Q24351：

你好，龔成老師，第一次私信你，但其實一直都有留意你嘅fb 動態，好欣賞你的投資模式和心得。早係幾年前，我已經買左你本50穩健收息股學習。

今次係想問下你如果本金10萬，可以點組合自己的股票組合呢？我想揀啲依家低股值，會平穩增長嘅股票。呢2年自己買股票，我都交左啲學費，細價股，大價股，牛熊都買過，

但最後都係輸多贏少。見到呢排港股都去到好低位，想睇下可唔可以再入市。

我手頭上有隻6618，蝕左65%但都未放，請問走唔走好？

最近留意到天然氣方面的市場，因為不同的政策，之後可能有幾好嘅發展，請問384值唔值得入同長線投資呢？

希望可以收到你嘅回覆，謝謝你！

仲想買埋對於2600的睇法，感謝。

龔成老師︰

你要明白我地投資股票，就係等同投資在一間企業，希望佢未來自然成長，以達至財富增值的目的。

因此，投資係一個長線計劃，講緊未來3-5年，甚至更長時間。所以，你唔好太在意佢短期表現，只要佢有長線投資價值，你一直持有就可以。

中短期可能會有波動，但長線企業價值，一定會反映在股價上。

以往你用牛熊證這類衍生工具的投資方法，就不要再用，好難玩，這是經驗之談。

由京東(9618)分折出來京東健康(6618)其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但要做估值好困難，佢未有盈利之餘，不確定性都大，但市值郤去到2000億以上。

只能說，而價計依然唔平。若你只是小注，可以守。

中國燃氣(0384)都有質素，但今年佢都比較多業務上意外，長線不知會否影響佢未來業務發展。現價合理，但暫時不宜太大注。

中國鋁業(2600)質素唔算好高，始終係商品類股份，定價能力弱。不建議投資太多。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現時大市只係合理水平，10萬可以用一半去入貨。餘下資金，就等大跌市出現，才加大力度掃貨。

Q24352：

老師你好，本人47 歲剛失業, 兩個小孩一歲, 現金500萬，欠銀行樓按500萬,開支每月十萬，老公收入6萬，該如何配置低風險現金流,預計我永遠失業,謝謝

龔成老師︰

你現時情況，坦白講有點尷尬。

因為你預期永遠失業，一般我會建議將你本金，轉換成收息股，去支援你往後生活。但我以股息率6%計，每月都只係2.5萬的現金流，加上你先生的收入，依然係入不敷支。

我比2個方向選擇，你睇下邊個會係較適合你。

第一，買收息股，再想方法下調你支出，或/和找個兼職，填補收入與支出的空位。

長線透過股息，支援你大部份開支，並調整開支和收入，以達至長線收支平衡。

第二，買平穏增長股，再想方法下調你支出，或/和找個兼職，填補收入與支出的空位。

這個方法，可以令你財富得以升值。到累積到一定金額，才轉換至收息股。到時收息股的現金流，就足以支援你全部開支，你就不需要額外工作。

現時大市只在合理區，資金唔好盡用。你可以先用80-100萬，去分段咁慢慢儲貨。餘下部份，就等大市再有回調，才分段加注，並長線持有。

Q24353：

龔sir，你好，我想請教你意見，（2380）6.36元買入，（697）5.55元買入，(487)0.59元買入，呢3隻股持有10年左右一直虧，應該止蝕還是繼續持有好？

謝謝你解答

龔成老師：

中國電力（2380）有得守，佢轉型中。而佢本身業務不差的，近年有發展新能源，帶動業務增長。

佢主要在中國開發、建設、擁有、經營及管理發電廠。過往業務都有增長，不過盈利有少少波動，主要受成本及定價因素影響。

近年有發展風能及太陽能業務，成果不差，帶動企業增長，現價合理，都有長期持有的價值，不過不是好高增長類，是平穩增長型。

首程（0697）只是不過不失，上翻多少少可考慮轉其他。

實德環球（0487）主要從事銷售機票及提供旅遊相關業務，以及物業投資業務。

過往業務十分波動，有業務不穩的情況，同時規模唔算大，久唔久會出現虧損，財務數據亦不太好。加上市場競爭大，佢無乜優勢，長遠發展力不強。投資價值不算高。建議減持或全部賣出。

Q24354：

老師，我一直有個迷思，年報會唔會造假、誇大、畫蛇添足、冇果樣整果樣，來欺騙投資者？

龔成老師：

會，所以投資者會睇核數師意見，以及睇現金流量表，以增加可信度，當然，都不是100%無事的。

Q24355：

龔Sir, 您好。想請教在工行和建行選一收息股，會建議購入邊隻？或者有其他推薦收息股？謝謝

龔成老師：

比起持有一隻收息股，我反而建議你建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

Q24356：

老師你好，首先想多謝你在初班上對投資理財的啟發同教導!

