Q24241：
sir,你認為現時有幾絕望既程度？
龔成老師：
可以分析一般散戶，有幾多人對股市死心，比例愈多，程度即是愈高，長線投資者可以更大手入市。現時又未算好大，但有少少，現時以「悲觀」為主要狀態，未必好絕望。
Q24242：
你好，想問關於輝瑞，這股現時價位值得入手嗎？謝謝
龔成老師：
輝瑞公司 (PFE)絕對有質素，佢是一家全球研究型生物製藥公司。
集團主要從事醫療產品的發現、開發及生產業務，其全球產品組合包括藥品和疫苗。
最新的口服藥相信會有好廣泛的應用，長遠正面，亦反映企業的研發能力。
此股有一定投資價值，但礙於業務性質關係，盈利方面會較為波動。現價算合理水平，可分注或月供儲貨，並長線持有。
但由於業務上都有一定不確定性，令投資風險增加，故不宜太大注。
Q24243：
龔成老師：近排我買左1個單位$680萬（銀行估價$714萬），用作自住用途，因為自己無自住單位，所以見較市價平便買入作自住用途，已簽臨約，
並且在2022年6月會正式成交（因為業主有事，所以延遲到2022年6月才成交。）。
原本唔打算咁快買物業，因為有好多股票變左蟹貨，希望平手賣走股票才買物業，但睇了樓3年，難得遇到一個心儀單位，並且較市價平，所以當時衝動買入。
我有流動現金110萬，另加約140萬股票（大部份都蝕緊錢），由於我收入每月只有5萬，即使做按揭後，也需要在下年6月前全賣現時的股票才能夠錢買入單位和裝修。
股票情況如下：
03067 數量：13000 買入價:$15.64
02800 數量: 36500 買入價：$24.1
01024 數量：1000 買入價：$185
00341 數量： 16000 買入價：$15.92
我唔希望蝕賣股票，盡量想平手賣走，希望你能給一些建議比我。
龔成老師︰
如果係自住樓，適合你長線居住，再加上平過市價，其實都可以考慮。
香港樓市，中短期會有少少上落（但不會大跌），長遠會向上。
首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。
在長遠計，我仍相信樓市在長遠計，因供求關係，仍是向上多。
樓市始終需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。
另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。
當然，政府及中央現時有較大決心處理好樓市問題，我相信會令之後的供應增加（不是中短期，要長期才慢慢見到），因此，樓市不會大升，但相信都較難大跌（始終需求大）。
長遠計，樓價會平穩，有少少向上，但不是倍升，不會好似過往般倍升，而是平穩向上。
因此，香港樓作為自住的價值仍在，長遠樓價平穩及有少少向上。所以，如果跟市價有一定折讓，買自住樓係可以。
不過，你較大問題係，買完樓之後，股票要清倉。這樣會令整個財富組合，偏晒去物業個邊。所以，你未來有新資金，緊記要加大翻優質股佔比，令自己組合更平衡。
至於能否平手走，無人知。因為2年時間唔算長，中短期點都有波動。我建議你分段去沽出，唔好等用才一次過沽，因為無人知個時個價係點。
到你置業前1年，慢慢分段清貨，可以平衡價值波動風險。這個未必是可以令你贖回最多資金方法，但會是對你最穏當的方法。
Q24244：
龔大師你好呀。懇求你教路，1263柏能13.5入咗你點睇呀？可以長揸一段時間嗎？
2015理想汽車 118.7入咗 可在放下嗎？
仲有3067同0285想入貨 你點睇這兩隻？
另外你上次提及課堂我因工作時間關係收工要9點暫未可以配合，感謝！
龔成老師︰
栢能集團（1263）只要從持貨不過多，可長線，但佢係有風險，有回報的類別。
佢產品分類為三大類：圖像顯示卡、電子製造服務（ＥＭＳ）及其他電腦相關產品及零件。潛力度是有的，但風險都大，但如果產品持續有需求，以及行業持績有發展。
