Q23931：
龔SIR你好，一直有看你的PAGE，希望在40歲前買樓, 以及透過股票每月達$5000回報再慢慢提升, 發覺我的投資組合有問題，想請教一下龔SIR,
12@1000股 $27.8
548@2000股 $6.7
932@120000股 $1.264
1337@23000股 $2.814
1928@800股 $27.45
9988@300股 $236.855
700@100股 $545.87
1177@1000股 $7.98
1810@400股 $26.5
2131@2000股 $7.8
1731@12000股 $1.54
以上是持有的股票,好多亦好分散,本想積累財富, 但就是一直虧損, 我應該如何配置?應該如何糾正?
感謝龔SIR
龔成老師︰
首先你要明白，我地投資一隻股票，背後其實係投資緊一間企業。就算再優質公司，都要時間成長，所以投資會係長線。
你唔好預佢每個月一定有回報，就算係再優質股票，中間多數都會係上上落落，但只要有質素，長線會有一個唔錯的回報。
你持股的確有點多，最好控制在10隻以內。
你現時虧損，其中一個原因，係你買入價普遍都有少少貴。不過，現時市場氣氛較弱，所以出現虧損係正常。
而你組合最大問題，反而係個平衡性。你而家太偏重左係潛力股(1337,9988,0700,1177,1810,2131)，佢地雖然有增長潛力，同時風險都較高，不宜持有過多。
若你係偏年青，潛力股可佔約5成，餘下應用以下平穏增長股。若你投資經驗較淺或較近中年，潛力股比重，要再調至3成以下。到你學到一定投資知識，才慢慢調高。
未來時間，你就要加大翻平穏增長股部份，令組合更平衡。
另外，你持股當中，好多都係科技股類。記住，個別行業佔組合比重，不要高於30%，否則會有過度集中性風險。
持股中，云想科技(2131)、雷蛇(1337)不確定性較大，長線不要持有太多。
其利工業集團(1731) 質素較弱，都不宜太大注。
順騰國際控股（0932）主要於香港及中國內地從事銷售、推銷及分銷保健產品以及美容補品及產品、提供線上廣告代理業務、線上支付業務、電子商務推廣業務及遊戲發行業務。
企業規模細，無獨特優勢，加上生意無增長，多年都處虧損狀態，無投資價值，建議沽出。
Q23932：
-
老師，想請問賭業股，為何加入了政府人員，賺錢能力會減低左？
-
老師，想請問金沙的估值，我用EV/EBITDA 計不了，因為他的EBITDA實在太低..
如果我看好他的企業價值，那我可以假設他在續牌事件和肺炎事件過去後，能以回到2017/2018 年的業績水平去計算他的估值嗎？
因為金沙恐慌性跌了很多，雖然我知道銀娛在質素上可能比金沙優勝（極低負債），但因為投資是用低價買優質企業，所以我反而想買金沙。
所以老師我想問，金沙現在市值1262億，銀娛是1703億，我能否以此作一個初步的估值標準，去衡量他們的平貴？（我已用老師的企業分析表分析了他們的質素，我已確定他們是優質企業，而且不評論負債的話，賺錢能力大家是不相伯仲的）
龔成老師︰
-
其實你睇翻中央架政策大方向，係唔希望D有壟斷性的大型企業，過份賺錢。所以，佢派政府人員入去，好大機會就係想睇下佢地，到底有幾賺錢，同埋一些較灰色地帶的賺錢方法，因此，要從中作出調整建議。
-
如果你要計EV/EBITDA，你用翻2016-19年一些較正常年份平均數去計。
另外，唔好單以市值高低，去進行估算，個參考價值唔高。
現時以估值計﹐金沙(1928)值博率係比銀娛(0027)高，不過因為賭牌問題，佢不確定性都比銀娛大，故現價水平較低，係原因的。
我唔建議用2017/18年去估值，因為政府發展方向，未來重心會係綜合度假村，即係較賺錢的博彩部份發展，好大機會會慢左落黎。
再加上中央政策風險，和內地經濟己由增長，開始慢慢轉向平穏，都係不利行業發展。
雖然博彩相對其他行業，依然算係好賺錢。但不確定性和客觀環觀改變，我地暫時估值最好保守少少，現價大約係合理區中下部。
之後，我地再觀察行業發展和續牌情況，才決定要不要再修正。
Q23933：
你好，本人31歲，自僱有一間小型貿易公司，收入不穩定。現金流1M，有一梅窩物業市值4.5-5M，餘下1.9M物業按揭未還，和以下股票。
2007、3383、3988、869
請問以上股票，特別是國內物業股票，是否應止蝕？另有什麼比較穩定股票可買入並提供5-8% 資金收入？
本人男友希望今/明年可結婚。男友於英國有一物業，市值5.5M （餘下2.5M物業按揭未還）。男友手上有現金 3M。專業人士月入150K。
男友是英國人，年齡比較中。希望可改變生活方式改為自僱，正尋求生意機會。或希望可單靠投資有被動收入. 現英國物業收租1600鎊
我們希望可以結婚後有小朋友。所以擔心如自僱會因收入不穩定性不能比小朋友最好既生活。
請問我們二人的現金，會否投資第三個物業或其他投資比較好？因英國稅務考慮比較多。會否有建議投資那一個國家？
