華富財經 Quamnet.com Logo
龔成
2021-12-15 15:00:12
【龔成問答信箱】(Q23861-Q23870)

Q23861:

龔 Sir, 年頭時港股全民皆股,睇住周圍d人係咁入市,當然我無跟入,反而喺依排個別板塊大跌下,我想入市。

相反,依排到美股,身邊嘅人去曬玩美股,我本身都有興趣買 VOO, QQQ, Tesla 等股,但睇到佢哋咁狂熱我又止步

Sir, 你點睇美股呀?我點部署呢?

龔成老師︰

未來10年,相信中國和美國都會係最大的經濟體,所以美股都有投資價。

我相信,你最好的策略是平衡配置,港股美股,從來不是對立,而是配合的,配合可以將風險度有效減少。

但當一隻有質素的股票,升到一個好貴架價錢,其實仲唔仲值得投資,美股現時,的確唔平,但長遠,亦應該佔組合一些比例。

我地做財富增值,除左嚴選優質股外,估值都係好重要。如果你用一個貴的價錢,買入一隻優質股,長線回報都可以不理想,因此,以美股現時的平貴度,值博率只是一般。

若你好想投資,你可以買VOO, QQQ這類ETF。現價算係合理區頂,至略貴,無貨可以先小注。之後等有明顯回調,才正式分注入貨。

Q23862:

你好龔成先生,我36歲想問一問你意見,本人一家四口,有層物業欠170萬,平均6萬左右一個月,每個月能剩3萬左右,有大約120萬股票,

50萬現金,應買股票收息好,還是買多個單位出租比較好,謝謝你的意見

龔成老師︰

以你現時情況,我暫時唔建議再買物業類資產。

因為,現時香港整體租金回報率不高,值博率不如優質股。而且,你本身已有一個物業,再買入多一個物業,就會令成個財富組合,過於偏重物業類資產,造成過度集中性風險。

所以,你現有和新資金,應先用優質股去增值會較好。

我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。

你36歲,應以增值為主,先去累積一筆資產,而唔係去收息。

選股上,建議你用「平穏增長股」 + 「潛力股」作組合,去創造一個增值平台。

現在你每月先用5成儲蓄,即$15000做月供。其餘先儲起,用一邊月供一邊儲蓄的策略。

如果你現時無太多投資經驗和知識,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。

若你有一定投資知識﹐潛力股比重可以相應調高,佔組合約3-5成,視乎你投資知識多寡和了解這些股票程度而定。

大市現處於合理水平,那50萬資金和每月儲蓄,就等大跌市機會出現,才大力度掃貨,並長線投資。

Q23863:

老師

2238 同3883有質素嗎?

龔成老師:

廣汽集團(2238)本身都有質素的。

佢係中國汽車製造商之一,主要業務包括製造及銷售乘用車、商用車、發動機及汽車零部件,亦從事一系列汽車相關服務及其他業務。

佢透過共同控制實體廣汽豐田及廣汽本田生產多個系列的乘用車。

業務發展不過不失,但增長力就不算強。

長遠仍有發展,但不是高增長型。現價合理。

中國奧園(3883)主要於中國從事物業發展及物業投資業務,近年增長快速,這是受中國樓市保持向好的情況帶動,加上佢利用大量負債運作,當好景時,佢就會好好賺。

但佢的負債有點多,有危有機,好景時好好賺,但逆景時,就幾大件事。

所以,這類股不是無前景,但風險較高,唔算好建議大注。

Q23864:

龔Sir你好,睇咗你個page幾年,都獲益唔少,之前無聽你講, 聽咗前男友講買重咗0005,蝕咗一大筆,仲未回到家鄉,買樓時借咗前男友10萬,

因為分手都賣埋還錢俾佢,之前同佢一齊草落筆錢都因為分咗手佢拎返晒走,依家全部儲蓄為0,好彷徨,想你指點下,想短期內累積返一筆錢,唔使咁彷徨

個人資料是今年3X歲,月入45k左右,有一層市值800萬物業,每月供款約25k,還有25年要還,每月除供樓外,目前用10k償還之前借款

(買樓時問朋友借了15萬,差兩個月就還完,之後會變成每月儲蓄)3k給父母作家用,自己只有7k作日常消費

依家想把將來儲蓄中的5k作投資,但唔知買咩好,始終資金需要重新累積,還是應該先累積一定數量資金後再出擊?應該怎樣分佈好?