如果本身有貨，都可以長線的，但這股業務始終好波動。
理想汽車(2015)是中國新能源汽車製造商，業務主要是設計、研發、製造和銷售豪華智能電動汽車。
於2015年成立，2019年11月開始量產首款車型理想ONE(屬增程式電動汽車車型)，截至2021年7月31日，已交付逾72,000輛理想ONE。
集團有計劃在2022年推出全尺寸豪華智能增程式電動SUV，以及另外兩款增程式電動SUV車型。2023年起，預計每年至少推出兩款新的高壓純電動車型。
但現時集團只有單一車款理想ONE在銷，故收入完全取決於理想ONE的受歡迎程度。以2020年智能新能車在內地銷售額計，理想ONE排行第二，市佔為7.1%(新能源SUV車型計，市佔:9.7%)，算是不錯。
但畢竟集團只有理想ONE一款商業化車型，始終有集中性風險。
另外，集團成立至今，依然未有盈利，一直處於虧損階段。集團也明言，預計2021年淨虧損將繼續擴大，主要是由於投資未來車型的研發和自動駕駛解決方案；及生產設施以及銷售及服務網絡的擴張。
雖然這些資本開支用途正面，但長遠能否轉化成正現金流，郤是一個問號。
此企業有值得投資地方，但始終不確定和風險較高。由於未有盈利，要做一個穏當的估值，係較困難。只能說，投資係可以，但必需控制注碼，不要持有太多。
若你有一定貨量，可以現在沽少少，去平衡風險。但如果持貨不多，我建議你保留，作長線持有。
安碩恒生科技（3067）可長線。這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。
現價算合理區中至中上部，無貨可以入首注，或用月供長線去儲貨，然後就長線持有。
比亞迪電子（0285）質素不差的，有潛力。睇佢過往發展都正面，有技術，而前景都唔錯。現價算係中至中上部，無貨可以首注。
不過，你要留意一點，以你現時46歲年紀計，潛力股未必適合持有太多，最多佔你組合2-3成好了。上述都是潛力股，所以你要控制注碼。
我間中都會開星期六班的，通常一年開1、2次，星期六下午時間。
下次在2022年年頭。
你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。
Q24245：
先多謝之前的回覆。
- 屋企算對我幾好，一個月10k零用錢，可以享受好好的living standard。
仲大把錢剩，所以我自己就無需要用信用卡，有錢無地方用 先考慮股票
-
其實我好多野想慢慢同你講，撿了芝麻 掉了西瓜
-
呢兩間公司的股價其實證明到 生意唔係越多就越好。做得專長遠來講更能令股價爆得起，純做國內的航空線可以大幅減少經濟週期的影響
-
整體分析企業的方法 我希望到時和你講講
1810 應該係一個好好的買入機會
1810 終有一日會爆得起
身邊超多人學生用1810產品
龔成老師︰
-
若你每月有一定資金，我建議你用來投資，學下如何自己去做財富增值。
-
如果你有野想同我交流，可以係度PM我。
-
無錯，做得專係有利於盈利增長。但長遠，我地要考慮更多因素。這2隻股票我未仔細研究，但成個航空業發展，已經改變緊。相信未來相關股份，都唔會話太強，我建議不要持有該類股票太多。
-
小米(1810)業績較弱，相信中短期會較一般，其中一個原因是晶片等供應因素，但長遠會慢慢解決的。暫時未見對核心有明顯影響。現價在合理區中間。
長遠仍是有潛力的，佢的產品性價比高，相信在全球好多個國家都會有市場，佢長遠只會進一步增長。
同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。
這股可長線，現價合理區中間，分注可以，但唔好入得太急，預佢股價仍波動。
Q24246：
老師，我本身有投資收息股及潛力股，但係都1手兩手，如果投資潛力股，是否大手大手入貨(低價時)，回報會好d?
