和電(0215)昨天公佈全年業績，賺幾多都冇人會理，最重要嘅係終於宣佈派發0.80元的特別息，公司自2017年7月宣佈出售固網業務，袋咗145億現金，自那天起就半年炒一次派特別息，直至昨天終於還股東一個心願。

18個月了，青冰肯定不少股民都曾經沾手，上車落車再上車又落車，點解一個賣資產派特別息的步驟，要纏擾咁耐，令股東有希望之後失望，再有希望又失望呢？相信真係要問霍大班先知，但股東們一定認同，話事人係好鍾意用假動作去fake個市場。

賣固網是由2017年6月開始炒作，由2.40一直升至3.09元，青冰好記得在落實之前幾天，股價由3蚊殺到落去2.74元，當時大家都以為炒完了，點知就在之後的周末公佈賣喇，市場為之雀躍，炒到上3.22元，但sorry囉，那個位就是最高位，股價之後跌了3個月，去到11月尾又拎返出來炒，點解呀，因為霍大班在9月時講過收到錢先考慮啦，12月董事會就有決定。好喇市場成個12月係度等，都係冇消息，但唔怕啦，去到2月尾業績一定派啦，結果個股價炒到上3.50元，公佈業績冇話派，話要睇未來一年有冇適合的投資項目，如果冇就會派啦，股價翌日裂口低見2.80元。

青冰之所以記得咁清楚，除了做了些少功課之外，就是因為當日係股東嘛，這年半以來，從和電派特別息事件上，的確學到唔少嘢。用正常分析，袋咗145億，誠哥加埋長和(0001)持有逾七成股權，點會唔派吖，甚至有人幫和電計算估值，甚麼價才算合理，但唔派就是唔派，用咩模型計，計得幾精準，再計埋剩餘業務值幾多倍PE，都是枉然，好喇跌到咩位叫值博，又可以計一輪，結果條數係啱，但好難計到個機會成本，係嘅，坐住咁多cash，下跌空間有限，但這些日子的機會成本亦絕不低，相信不少人都在這段時間上車落車再上車。去年12月一度升至3.14元，又係偷步炒啦，點知幾日內又殺返去2.90元，最正嘅係今星期高見3.23元後，急跌兩日，扮到好似有春江鴨收到風又冇得派，股東們又不禁暗Ｘ一聲，你玩夠未呀？

好喇，今次終於派八毫子，派完息後，現金將由95億減至55億，按理仍有再派的空間，再回望電能(0006)當日派完第一次之後，中期業績及翌年的業績都有派，前後三次，不過再次提醒返，呢隻嘢咁鍾意同你玩，你會唔會揸到下次業績呀？經歷年半的折騰，相信小股東今日開市後一定係沽架喇，係咪？

Fb個人專頁 http://www.fb.com/chingbing888