生們有意居住於VIETNAME/THAILAND/INDONESIA，把香港和兩英國個單位出租，減去MORTGAGE還款後會有10K收入可用於生活支出。再做一些小生意，以達到BALANCE OF LIFE。
請問是否可行？
龔成老師︰
碧桂園（2007）和雅居樂（3383）業務上質素中等，但由於負債偏高，令佢地有一定風險。
不過你只係有一手，你照持有都可以，但唔建議再加注。
反而係彩星玩具(0869)質素較弱，建議慢慢換成其他優質股會較好。
至於長線投資計劃，你睇翻你地生活目標而定。若你們中短期內會結婚，之後搬到VIETNAME/THAILAND/INDONESIA居住，這樣你們手上物業，就可以從投資角度(非自住)去考慮。
英國物業放租，雖然受當地高稅率影響，令回報被蠶食。但整體而言，回報都做到有近5%，算係可以接受。
反觀香港現時租金回報率不高，相對投資價值較細。不過香港買賣物業成本唔輕，除非佢質素好差，否則我比較建議你持有收租，會較好。
而新資金，你就應該投入股市，因為你已有2個物業，再增持物業類，你個財富組合就會偏晒係物業個邊，唔係咁理想。
我簡單D，以你希望每月有1萬蚊現金流去估算。以股息率6%計，你需要本金200萬。
由於你現時未儲到這筆資金，建議你先用每月儲蓄和現有資金，透過買入一些有增長力的優質股(而非收息股)，去累積這筆財富。
策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
現時大市只是合理區，你現有100萬資金可以先投入30-40萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。
不過這個月供增值方法，你預要維持最少3-5年，才會有理想效果。因為中短期股價好波動，只有長線股價才會有效反映企業質素，因此你預要持有較長時間，才可以達至理想增值效果。
另外，由於你自己有一盤生意，這100萬資金緊記要優先預留生意周轉部份。
Q23934：
龔成你好，我啱啱係Facebook 到見到你之前有個post 講老千股08297，我自己中左招
想問下依家可以點處理
應該放左佢，定係揸住先
龔成老師︰
海納星空－二千五(8297)主要從事設計、開發、生產及銷售自有品牌女性內衣產品。
這企業多年有虧損，更多次出現核數師"修定報告"和"不表示意見"，代表企業盤數好大機會係有問題。
這股無投資價值，建議你盡快沽出。
你要記住，無質素的股票，係無得守。唔好諗進等一陣，返到買入價才沽，咁係好危險。馬上沽出，才是最合適方法。
Q23935：
阿Sir, 19年上完你堂, 本身都持有唔少優質股打算長keep, 但因為年頭個市好, 又抽新股又剩~ 加上其他朋友影響, 開始左短炒, 有D蝕左依家開始理智番, 溫番書重新部署~
不過因為之前聽人講都有D蟹左貨, 想問番阿SIr, 以下呢幾隻股(之前想短炒)應唔應該繼續持有, 定要走左再轉番其他優質股長線~
- 2018 瑞聲科技 $36
- 817 金茂 $3
- 3306 江南布衣 $13.6
- 914 海螺水泥 $42 謝謝阿Sir
龔成老師︰
我都明白，有時好難一下子改變好多人短炒想法，特別係整個市場氣氛，都係以短炒為主。
但你要明白，自己點解要買這些股票，係為左賺差價，定係為左享受佢地長線成長，所帶來的財富增值好處。
好多人會覺得，自己有方法，可以掌握到短線波動，去賺大錢。但實際上中短期價格波動，可影響因素實作太多，有些甚至跟企業本身無關，好難估。
反而，你長線持有一間有質素企業，佢價值一定會在長線股價中反映出來，成件事就實在好多。所以，你要吸取教訓，往後以長線持有優質股為目標。
你現時持的股票，都有質素。若你是年青至中年人士，這些股票都可長線持有。
但留意中國金茂（0817）主要是在內地從事城市及物業開發、商務租賃、零售商業運營、酒店經營，以及金融與服務。
業務質素算中等，而且負債始終較高，都是企業風險所在。
此股有長線投資價值，但由於風險因素，唔建議太大注。
Q23936：
你好，上星期有買過你既書。啱啱學投資股票 今年22歲 諗住入下啲收息股 但我爸爸反對 覺得我應該買番啲波動大啲既股 什至炒股
但我股票知識沒有很深 只知道基本買賣和留意財經新聞 能否為我指點一二
龔成老師︰
初學投資，已經懂得先看書和相關資訊，係一個正確的開始。
記住，我地投資就係等同做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。
你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。
你要分析你的投資目標，你想潛力股的比例多少？平穩股的比例多少？組合風險程度如果？即是你想設計一個怎樣的投資組合？長期、優質、平衡、適合你。
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時22歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。
