Q24091：

Hi 請問paypal , visa是優質公司嗎？

龔成老師︰

PayPal Holdings Inc (PYPL)是一家科技平台與數字支付公司，支付方案包括PayPal、PayPal Credit、Braintree、Venmo、Xoom、iZettle和Hyperwallet等。

集團有一定知名度和規模，長線發展是正面的。

早前集團開始允許部份國家用戶﹐購買、持有及出售加密貨幣。在加密貨幣日漸普及時代，有機會成為集團新的增長點。

雖然此股過去數年，盈利增長不錯，但以現價計已經唔平。由於佢長線發展正面，你現貨持有，係無問題。但相再加注，最好等佢回多少少先，或用月供模式去儲貨會較好。

Visa Inc Class A (V)是一家在200多個國家和地區提供數字支付的支付技術公司。此股有品牌和規模，長遠發展正面。

睇翻佢過去3年，發咭量和交易次數，都係維持增長。但盈利無明顯增長，雖然2021年首2季，由於疫情放緩，令收入有所回升，但盈利未見有明顯增長。

整體而言，企業係有質素，值得長線投資，但只會係平穏增長型。近年集團在加密貨幣範疇加強部署，在未來或有機會成為一個新增長點，可以再觀察。

現價計，己經唔平。無貨可以考慮小注，回多1,2成才開始儲貨，值博率會更好。

Q24092：

老師，想問如果中國地產商出現問題，是不是都會直接拖累業管既收入。現在網媒爆地產商好似出現危機。我們是不是應該減持業管股票？

龔成老師︰

雖然物管股，係會受現市樓放緩，或者地產商出問題所影響。但其實整體而言，物管股這個行業，依然有佢架投資價值。

但就要小心分析，因為不同物管股，本身依然母企程度，和管理物業的種類，都有所不同。

一些對母企依賴性較細，物業種類較多元化的物管股，係可以睇高少少，好似雅生活(3319)。

其實我之前，係FB出左一篇有關內地物管行業的分析，你可以睇翻。相信對你分析物管股的投資分析，會有幫助。當然，物管股中短期仍不利的，要長期先可以慢慢見到價值。

Q24093：

我將退休，1866 心連心化肥，看公司目標及方向正面，配合國家政策，請問現價是否合理買入？謝謝

龔成老師︰

中國心連心化肥(1866)主要從事生產及銷售尿素、複合肥、甲醇、三聚氰胺、糠醇、二甲醚、液態氨及氨溶液。

集團業務都有投資價值，但盈利都幾波動，而且派息唔算話好穏定，負債水平偏高。

整體投資價值一般，而且你係較接近退休的人士，不太建議投資此股。

Q24094：

我一隻一隻你建議嘅股票看一遍，想請問1177現時嘅股價都差不多係最低，而且過去一段時間都偏弱。請問基本面有冇改變？值唔值得今日入貨作長線投資？

1448同問

龔成老師︰

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

雖然近期回落不少，但本質未見明顯轉差，依然有投資價值。現價算合理區中間，可以分注。

福壽園（1448）有質素，不過都會擔心監管風險。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。

由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於佢賺錢能力強，而從事殯儀業，都會擔心佢受到監管，這是潛在風險，因此都要控制注碼。

至於企當估值方面，現價是合理區中上部。無貨已可以首注，相信長遠發展仍是不差的。

Q24095：

你好龔成，想請教一下你。本人大約有60萬資金。40萬股票。一層供緊賣唔出既納米新樓，每月供款$13000。我本身係專科註册護士。剛辭職開始一個護理生意。仲裝修緊。

其實我點先可以財富增值？股票應該可以點樣整合？

股票持有：

HSBC 1手

微創醫療 1 手

四環醫藥 15手

中國醫療集團 1手

農夫山泉1手

阿里巴巴 x 1

領展 x 1

醫渡科技 x 1

康方生物 x1

金蝶國際 x 1

京東健康 x 10 手

思摩爾國際 x 1 ->高價買入$84

希望可以收到你的回覆，謝謝！

龔成老師︰

其實財富增值方法有好多，投資、銷售團隊、做生意等等，都係方法。(詳細可以睇我本《80後千萬富翁》)

你現時正準備一盤新生意，其實我建議資金最好優先預留給生意部份。因為一盤生意經營得好，回報可以比投資優質股為高。

到再有多D空閒資金，就可以慢慢加大優質股部份，去令財富組合更多元化。

你現時持有股票，大體上都係有質素。

微創醫療（0853）、中國醫療集團(8225)、醫渡科技(2158)、康方生物(9926)、京東健康(6618)、思摩爾國際(6969)都係一些不確定較高的股票，而且部份更加未有盈利，風險性就更大。

唔係話唔投資得，不過要保守少少，唔好太大注。

特別要留意，係四環醫藥（0460）。佢近年狀況好翻D，相信無之前咁差。

不過這股，過往曾停牌一段時間，2015年、2016年，曾經出現了核數師有「保留意見」的情況，反映盤數當時有點古怪。

雖然近年的業務比之前好轉，未必有賬目上的問題，但始終這股過往出現過這類問題，投資者要較小心。我對投資這股有保留。

另外，你現時組合最大問題，係好集中係潛力股(0853,8225,2158,9926,6618,6969)和醫藥股類(0853,8225,2158,9926,6618)。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富由於係一籃子組合，故不受此限。)

