上周公佈的11月賭收增長8.5%，較市場預期為佳，雖然按月下跌，但10月係傳統旺季，可以理解，港珠澳大橋通車及澳門大賽車，都刺激了上月訪澳的人流增長，現時貴客少咗，各賭場都要吸引這些人流，目標鎖定做中場客。

青冰每年都會去一次澳門玩，近年賭業發展，也產生變化，首先周邊的非賭場娛樂，係明顯多咗，睇戲睇show睇演唱會係其一，適合一家大細的活動也多了。另外賭場的電子設施亦愈來愈多，青冰以前會諗，對住部機賭邊有癮架，但隨著我哋愈來愈沉迷手機，直播式電子賭枱(簡稱DETG)在日後應該會更受歡迎，尤以年青人市場為甚，加上一部機減省好多荷官，又唔需要休息，成本效益高，長遠而言只會愈來愈多。

起初青冰以為這些高科技嘢，必定係鬼佬整的，因為N年前去墨爾本皇冠賭場已經見過，經查證原來在澳門，主要製造商係滙彩(1180)，現時在澳門各賭場安裝了4700台直播式混合遊戲，全是滙彩出品，更加係發明者及專利擁有者，所謂混合，即係你可以對住部機，同時可以賭幾樣唔同嘅嘢，亦同真賭枱一齊玩。以純電子賭枱計，滙彩現時市佔率高達六成。

現時滙彩仲係靠管理賭場為主要收入，電子博彩設備雖在首9個月按年增長75%，但仍未錄得稅前盈利，不過這個情況或在下年有重大變化，因為澳門博監局在年初落實了「直播式電子賭枱遊戲技術標準」，並已生效，內容都幾有趣，有興趣的戰友可google下，重點就係要各賭場在2019年底前，全部按相關技術規定作更新，感覺就好似強逼大家upgrade個ios或硬件咁，最大的得益梗係軟硬件製造商啦，亦即係上面提及的滙彩，換言之就起碼有4700台的新生意，當一部收十萬，條數已經好襟計，可預料收入應有強勁增長。

以前經過賭場，聽見呼叫之聲此起彼落，都知道係好旺場了，如果日後電子賭枱大行其道，賭場會唔會靜晒，有人但冇聲，只係得返遊戲機的聲音呢？

Fb個人專頁 http://www.fb.com/chingbing888