龔成老師︰
其實任何股票，都係在低價買入時，會較多回報。所以，在最低位入貨，增值效果一定係最好。
但問題是，我們無可能知道個低位係幾多，大概幾時會出現，無人會知。因此，我地入貨時候，會用分段策略。
在合理區或以下，才會開始入貨。在合理區較頂位置，會入好小注。回調愈多，每注入貨力度就愈大。用這樣模式去儲貨，會係較有利。
另外，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
因此，我地係做投資選項時，會睇翻你現時人生階段。假設你係年青至中年人士，應先做好增值，我一般建議用「平穏增長股」 + 「潛力股」作組合，去創造一個增值平台。
但如果你希望開頭穏陣D，或者你係年紀較大，你應該用「平穏增長股」 + 「收息股」的組合。
「潛力股」和「收息股」可以話係2個不同類別，建議你睇翻自已年紀和風險承受能力，去重新調配自己組合。
Q24247：
雖然老師講 當個個講放棄中資股時，可能係我地要貪婪嘅時候
但係解構唔到共同富裕，同埋大方向以所謂監管為主重點，幾令人擔心
其實even 基金 都對中港市場審慎
我地作為散戶，某程度都幾無可奈何。我絕對相信優質公司的長遠價值，我比較擔心國進（國企）民退（民企）、去資本化、不確定性
唔好意思，我個思想好矛盾
龔成老師︰
其實港股之中，依然有不少優質股票。恆指係弱左，但唔代表佢全無投資價值。
不過，中央政策風險的確高左，我地好難知往後走向。但我地可以嘗試了解中央政策，主要大方向。
現時所見，主要係希望提升生育率、減少大企業壟斷、訊息保護範疇。
因此，你見一些課後補習、大型科企、一些在美上市的公司，都受到影響。故這些股票，可能要暫時控制一下注碼。
其實，好多風險因素，我地都好難估，好難全面量化。因此，我地創建一個組合時，一定要平衡，包括不同行業的優質公司。
因為好少有問題﹐係會廣泛地影響所有企業。因此，你組合平衡做得好，已經可以避開左好多風險。
Q24248：
點解騰訊成日有壞消息，係咪唔應該再買佢
龔成老師︰
騰訊（0700）受政策因素影響，中短期弱，企業的賺錢能力會略減，以及企業估值都會略減。
不過，相信政府唔係想佢經營唔到，只係想加大規管，令佢賺錢減少。
此股依然有長線投資價值，但增長力唔會有以前咁強。現貨可以持有，但由於政策不確性都大，若你已有一定持資，暫時唔建議加注。
Q24249：
1: 老師，今次唔係請教投資問題，請教下另類問題，所以應該唔洗擺龔成問答
如果你住地方係12樓左右，但有班大媽成日係樓下球場播音樂播到鬼咁大聲，但你又買左果到，又鐘意住果到唔想搬，但每天又要一早起身上班，投訴管理處都冇用，
你會用咩方法解決
2：老師，想問小米你會用咩估值法，因為我見佢d數值唔太齊，用pe同ps都唔齊數，所以唔知點解佢低位出來
龔成老師︰
- 如果管理處唔理，你可以向所屬管理公司投訴，要求你屋苑的管理處作出跟進。或者，你直接向相關政府部門反應。
(根據《噪音管制條例》，該條例是由環境保護署及香港警務處共同執行。)
- 我都主要用翻PE去估，由於佢上市不久，我PE會用25-30倍，跟市場上有競爭力的企業相若。
之後再用這去數年平均EPS，個答案都加大少少，以反映其增值。
Q24250：
你好，我係股票班舊生，收到你美股「C公司」分析，先多謝。
美股我都有投資小量潛力股， TSLA, LCID(已賣) , PLTR, FVRR, PINS, 另外少少巴郡(當致敬股神)加QQQ,
不過潛力股都難分析，真係睇年報估計未來收入再discount (正如Tesla係要估計未來每間廠每個型號年產量再估盈利，真係數字差少少計出嚟都會差好遠，
見人計目標價USD1800-USD3000都有), 其實點樣減少計錯估值嘅機會？
龔成老師︰
你現時持有股票，都係有質素。但同是潛力股，故你現時組合，風險度有點過。建議你未來加入一些平穏增長股，去令組合回復平衡。
持股當中Palantir Technologies Inc (PLTR)、Fiverr International Ltd (FVRR)和Pinterest(PINS)會係較高風險，因為未曾做到轉虧為盈，也不知何時才可以有盈利，故不確定性大，不建議大注。
至於計算高增長股，估值係有點難。因為很多因素，係投資者主觀對集團未來看法。
我地只能盡力了解，佢現時財務結構、行業狀況等，去估算佢將來成事機會。用其他同業，去估值佢未來盈利增長空間。
同時間，因為佢不確定性高，好多估值都係建基於未來，所以我地投資要較保守，不要大注。