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

你現時咁集中醫藥類，我相信跟你本身專業有關。若你用專業知識，分析到佢地有價值，行業佔比重高少少，多過30%都係可以。

但畢竟你持有的部份醫藥股，現時都未做到收支平衡，幾時先有正式盈利，都係未知之數。所以，我建議你就算對佢地技術上發展睇好，都不宜過份進取和集中。

未來時間，你可以加入一些不同行業的平穏增長股，去令你組合更平衡。

Q24096：

我想請教本人有一份全職工作，但因小朋友開始長大想開始計劃做全職媽媽，但之後會沒有收出，哪如何是好，想問可以用20000的私己錢做有回報的投資嗎？

龔成老師︰

首先，你要明白我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係好似坊間散戶咁炒炒賣賣，去賺差價。由於係長線計劃，加上你本金唔係好多，你唔好預期佢對你短期財務上，會有任何幫助。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

我相信你係年青至中年人士，以你人生階段計，應以增值為主，建議你用「平穏增長股」 + 「潛力股」作組合，去創造一個增值平台。

以下都是一些合適股票，但潛力股風險較高。若你投資經驗較淺，建議你先集中在平穏增長股上。

Q24097：

譚仔國際估值是多少元？

龔成老師：

譚仔國際（2217）不差的。現價算是合理。

佢有品牌，有規模，以及有穩定的顧客，現金流強，整體不差的。不過，香港飲食業競爭大，同時入行不難，對是對佢扣分的地方，加上香港人好貪新鮮，因此佢都不能一定話品牌永遠穩固。

睇翻佢資料，譚仔及三哥品牌擁有超過二十年歷史，合共經營148間餐廳，包括覆蓋港九新界18區的72間譚仔餐廳及72間三哥餐廳、中國內地深圳的1間譚仔餐廳及新加坡的3間三哥餐廳。

根據2019年的餐廳數目，調查機構歐睿將譚仔列為香港亞洲粉麵專門店的第1位。

根據佢招股書資料，假設顧客每光顧譚仔100元的生意，食材成本佔22.9元；有31.1元是員工；約23是租金及折舊，扣除其他開支後，譚仔的純利仍有19.7元，扣除所得稅開支後，亦有17.8元的淨利潤，以香港經營食店來說，是高利潤的（不過，數據都是上市前的數據，所以不排除會執靚盤數上市）。

譚仔打算大力發展海外市場，以及中國市場，這會有危有機，如果成功當然潛力不能忽視，但過往不少香港食店打上內地都失敗，因此，存有未知數。

整體上，這企業都有質素，但不能定為最高質類，同時有危有機，這股如控制注碼，都可投資的。

Q24098：

龔老師，我係新手，想請問一下點睇9626，買吾買得過，有無前景？謝謝你🙏🏻

龔成老師：

嗶哩嗶哩（9626）有質素，有長線投資價值。

但對於初階者來說，你要明白當中的風險，股價會較波波動，如果你投資，只建議你小注。

佢可以話係一個綜合性的視頻社區，在當中，用戶同埋內容創作者能夠有好多元的內容，並進行互動，內容包含生活、遊戲、娛樂、動漫、科技和知識等眾多領域。

另外，佢亦能夠支持廣泛的視頻內容消費場景，以專業 用戶生成視頻（PUGV）為中心，輔以直播、專業機構生成視頻（OGV）等。

根據報告，35歲及以下的用戶佔佢的月活用戶比例超過86%，月活用戶達到2.02億人，每年增長5成以上。業務正高增長。

佢收入主要來自移動遊戲、增值服務、廣告、電商及其他；收入成本包括收入分成成本、內容成本、服務器及帶寬服務成本以及電商及其他成本。

過往的生意高增長，這刻雖然未有盈利，但前景正面，這股有潛力，有長線投資價值，不過估值就較難，股價變化大，市場對這股的股值較分歧，只可以話，現價唔平，但算是合理，如投資小注可以，但要預股價上落較大。

Q24099：

老師，請問你點睇柏能集團（1263）的業務和發展？

現價合理嗎？

謝謝

龔成老師：

栢能集團（1263）係有風險，有回報的類別。

佢產品分類為三大類：圖像顯示卡、電子製造服務（ＥＭＳ）及其他電腦相關產品及零件。潛力度是有的，但風險都大，現時唔平，但如果產品持續有需求，以及行業持績有發展，又未算好貴。

但這股業務始終好波動，因此，如果投資一定是小注，或可等回落少少，先可考慮小注。之後明顯下跌先加注。

如果本身有貨，都可以長線的。

或者你如果無貨又好想買入，如果現金足，現價勉強小注，之後等大跌先加注。

Q24100：

老師，1810小米還有質素嗎？我由2021年開始，每兩個月入1000股，到現在已有6000股，但價格不斷下滑，應繼續嗎？

龔成老師：

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區中上部，你保持月供就得。月供要長線的，最少3年，因此你不用理會短期情況，反而應該高興股價短期下跌令你可以收到更多貨。

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。