最近感到有些煩惱,我成日好想了解一下,其實點解市面上出現咁多種短炒工具,期權 窩輪 桿杆 等等的投資方法,雖然我唔係好清楚所有玩法,都是感覺很複雜的投資方法

知道大家的方法可以不同,但我成日聽大家討論時大家都好似知道明白-長線持有優質股票的價值投資喺長遠黎講係比較好的投資方法。

點解好多人仍然要選擇以上非長線的投資方法？係咪就單純為左搵快錢？

但係根據你過往分析(雖然我沒有把所有都看過),或者好似巴菲特等等巨人的分析,如果不做長遠投資,最終其實都未必會理想。

就你今天剛發表的文章其實都已經說明了. 係咪即係好似食快餐同食健康餐咁？兩種都會飽肚,爭在大家的身體健康程度？

心態上如果想成為目標長線既人其實仲應該點樣可以取平衡？因為我成日聽到周圍的人討論,上網又有好多意見,大家有好多道理,又會講升跌,講點賺點蝕,講點炒等等,當然我亦知道大家有佢地自己不同想法,但就硬係有啲唔明白點解,唔明點解大家唔直接去做長線投資,大家好似明白好多大道理,但係佢地玩緊短炒。

身邊有好幾個人講一套做一套,最近我聽到有點沮喪。好似走唔出去咁,可能想有搵d鼓勵,又想搵下d同聲同氣的人分享下。其實定還是我可以簡單啲,自己設定目標就去追,唔需要諗咁多野？

但係我又想多d同人討論獲長多點參考及知識,究竟點樣可以喺「對立面」上更進一步強大自己心態？我知道投資時的心態重要,但我總是想不通以上種種外界因素.

唔好意思我講得有d 1舊舊.唔知你明唔明我想表達的困擾？老師會唔會都keep住同不同人或在網上的commuinty討論採納意見？ 算唔算其中一種方法去強大自己？謝謝老師

龔成老師：

簡單咁講，這些衍生工具，本質係比投資者對沖風險。但現時市場普遍投資者，都只會視之為估走勢的投資工具。估中走勢，就比買正股賺得多，估錯，就都會賠大損失。

我地做投資決定，唔係靠睇走勢，咁係好危險。因為我地買緊係一間企業，你要知道的應該是其質素、行業前景、財務數據等，去分析佢有無投資價值。

之後，再透過估值，去了解佢現時平貴度，從而制定投資策略。所以，你唔好用這些工具，係好危險。

你首先要明白，點解我地投資要長線。因為中短期會有好多因素影響股價，而這些因素，好多都同企業本質無關，係無得估。

但長線的話，企業價值必然會反映在價格之上，所以長線持有優質股，會係最好做法。

而坊間好多投資者，依然停留係賺差錢的想法，所以只想短時間持有，去賺個升跌，而不懂從長遠角度去考慮。

你可能身邊有好多朋友，各有不同講法。但你想學一件，正常都會跟最成功的人，去到學習。

而係投資範疇做得最好，就係股神巴菲特，佢都只會用長線策略，唔會短炒。所以，你要學習用長線持有優質資產的眼光，去對待投資這件事，會對你最好。

另外，就算你同朋友想法不同，我都建議你多作理性討論，可以吸收新知識之餘，有時都可以幫自己反思問題，是有價值的。

Q24357：

龔先生您好，本人現正人生交叉點，好希望得到你中肯意見，萬分感謝。

本人跟丈夫剛到中年50歲，丈夫在2019疫情爆發時開始失業，本人月入大約有5萬圓。由於早年積極工作及有買樓投資，現有資產如下:-

資產:

自住樓，市值約1,600萬，現正出租，租金為$27.500 (200萬按揭)

