咭數。因為信用咭利息好高,會嚴重影響你長線回報。你要先處理好這部份,才開始投資計劃。

你講的中生(1177)、小米(1810)、比亞迪電子(0285)都適合你,現價都合理,可以入首注。

至於現有安碩恒生科技(3067)、金沙(1928)和阿里(9988)都可以持有。

不過你要留意,你而家太偏重左係潛力股(3067,9988,1177,0285,1810),佢地雖然有增長潛力,同時風險都較高,不宜持有過多。

你算年青,潛力股可佔約5成,餘下應用以下平穏增長股。若你投資經驗較淺,潛力股比重,要再調至3成以下。到你學到一定投資知識,才慢慢調高。

未來時間,你沽出分段匯控後,先清咭數。餘下資金除左入少少1177,0285,1810,其餘應投入平穏增長股,去令組合更平衡。

Q24055:

龔成你好!近日比亞廸電子跌左咁多,我平均价$31,未來這隻股升幅如何?

你有冇股票在富途牛牛,有傳中国政府打壓,有機會影響公司?到時我地股票在富途會否一夜無哂?我好驚喎,會唔會有咁嘅事呢?

龔成老師︰

佢早前的第三季業績比較弱,但長遠無問題。比亞迪電子(0285)這股正面的,佢是1211的子公司,主要從事製造及銷售手機部件、模組及其他產品、提供手機設計及組裝服務,以及提供其他電子產品的部件及組裝服務。

過往發展正面,有技術,前景不差。長遠睇好佢的。

未來升幅有幾多,無人會知。比亞迪電子(0285)有質素,你係唔洗太多意未來有多大升幅,只要一直持有就可以。

我自己無用富途,早前人行金融穩定局局長孫天琦表示,未在中國獲得許可的互聯網券商,如通過互聯網為中國客戶提供境外證券投資服務,屬於從事非法金融業務。

但富途本身係香港有證監會有註冊,故香港證券戶口客戶,相信不受影響。

就算政府真係要禁用,相信都會比足夠時間,比投資者轉移其資產,以免造成市場動盪。故一夜無晒的機會,我覺得唔高。

Q24056:

  1. 老師你好,請問1381粵豐環保是否比1257中國光大更有投資價值?

  2. 老師你好,問了很多關於股票的問題,今次想請教關於樓和車位的問題,假設有兩個單位(不考慮租金回報率),2房是不是比3房更容易租出去,

2房單位是不是比3房單位更有市場?更容易租出去

另外就是車位問題,車位因為不是每個人都需要,長遠黎講,升值潛力是否不大?

補充一下,假設車位月租是2千元每月,當租金升至4千,我覺得d用家可能情願賣左部車,改用交通工具,所以車位租金回報率將來應該唔會高得去邊,我諗法有無錯?

  1. 老師你好,請問3134南方太陽能質素如何?

龔成老師︰

  1. 粵豐環保(1381)和光大綠色(1257)都係有投資價值,但以現價水平和企業本質計,1257會高少少。

佢現價值博率係較高,再加上佢業務業務較多元化和有潛力,故投資值會略高。

不過,2間企業規模都唔算大,加上集團負債水平都偏高。另外,現時行業運作模式,長線是否能創造穏定盈利﹐都未算十分清楚。

故有一定不確定性,現價合理,但長線只宜小注。

  1. 假設質素、位置、租金等等客觀因素,都係一樣。2房,係會較3房易租出。因為3房一般都係4人或以上家庭用,相對需求量較少。

而2房用戶,由2人家庭到多人家庭,都適用,市場會較闊。

至於車位,以現價計,長遠升值潛力唔算大。而將來租金會否再大升和用家需求,要睇整體市場狀況,暫時唔見有太大機會,會出現較大升幅。

  1. 南方中證光伏(3134)之投資目標為追蹤中證光伏產業指數之表現,都有長線投資價值,但最近上左唔少,暫時唔建議大手買入。

你當小注慢慢收貨,可以的,這基金都有長線投資價值。

Q24057:

老師,想請問3718的PB值0.81,點解可以小於1,正常嗎?

