華富財經 Quamnet.com Logo
MoneyKOL
2018-07-30 08:24:00
[Ivan Leung] 難聽說話。不如不講

可能係世界上最難聽嘅說話?雖敗猶榮。 你好努力練波。朝早,六點幾起身,逢一三五,風雨不改,你覺得自己勁過BNI,因為一星期有成三次早起,勁過想當年唔知邊屆世界杯,要早上六點幾睇波。你個PT教練,同你一齊跑步、拉筋、跳繩、傾計減壓,又重點肌肉培訓,又同你設計餐單,樣樣都做齊,都只係收800蚊個鐘,你覺得,好似騰訊折讓5成比你買貨一樣,對你咁鬼好。 你持續左成五個月,就係為左呢個比賽:「舊同學會籃球比賽」。回想,你中三果陣,同你呢世人嘅宿敵,阿Derek,相遇,打左幾場波,大家有輸有贏,點知,佢快你一步,溝左我地呢級嘅校花,翠兒,仲拍左成年幾拖,直至佢去左美國讀書為止。而你,就入左科大讀書,翠兒就去左城大,雖然大家分道揚鑣,鍾意左翠兒好耐嘅你,一直都好想幫翠兒報仇出返淡氣。所以,你好努力,畢業之後搞左幾間Startups,仲賣左其中兩間,算係有少少錢,叫做可以買到間1,050或者850嘅錦繡花園。當然,你點都唔及Derek啦,因為佢屋企係餐飲王國,身家多你起碼四個零,老豆仲有幾隻殼呢,而你,最多機會接觸殼,就係細細個朋友帶你去大嶼山長沙掘貝殼。 你唯一可以做嘅,就係球場上,打贏呢個人,為你同翠兒,為你嘅人生同翠兒嘅面子,出返呢口氣。你聽你老死講,Derek吹雞返學校打舊生杯,你超級開心,因為,等左成廿年嘅機會,終於嚟啦!你知道消息果晚,打左十幾個電話,叫返大嚿、高佬、阿明、老野、MJ等等一班豬朋狗友出嚟,再戰江湖!你好耐好耐未試過咁興奮、你好耐好耐未試過咁期待,比起你上次賣左間野比間listed com上去中環中心簽完合約果刻,仲有感受呀。你用左成五個月時間,操返起自己,因為,你記起當日,第四場,就係對住Derek果隊5A,你受傷,唔出得,最後輸左。睇住隊友出盡全力都被人強姦,仲慘過自己被人雞姦! 做做吓熱身,你見到Derek ,你好有自信,走過去,同佢打聲招呼: 「好耐無見!Derek!」 「係呀,好耐無見呀!黑仔,你都仲係咁fit呀!」 「哈哈,大家都四張野就嚟啦,唔keep點得呀?」你心諗,呢半年以嚟,酒都無飲過半滴,日日食菜同肉,就係為左今日。 「哈哈,好吖,睇吓陣間你係咪好似以前咁快先?」 一開波,你同阿明係高位做左個pick,阿明roll in,你比佢,佢左邊插入後突破分球比老野,回傳比空曬嘅 MJ,三分,第一球,好好feel,你心諗,今日仲唔打爆你!之後,回去防守,唔入,你攞左個rebound,落地,邊條友伸隻腳出嚟,一踏,失重心,「吖呀!!」Gordon Hayward果幕,係我腦海盤旋!因為,呢吓你已經痛到身肉分離!先得果43秒咋比賽,你老母!有無公司做43秒就要倒閉、上市43秒就要停板呀?你入左去醫療室做treatment,都唔知搞左幾耐,你不停話要出去,個醫生wanna-be都話你煩,叫你等等。終於,比你搵到張輪椅,出返去球場果陣,睇住大嚿、高佬、阿明、老野、MJ等人,比人強姦籃底、屈速度、無解三分,比Derek And 1……你個心,好疼、好疼、好疼……就好似你啲付出入晒黑洞,啲收入去晒明洞一樣,一敗塗地,無錯,係一敗塗地呀! 完結:33 vs 67。你去睇住張score sheet,Derek,攞左28分。黑仔,有1個籃板球。 你嘗試企起身,但係張輪椅好似有魔法咁。你完全無力,但係雙腳勁震。 已經光左頭嘅體育老師劉sir,慢慢走過嚟,安撫你,就好似想當年咁。佢同你講:「雖敗猶榮吖你地,打得唔錯呀!難得阿明、MJ,都仲有貨賣!哈哈!」Derek之後都行左埋嚟,佢同你講:「可惜吖,你一開波就傷左…無得同你地full team嘅5C打返場,哈哈,仲以為你係James,宜家變左CP3,哈哈,學劉sir話, 雖敗猶榮吖你地!」佢拍左你右手兩下,然後就行開左嘞。 果陣,你差啲就好似marvel入面個hulk咁,一變左身就失去理智,見人就想打。「失敗」同「光榮」,係絕對拉唔上任何關係嘅。你心知,光榮嘅失敗,係點都比唔上羞恥嘅成功。成功嘅人,同你講雖敗猶榮,就好似,強姦完你,同你講,你起碼都有高潮吖!雖敗猶榮,同節哀順變一樣。係一句肯定你努力,但又確定你失敗左嘅說話。有骨氣嘅人,係唔應該受嘅。 返到翠兒屋企,翠兒已經準備好一餐豐富嘅午飯,想同你分享。 「點吖頭先?大舊話你受傷呀,你OK嘛?」 「無問題,隻腳有啲痛,一陣無事嘅!」 「你去澡澡身先啦!」 「唔該。」 你同你老婆講,話打完波會同波友食飯,老婆已出permit。你知道,做人,商業上、感情上,做個有骨氣嘅人,都係無用嘅。 2018-07-30 Ivan Leung – 喜歡音樂、教學培訓、投資、寫文章,熱愛探索新事物,保留著對世界的好奇心。 https://www.moneykol.com/?author=75 https://www.facebook.com/mcivanleung/ http://www.yes-news.com/?p=thepeople&blogid=294 https://medium.com/@ivanleung_25409