希望龔Sir可以打救下我

龔成老師︰

人生中難免會有一些令自己彷徨和失算的事,但我地要做,就係先冷靜好自己,以免做出不理智的決定。

投資係一個長線計劃,就算再好的股票,中短期都會有波動,所以你唔好寄望投資,可以係短期內令你財富有明顯改變。

你現時情況,其實唔算很壞,因為你還很年青,又無太多負債。只要認真計劃未來投資方向,依然係可以做到唔錯效果。

至於投資方法,你唔洗等累積一筆大本金,才開始計畫。你可以用每月儲蓄,去做月供股票,開始一步步去累積你的財富。

我建議你現時,已經可以開始,慢慢累積翻財富。

策略上,你可以投資「平穏增長股」和「潛力股」。你每月5成儲蓄做月供。其餘先儲起,用一邊月供一邊儲蓄的策略。

但我相信你現時無太多投資經驗和知識,潛力股這類風險較高的股票,建議你就不要持有過多,最多維持2-3成好了。甚至再保守D,可以先集中係平穏增長股類。

到你學會一定投資知識和經驗﹐才將潛力股比重調高,去到佔組合約3-5成,視乎你當時投資知識多寡和了解這些股票程度而定。

餘下的另一半現金,我地就等機會,當大市出現較大回調,就加大力度掃貨,然後作長線投資。

同時間,你要努力去增進投資知識,令財富增值這件事,可以由你自己去主宰。最終目標,係你可以有獨立分析能力,為自己投資作決定。

有時間,你就要去多讀投資相關書本、年報,新聞和課程。

書本上,你可以睇我寫架"80後百萬富翁"、"財務自由行"和"股票勝經",都適合初學者。

另外,本人的【投資倍升股課程】適合初學者的,每一課後都會有指引比你,要你在一星期內找那些資料,溫那些內容,只要你跟著去完成,到你讀完整個課程後,你已能自己選股、投資、評估平貴,在投資上已掌握了一定的知識。

Q23865:

老師你好,最緊幾個月開始留意你嘅page

我今年33歲,儲蓄只有幾萬,要入23-25k,想喺半年內儲到50萬,我應該點做?

龔成老師︰

坦白講,以你現時財政狀況,單靠投資去半年內儲到50萬,基本上係無可能。

我地做財富增值,一般希望做到架合理回報,係每年增長10-15%。就算係全球投資最賺錢的人,巴菲特,佢平均年度回報率,都只係20%。

你現時這個目標,用股票投資去做,風險會好大,較難達到。

你唔好嘗試去用坊間個D炒賣方法,賭博性好高,極大機會係得不償失。這時經驗之談,要緊記。

如果你無其他增值方法,建議你按部就班,透過月供和買入優質股,另一邊努力加大自己收入,去令自己盡早達成目標。

以你33歲計,建議你用「平穏增長股」 + 「潛力股」作組合,去創造一個增值平台。

建議你先從知識,有月供股票著手。

Q23866:

老師你好,我有正職,2019開了FB網店賣代購日用品,直到現在大約有2000人like,因為每件貨利潤很微$20以内,生意又不算很多,其間也要在fb賣廣告增加人流,

現我不知這是否應該繼續?

做又沒有什麼錢賺,不做這店又不知做什麼賺錢好。我對買賣股票又不熟悉(正多知理財書,學習中!)

龔成老師︰

你應該從你網店長線發展,去考慮是否維持。因為你做了2年,唔算好長,也不算太短的時間。其實你應該開始掌握到,你盤生意和市場的大致情況。

$20利潤只係一個實數,你要睇翻個純利率,才知是否不值。例如你件貨本身係$2000件,咁純利率只係1%,當然唔多。相反,係$40件,純利達到一半,其實唔錯。

另外,你要睇下未來個市場增長空間、你自己網站發展空間等,去決定是否值得做落去。

因為你現時個狀況,唔算好,但又唔算差,所以你要諗長遠少少,睇下有無得發展,或者變做半職好發展,另外再找其他收入來源。

我建議你睇《80後千萬富翁》,當中都有講述一些生意的概念,你可參考下。

我建議你的網店,可同時試不同的產品,有時市場是試出來的,你同時賣多種產品,之後見到某一類產品好有市場,就集中做這類。

在網上世界做宣傳,要講求你的創意,多同一些非常規的方法去做。

同時,做生意最重要是客戶容易記得你,你要向這方向想想。

Q23867:

老師,請問3800保利協鑫能源有冇前景?

