Q23981：

老師我想問下你對metaverse 既想法

諗住投資下佢d美股etf

龔成老師︰

我在11月頭出左個FB POST，係元宇宙的分析和相關值得投資的股票，你可以參考下。

但現時成件事好初期，無話邊隻ETF特別關事。你可以睇下META、NVIDIA、ROBLOX、MATTERPORT。暫時都算係較相關的股票。

不過佢地現價唔平，要控制注碼。而ROBLOX、MATTERPORT係較新上市，加上仲未有盈利，風險會更高。就算投資，也不要太大注。

Q23982：

龔sir，你好，領展之前收購雪梨購物中心的新聞，請問這個新聞算是利好嗎？對長遠來說。

經常見到你說領展是體質穩健有質素的公司，請問也是可以月供嗎？謝謝！

龔成老師︰

領展(0823)斥5.38億澳元收購澳洲悉尼三個零售物業預目50%股權。根據摩根士丹利發表報告，相關項目於澳洲移動年度銷售額排名分別第一、第二及第七，現時租用率達94.3%。

其實，集團過去也曾斥資36.7億元收購悉尼一幢甲級商廈。

雖然增長力比過往年代略減，但整體仍是有質素，是平穩增長型。

近年不斷收購海外，以及國內業務，以強化物業組合，領展其中一個特色，就是尋找一些有潛力的物業，收購後進行翻身，提高租金及物業估值，因此，長遠仍有增長力。

現價合理，可分注投資，長線持有。

Q23983：

龔成老師好，本人32歲 月入3萬 流動資金約30萬

因家庭經濟負擔不小 算支柱 所以過往只買過5年期（供完）和8年期（剛買 每年15000）的儲蓄保險

現時月儲最多8000 同樣因家庭問題 精神壓力好大 好想好想搬出去 期望2,3年後做到 到時不夠資金 去租樓 ？ 但我女仔一個 唔敢住劏房

請問老師我搬出去是否天真的想法 我可以點做

龔成老師︰

其實找自住物業，最重要係睇你有無實際需要，無話天唔天真。

現時香港樓價雖然唔平，但若有真正需要，其實這刻置業都可以。之後，我地再諗係你現行經濟條件下，點樣去在可承受風險水平下，去實現這個目標。

以你現時狀況，你可以用每月儲蓄，去做月供股票，去增值你的財富。

至於"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

策略上，你可以投資「平穏增長股」和「潛力股」。你每月5成儲蓄，即是用$4000做月供。其餘先儲起，用一邊月供一邊儲蓄的策略。

如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。

現時大市只是合理區，你現有30萬資金可以先投入10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$8000 + 現有資金30萬，3年後大約會增值至70萬。若是5年，則回報大約110萬。

你可以以此作參考，去制定你的計劃。

若資金不足，我建議你努力加大儲蓄，或者拉長增值年期，去累積更多財富去置業。租屋唔係唔得，不過你會長期承受租金波動的風險，你要明白這一點。

當然，以上只是從投資和財富配置角度去考慮。若你生活上有搬家的迫切性，你係可以另作考量。

Q23984：

你好呀，龔成老師 第一次message 你，想問一下關於月供股票。現時手持多月供股票及主要月供緊3隻股，每月都會供$3000-$3500

但眼見到蝕得好誇張 可否幫忙整理一下應該供邊隻同埋分佈如何？

月供緊

268-$1000(剛加到$1000，之前係$500)

1211-$1000(岩岩新供)

1810-$1500

謝謝你

龔成老師︰

你現時供的股票，都係有質素，現貨可持有。但有幾個問題，你要注意翻。

首先，唔好因為而家蝕緊，就覺得有問題。一隻股票有無問題，值唔值得持有，係睇佢本身個企業質素。如果係有質素，中短期帳面虧損，都係可以接受。

不過，比亞迪(1211)現價偏貴，唔係一個適合月供的水平。建議你等佢回到$200左右，先再考慮月供。此期間，可以先用GX中國電車(2845)代替。

金蝶(0268)現價都唔平，不宜供太多。

另外，你而家太偏重左係潛力股(全部都是)，佢地雖然有增長潛力，同時風險都較高，不宜持有過多。

我假設你係年青至中年人士，潛力股也最多可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

現時大市只在合理水平，每月儲蓄唔好盡用，要留少少等大跌市機會，去入平貨。

Q23985：

成哥, 我持手1313已好幾年, 近來跌得好勁, 想了解下佢公司本身有冇問題? 應該繼續持有定轉信義玻璃? (揀信義玻璃純粹因為睇好太陽能相關的工業), 謝謝你呀!