投資樓，市值約450萬，現正出租，租金為$9.100 (無按揭)

投資樓，市值約520萬，現正出租，租金為$9.900 (120萬按揭)

股票約100萬 (港交所, 長江, 長實, 信置, 中移動, 平安, 工商, 另一些坐貨)

人民幣15萬

港圓現金約140萬 (都存在mortgage link)

每月支出:

現在居所租金 $31,000

供樓: 約$13,000

差餉管理費: 約$7,000

兩孩子，中六及中三讀書活動開支$6,000

保險供款$10,000

生活開支約$15,000

因工作壓力問題，本人身體開始出現毛病，想打算退休。敢問我有資格考慮退休嗎? 我們應該怎樣配置我們現有的資產以支持我們的日常開銷?

十分希望龔先生可以給予意見! 祝龔先生身體安康，生活愉快!再次多謝感激你寶貴意見及時間!

龔成老師：

睇翻你現時生活開支，每月大約8.2萬元。扣除你每月租金收入，大約每月最少要3.5萬，才足夠生活。

我以股息率6%計，你需要700萬本金，才可以足夠產出每月3.5萬現金流。以你現時狀況，明顯是資金不足。

不過，你現時有3個物業，可塑性好高。你現時支出中，租金佔比重最大。如果可以係這裡調整到，成件事會易好多。

例如，你賣出現時自住樓，再買另一間較細的作自住。除了節省租金成本外，也能釋出更多資金，去支援你退休生活。你可以從這3個物業配置上諗下，點樣可以減少開支，甚至釋出額外退休資金，去支援你的退休計劃。

當你有足夠資金，以達至退休收支平衡。你就可以"分注"買入以下收息股，並長線持有。

同時間，你都可以買一些A級債券、年金、銀行定息計劃等等，去令你現金流組合，更多元化。

收息股組合，你可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

至於你提到名字的持股，都係有質素，只要唔係太偏重左某一隻，咁就無問題。而人民幣不是一個理想增值工具，如無實際用途，建議換回港元去做投資。

而140萬現金，你可以等大市再回調，就慢慢加注落D收息股，去累積你這個退休組合。

Q24358：

龔老師你好，本人31歲，收入好有限，每月只可以月供股票HKD3000，想更好利用呢小小錢。目前持股如下：

港股

02638⋯⋯244股

00002⋯⋯91股

00003⋯⋯1178股

00006⋯⋯1494股

02800⋯⋯228股

美股

BKCH⋯⋯6股

現在HKD3000月供 02638、00066、BKCH 各HKD1000。

應該作怎樣的調整？

龔成老師︰

現時你持有的股票，都是有質素的，質素方面係無問題，只是在配置上，怎樣優化整合，去令成個組合更適合你個人情況。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主。港燈(2638)、中電(0002)、電能(0006)都係以收息為主，增長力不明顯，唔適合你這個年紀。建議你沽出部份，換碼至較有增長力股票。

未來時間，建議你用「平穏增長股」 + 「潛力股」作組合，去創造一個增值平台。BKCH係可以，其餘2隻建議換成以下平穏增長股。

另外，現時大市只在合理區，每月最好都額外留少少錢，等大跌市出現時，你可以用來掃貨，然後長線投資。

Q24359：

龔sir，你好，我係fb都有關注你既，見你推戈隻3067呢我都有貨。最近見戈隻7226好似同3067都一樣。佢哋係咪都係同一性質？

龔成老師︰

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區中上部，可以分注或月供儲貨。

而ＸＬ二南方恒科（7226），同樣是追蹤恒生科技指數，但佢目標係以每日表現兩倍（２ｘ）的投資業績。即係恒生科技指數升1%，佢會升2%。

當然，如果恒生科技指數係倒跌1%，你的損失都會被倍大，變成跌2%。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

Q24360：

請问現時股市24000 楼下, 有什么長遠退休收息股值得買入？941 中移动 有7厘多, 值得買入嗎？

龔成老師︰

中國移動(0941)都是一個合適收息選擇，現價合理，已經可以首注。

以下是其他較優質的收息股，現價都合理區，你可以參考一下。

收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、富豪產業（1881）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

不過，現時大市只在合理區，資金唔好盡用，最好保留3-5成。等大市有進一步回調，才再加大力度入市，並長線持有。