家人仲大手有這股

又是停牌又復牌

對我來說,真的有點驚嚇,求指教~

龔成老師:

保利協鑫能源(3800)復牌後升翻,主要是業績唔差,同時停牌期間,多晶硅價格上升不少,加上行業對產品一定需求,都令股價反映過往停牌時的利好因素,但始終對這股有D保留。

佢之前有核數師請辭(雖然已再任命新核數師),但我對這類股票,會較有保留。

睇翻2020年度業績,收益錄得146.21億人民幣,按年下降24%,毛利37.02億元,下跌20.9%。虧損由2019年度1.97億元,擴至56億元。

到2021年中期業績,盈利約24億元。

但獨立核數師提出關於持續經營的重大不確定因素,不過,並無發表保留意見,算是好轉翻。相信接下來股價都會好波動,業績好是利好因素,但這股始終有風險,因此不建議投資太多,要小心風險。

Q23868:

想請教,其實如果不用急住出去住 買樓或股票那項投資回報大?現時有1.1M 資產 60%股票 40%現金 我應該投資股票還是開始買樓?

龔成老師︰

如果你無自住的迫切性,我會比較建議你買優質股先。

因為現時香港整體租金回報率不高,所以買優質股值博率,會較買樓好。

其實原理就是比較「那一項資產長遠有較好的增長」。我地就會較優先投資這類。

現時股票大市只在合理區,你現時股票和現金比例係正確。餘下資金,我地就等大市有明顯回調,才慢慢加注入貨。

Q23869:

龔 sir 1211,升到痴晒線,你發達啦

我得 2 手 @271 咋。可唔可以話我知,佢會唔會大跌返 ga? 會回到咩位?我好後悔冇入多少少貨呀,宜家要拮大髀。

想入多d, 但宜家會唔會叫做高追,顯到唔明智?

另外,你點睇669創科?最近我留意佢,覺得佢都係直線上升,好過買700騰訊好似冇咩力咁

龔成老師︰

我地要學習做一個理智和冷靜的投資者,就算一隻股票再好,你用一個貴架價值去勉強入貨,長線回報都會受影響。

佢會唔會再大跌,無人會知。現時比亞迪(1211)已經係貴,不宜高追。你最好等佢回到$200左右先小注,或$250以下才開始用月供模式儲貨。

若你好睇好新能車,你可以用GX中國電車(2845)暫時代替,這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股(002594),以及與中國電動車產業有關的股票,中國因為能源問題,長遠一定要發展電動車,這是大方向,故此股有一定投資價值。

此股現價合理區頂至略貴。無貨可以現時入少少,到有明顯回調才再慢慢加注。

潛力度是有的,但會比較波動,如投資宜慢慢分注,可長線。

創科實業(0669)有質素,有品牌,有銷售網絡,長遠有發展,這股值得長線投資。

不過近期上升了不少,現價唔算平,如投資,暫時只建議月供。你預回落翻2,3成,先有機會合理翻d。

你要記住,唔好受市場氣氛影響,見一隻股票係咁升,就心思思想去入,驚錯失機會。

係入貨前,你要問清楚自己,隻股票有質素之餘,現價到底合唔合理。如果係偏貴,就要忍下手。

投資機會其實從來不缺,反而缺少的是你手上資金。如果你係值博率不高時,白白浪費左手上的寶貴彈藥。到真正機會出現時,你就只能眼白白睇住機會流走。

學習一下,如果提升自己的耐性和客觀分析能力,對你未來投資,會有好大益處。

Q23870:

老師,請教一下,我現在應該全轉成現金嗎?距離領回公積金還有5個月。其實,假如3,4成保留在均衡組合,即1半(2成之內)為股票,其他是債劵等可以接受嗎?

基金經理不是也應該分析後尋找穩陣的投資嗎?

股票是全球的,例如美股只佔11%

老師,你建議我將來搵銀行投資債券,是否收費一次性,不似基金經理收月費,所以較為划算?

龔成老師︰

其實只有5個月就要贖回公積金,我建議你最多保留3成左右,在一些平穏增值組合好了。

理論上,基金經理會因應基金性質,去找適合的投資項目。但我建議你最好睇翻隻基本過往表現,是否真正做到你所期望的平穏增長。

至於投資債券,銀行除了買賣時會收取費用外,你存倉都會有收費。至於實際有多少收費位,你最好問翻相關銀行,咁會最準確。