地產建設商會昨天發聯署聲明，強烈譴責暴力行為，大孖沙精銳盡出，總共有17間公司參與聯署，全是本港主要發展商，當中包括四大家族及兩間英資公司太古及置地，原因係乜大家都明喇，不再花唇舌解釋，今日篇文，就幫佢哋回顧吓表現。

青冰整咗個股價表現圖，對比13間在港上市而又有聯署的發展商，有興趣的戰友請上青冰的專頁睇吓。用6月11日收市價作比較，顯而易見，反修例抗爭的確對佢哋有頗大影響，只得恆隆(0101)係上升4%，之後排第二是跌7.5%的恆地(0012)，其餘的全部跌雙位數，最弱的是新世界(0017)，跌20.9%，而理應最受影響的風眼股新地(0016)，只跌11.5%，係排第四名。

若要理智客觀的分析，當然要睇吓公司在香港的業務比重，愈高就愈受害，仲有嘅係，13間上市公司，都唔係每間只有地產及收租業務的，例如跌得最甘的新世界，有巴士有建築有飛機租賃有酒店有百貨，看似好分散，但無助股價表現。

而2019年的表現，仍有7間公司錄得升幅，最勁的都係恆隆，累升23.9%，最曳嘅係麗展(0488)，累跌21.3%。如果用52周高位作比較，除了恆隆跌9.8%之外，從高位跌兩成係基本，用鬼佬的定義，已進入熊市喇，而由高位插得最深的，又係新世界；距52周低位少於5%的公司有5間，即係話近期貼近新低，而距底最近的，又是新世界，只有1%距離，梗係啦，星期三先創咗新低。

新世界的市賬率在一線發展商中，長期落後，這個情況在近兩年有改善，應該是拜第三代掌門人鄭志剛所賜，佢近年有好多搞作，多到可以寫多幾百字，帶給市場新氣象，你睇瑰麗酒店開幕後的宣傳幾勁，搵齊N個名人試玩試住，然後在個人專頁輕輕一推，好過掟幾千萬賣廣告啦，證明鄭志剛深明新世代應該點玩，而近年同政府亦行得好埋，準備興建的啟德體育園都係新世界的，既然咁friend，當個friend出事，自己難免受累吧。

大家睇過今星期咁多方的記者會，應該都感覺得到，件事係唔會咁快可以解決，持久戰難免，講咗咁多年的地產霸權，加息唔怕、加印花稅都唔怕，因為買樓是香港人的信仰嘛，萬萬想不到，真正的考驗，源自修例，不過，係青冰想不到啫，可能誠哥早已預計到呢。

Fb個人專頁 http://www.fb.com/chingbing888