由於你現時無投資知識和經驗，對企業估值，點去定平貴未必會太了解。建議你先利用月供模式，去做增值，可以減低買貴貨風險，對你而言會較理想。
策略上，你唔應該投資收息股，因為佢增長力太弱。但都唔係投資波動大的股票，甚至去炒股。
因為我地投資股票，係希望買入一些優質企業，透過佢自然增長，達至財富增值目的。
重點係長線持有優質股﹐唔係去做短炒，因為中短期走勢無人知。但長線持有，企業質素一定會反映在股價當中。
以你年紀，應用較有增長力的「平穏增長股」和「潛力股」，去作為長線增值目標。每月5成儲蓄做月供。其餘先儲起，用一邊月供一邊儲蓄的策略。
你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
到你有一定投資知識﹐潛力股比重可以相應調高，佔組合約3-5成，視乎你當時投資知識多寡和了解這些股票程度而定。
餘下的另一半現金，我地就等機會，當大市出現較大回調，就加大力度掃貨，然後作長線投資。
同時間，你要去多讀投資相關書本、年報，新聞和課程。
書本上，你可以睇我寫架"80後百萬富翁"、"財務自由行"和"股票勝經"，會較為適合初學者。
另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
Q23937：
你好呀龔成。我有問題想請教，唔知現狀點再向前行好，又唔識點計條數。
本人現年46歲，今年剛上車買咗樓，每月供$26000，全家開支連供樓約$55000左右，本來做零售廿幾年，舊年因大市走勢唔理想決定唔再做落去，
現時家庭收入都係剛剛好夠每月應付開支，有現金$280萬左右放在銀行收到每月$6000利息，想搵啲投資但又唔識點投好，揸住2佰幾萬人都好冇安全感，
可以指教一下應向邊個方向行好
龔成老師︰
放係銀行，利息好低，從財富增值角度係不理想。
你現時情況，由於你財富組合中已有物業，這280萬資金可以用來買一些優質股，去為你財富進行增值。
但由於你只係收支平衡，在投資前，要先預留起最少半年開支，作應急之用，會較為穏當。
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後
可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
你46歲，投資目標都會係做增值，但就會保守翻少少。建議你集中用「平穏增長股」作組合，去創造一個增值平台。
大市現處於合理水平，那2XX萬資金(扣除應急錢後)，你可以先用50-60萬，以"分注"形式慢慢入貨。餘下資金，就等大市有明顯回調，才慢慢加大力度入貨，並長線投資。
Q23938：
857邊個位可買，唔該。
龔成老師：
中石油（0857）雖然質素都算有，但不是最高質類別，佢對油價較為敏感。
雖然佢都有一定的規模，但卻不是最高質素的企業，這是由於佢的產品自主力較弱。
石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。
由於質素中等，唔建議大注投資，現時的油價會因經濟好轉而向上，特別是冬季，如果你想投資，可以考慮現價小注，之後再跌翻1成再加，但都不建議合共投入太多。
Q23939：
請問2131雲想科技質素如何？
龔成老師：
雲想科技（2131）業務都有發展。
佢係中國的短視頻營銷解決方案供應商，以及集中於泛娛樂的線上內容服務供應商。
如果按短視頻廣告所產生的總賬單計算，們為中國第三大線上營銷解決方案供應商，市場份額為3.4%。佢亦有透過其花邊網站及其移動端統稱「花邊平台」運營一個泛娛樂內容平台，向互聯網用戶展示引人注目的泛娛樂文章及照片。
睇翻佢營運模式，佢主要通過向廣告主及廣告代理提供線上營銷解決方案，包括用戶流量獲取、廣告素材製作及廣告效果優化；及花邊平台向廣告聯盟及廣告主提供的廣告位產生收入。
佢與多家網路平台維持良好的關係，包括中國六大短視頻平台，例如抖音、快手、西瓜視頻、抖音火山版及騰訊微視，以及其他領先的內容分發平台，包括小紅書及趣頭條。
佢客戶主要包括廣告主及廣告代理，以及第三累計方廣告聯盟及廣告主。
過往的生意與盈利增長快速發展正面，長遠相信有發展，不過估值都唔平。
另外，這股業務變化較大，佢可能發展得好勁，但如果出現一些行業的不利情況，佢可能變到好差。因此本身風險較高。
佢是有風險，有潛力的類別，這類股不是不可投資，但要明白股價波動，同時小注投資好了。
Q23940：
請問老師怎看1337雷蛇？最近元宇宙的概念很熱，長遠有利雷蛇嗎？
龔成老師：
雷蛇（1337）有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。佢會有少少受元宇宙而正面。
同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。
另外，佢近年都有發展一些新興業務，潛力度有的，但仍左有不確定性。
因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。