龔成老師︰

北控城市資源(3718)市賬率0.81係無問題。一般而言,佢少於1係代表現價偏平。

但記住,市賬率(PB)只是一個輔助的平貴指標,佢只係用資產角度去計算。我地必需連同其他財務數據一齊分析,才可以好立體咁知道一間企業的質素和價值。

同時,企業估值有好多種方法,在我股票班都會教好多種,往往需要配合地使用。

北控城市資源(3718)這間企業有質素的。

佢主要在中國從事環境衛生服務;危險廢物處理業務;以及廢棄電器及電子產品處理業務。

環境衛生服務方面,佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始,佢有係北京的若干商住區域提供物業管理服務。

過往財務數據不差,有一定的增長力,有長線投資價值。現價係合理水平,可以分注入貨,並長線持有。

Q24058:

龔Sir如果想投资比特幣,狗狗幣果類!想用月供方式(約3000元)請問可以用何種平台,及那个幣較易撑握!求指交

龔成老師︰

這個我無特別去研究,但我知坊間有些交易所平台,係有月供加密貨幣服務,你可以上網睇下。

但緊記要找些信譽好和規模較大的交易所,除了考慮到信譽風險外(會唔會突然倒閉等)。如果個交易所規模細,每日交易量不多時。當你套現,個買賣差價可能會較大,影響你回報。

另外,虛擬貨幣以本質來說,這是人為創造出來的,絕對不是「資產」,有沒有真正的價值,如何定義真正的價值,未知。

這些人為創造的貨幣,因為關注度由很少變得大,價格會大升,但這背後是否有真正的支持,我不知道。只能說,投資這些貨幣,投機味好重,可能大賺,亦可能蝕到一文不值,因為,當中有沒有價格,我不知道。

但這不代表佢無價值,佢可能好勁,只是我自己不知佢好勁定好差。

佢長遠的價值,取決於「有多少人用」,即是說,雖然無真實價值,但可以有「交易價值」,如果長遠好多人用,的確可能有高價值。

因此,這些虛擬貨幣,由於我無法作出專業分析,所以,我不會投資。

但如果你分析到佢長遠的交易大,大家都持續關注,就有價值,就值得你投資。

我並沒有支持或反對投資虛擬貨幣,只能說,虛擬貨幣風險高,因此不建議大額投資。或者你可以用以下的心態投資,首先,你預期可能會大跌,心態上只用「閒錢」投資,就算不幸大跌對你都無影響,但你的要求回報一定是倍計,博虛擬貨幣有多倍計的升幅,絕不要升少少就賣。

另外,中央近期對加密貨幣都加強打壓,禁止相關交易活動。香港會否跟隨,還是未知之數,故你要明白會有這方面的風險。

Q24059:

想問埋小米現價應吾應該加注?

我手持1810,1800股,27.3買入

龔成老師︰

小米(1810)現價合理區中上部,係可以加注的水平。

不過,你現時持股當中,不少是科技類股份(1810,0799,3690,0700),你要審視翻有無過度集中的情況。

個別企業和行業,不要佔組合15%和30%以上,銀行業更加不要高於組合20%,否則會有過度集中性風險。(盈富由於係一籃子組合,故不受此限。)

在創建組合初期,組合金額較少,出現超標都係可以接受。但長線你要參照這指標,去維持組合的平衡性,才算理想。

另外,你持股都好集中係潛力股,上述科技股,都係屬於潛力股類別。佢地雖然有增長潛力,同時風險都較高,不宜持有過多。

若你偏年青,潛力股可佔約5成,餘下應用以下平穏增長股。若你投資經驗較淺,潛力股比重,要再調至3成以下。到你學到一定投資知識,才慢慢調高。

未來時間,你要從這2個方法,去調整一下你股票組合。

Q24060:

老師,謝謝你的回覆呀,其實依家的公屋size唔算大,所以一直都想居住環境好啲,才有以上的苦惱,諗住用盡quota用綠表換居屋,買間大啲,九成按,

再用儲起的錢(百多萬)買間細價樓放租,但唔知會否想易行難

另一方面,睇咗你facebook一段時間亦有跟隨你平日的建議,買咗平穩股及潛力股(約五十多萬)

其實我一路都好想報讀你的課程,可惜工作緣故(輪班工作)未能夾到時間,希望未來時間有機會讀到

龔成老師︰

你現時先買居屋自住,將來再買另一間物業放租,這個大方向係正確。

只要你買物業同時,可以保留一定優質股增值。同時,每月清還按揭後,都仲有一定資金去累積優質股,以能持組合的平衡性,咁就可以。

另外,你將來投資的收租單位,緊記唔好太細,最少要有300呎,合符一個家庭的基本生活要求。否則,你個單位的長線投資價值,會大打折扣。

其實我課程,有閒日班和星期六班。而且,會有補堂機制,你可以睇下配唔配合到你時間。