龔成老師：

華潤水泥控股（1313）你預中短期仍弱，因為內房差，但這股不是不可守，人始終要住，需求總要的，問題是要耐性先等到。

本身有質素的，不過業務就較有波動，佢過往的盈利數據上落都大，因此股價的變大亦會較大。

如果你持貨多，就轉部分到其他，信義玻璃（0868）都可以，現價合理。如果你持貨不過多，就守住先。

Q23986:

老師，我上緊你堂，其實我已經有10年沒有工作…

上完幾堂課後，發覺自己的思維被阿sir 影響，變得自己敢踏出comfort zone!

依家積極用行動去報政府的技能提升課程，希望可以入返職場，準備返兼職！

感激龔sir!

希望可以繼續在你身上學到更多嘢！

龔成老師：

加油！我期待你不斷進步，之後再聽你的好消息！

Q23987：

想問下. 甘多隻ETF 邊隻好. 房託都可以

龔成老師︰

其實不同ETF，都有佢投資價值，視乎你本身睇好邊個行業。

最重要係配置時，要確保唔會過度集中個別行業，單一行業唔好高於組合30%，以免出現過度集中性風險。

若你唔知邊個行業好，純粹睇好個別地區市場，你可以買個個市場的ETF。

例如恆指-盈富2800、美股-VOO,QQQ等。

同時間，你要睇下個ETF，配唔配合你現時人生階段。若你係年青至中年人士，應投資較有增長力ETF(例如2800, 2845, 2814, VOO, QQQ)。相反，你已近退休，就應投資一些以收息為主的ETF，例如房托ETF、3110之類。

Q23988：

龔sir早晨，我想係銀行月供股票，如騰訊/華潤電力/港交所，大約每月供3000蚊，但由於手續費一年大概要720（1隻股），唔知會唔會太貴，

另外我手持6手3988，但其實中銀1年嘅股息又可以cover到月供嘅手續費，唔知想法有冇錯，請阿sir指點一下

龔成老師︰

手續費佔月供資金5-6%，其實係有點貴，會影響你長線回報。

你可以睇下可唔可以加大供款額，或者集中轉供一些指數基金，去拉低手續費比重。

雖然中行(3988)股息係可以cover到月供嘅手續費，但我地投資唔會咁去計。

你係做月供個部份的資金，的確被手續費嚴重蠶食，所以你月供計劃係有需要調整。

Q23989：

現在我可以有3000-4000做月供，是不是全部供小米？

龔成老師︰

唔建議，你可以用$1500去供小米(1810)。另外$2500就去供2隻平穏增長股。

如果你對我之前講的平穏增長股，唔係太認識，你就$2500全供指數基金。

現時大市只在合理區，每月記得除了月供外，都儲起少少錢，等大跌市出現時，可以用來入平貨。

Q23990：

3067可能要證券行先得，如果3000蚊點分配66同9988？

3067有得買了，我依家做左月供2000蚊66另外直接買入一手3067

有冇咩需要留意？

龔成老師︰

如果得$3000，你可以各港鐵(0066)和阿里(9988)各月供$1500。

若你係月供2000蚊66另外直接買入一手3067，這個都可以。

其實3067，入場費不高，你可以自行，每隔2個月入一手，都得。

現時大市只在合理區，每月記得除了月供外，都儲起少少錢，等大跌市出現時，可以用來入平貨。

另外，緊記月供係一個長線計劃，月供最少維持3年，並持有這些股票5年以上，才會有較理想效果。

當然，可以的話，最好一直持有。因為，優質股持有時間越長，財富增值效果就會越理想。