華富財經 Quamnet.com Logo
龔成
2022-01-12 16:00:13
【龔成問答信箱】(Q24271-Q24280)

Q24271:

龔sir,我現在上緊你的班。有關水桶分配不是太明白箇中原理。你說水桶一會流去水桶二再流去水桶三。

水桶一潛力高,但多數少派息甚至無息,是否要靠佢股價升值,減少持份比例(例如沽出),而將資金流向水桶二,如此類推?

這樣的話,因為你說最少要持貨3年,是否意味頭1-3年是等待,第3-5年才開始資產增值?

龔成老師︰

持貨3年,係一個平均數,因為就算再優質股票,都會出現中短期波動。只有長線,才會將佢價值表現出來,所以我會用5年左右,作為最低持有時間。

但咁唔代表,1-3年是等待,第3-5年就增值。因為我地唔知個市點走,佢可以你買入第二年,已經升到好貴,咁我地已經可以減持部份獲利。

相反,佢係有機會等5年以上,實際價值才慢慢體現出來。因為3-5年,只係一個初步參考。

至於水桶部份,你說法正確。將水桶1升,個比例就會開始超過本身上限。我地就會將部份,換成水桶2,如此類推,最後全部流至水桶3。

Q24272:

老師 女朋友想3年內搬出黎一齊住 買樓 租樓 係咪應該買樓對財富有增值d? 因為我有買股票 如果要買樓 大部分股票就要賣出 轉成樓

但如果租樓 就可以繼續買股票 應該點做好?

龔成老師︰

物業和優質股,2者都是資產類,都可以為我地財富進行增值。從投資價值去分析,現時租金回報率較低,買優質股值博率會較好。

但由於係你自住物業,如果有生活上的實際需要,而你地又有信心長線係供得起,咁置業都係可以。

考慮重點,會係你有無這個迫切性,如果無,你地可以再慢慢睇,等有旬盤出現,才去置業。

如果係有迫切性,咁只要間屋係配合到你們長線所需(最少係未來10-20年),而又長遠都供得起,咁就可以。

另外,若你置業後會股票盡沽,緊記要買樓後,重新儲翻D優質股,以免財富組合偏晒去物業一方,而造成風險。

Q24273:

你好龔sir 請問 836 華潤電力有長遠投資價值嗎 ?

仲有838億和控股 佢市值低 但係做左特斯拉 其中一間1級供應商,現價已升兩倍多 長線可以嗎?

龔成老師︰

華潤電力(0836)有質素的,企業過往的投資開始見到回報,開始見到成績。

佢業務有火電,以及有可再生能源,算是中國裡的傳統電力龍頭。

佢火電裝機佔7成;風電、水電及光伏發電裝機容量合共佔比3成。

由於佢的多類發電運營模式,加上政府背景,令佢係現時受惠新能源政策,同時見到佢之前的投資,開始有基本收成,業績開始反映。

這股長遠正面的,可長線持有,但由於近期上升不少,雖然未算貴,但投資都要注意風險,控制注碼。

億和控股(0838)團主要從事設計和製造金屬沖壓模具;製造金屬沖壓零部件及車床加工零部件;設計和製造塑膠注塑模具以及製造塑膠注塑零部件。

由於佢是TESLA其中一個供應商,因此,TESLA發展對佢都會有正面,但睇翻佢過往業務與過往財務數據,只是一般般,反映企業的賺錢能力,本身不是好強,只是由於TESLA而向好。

但這刻未能完全確定企業向好,加上股價近期上升不少,投資值博率仍未算高。如果投資,只建議小注進行。

Q24274:

老師美股futu and 百度點睇?我高位有貨。唔知走唔走好

龔成老師︰

你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。

富途(FUTU)佢係一家在線經紀公司,提供一站式在線投資服務,騰訊(0700)為股東。該公司通過網上平台提供服務,其中包括香港、中國大陸,以及美國股市的市場數據、交易服務和新聞源。

佢以經紀佣金,以及手續費服務的形式產生收入。

早前佢由於被質疑在內地《個人信息保護法》不合規,近期又被指在內地無牌經營,令股價進一步下跌。

相信內地加大對金融平台規管,會是長期政策,暫時未知會影響佢幾大。政策風險係高左,最好先再觀察一下發展情況。

百度(9888)為全球最大的中文搜索引擎,是內地用家搜尋資訊主要對口,2019年百度用户規模突破10億,而百度App日活潑用户2億,信息流位居中國第一。

當你坐擁不少資訊和客戶群,就可以利用佢地去發展很多不同業務。

百度在規模和質素上係有,但你預佢中短期會較波動。

你可以睇翻2隻股票,佔你組合比重情況,如果不多,可以守。但若係較多,最好沽少少去平衡風險。2隻股票中,富途潛在風險會高少少。

Q24275:

龔SIR您好!我近日留意到來緊中銀會發行冬奧紀念鈔,有意慾透過抽鈔票後拎黎炒賣來賺少少外快,但我過往從未試過做呢樣野,亦唔知收到貨後可以用咩途徑,係邊度做買賣

。。。想請教您,我可以點做?

另外,我都有睇過1D文章既評述,好似話因為內地客落唔到來,所以只能主要針對本地客,但佢地既需求可能唔大,所以如果抽,我又唔知應該抽幾多好。。定係我應唔應該試呢?

我想請教您對呢方面有咩睇法?同埋唔知龔SIR您有冇試過炒賣紀念鈔 OR 其他收藏品?

最後我都想請問,如果我買4連鈔,35連後,其實D鈔放晒係同一個封套入面,係咪分開一張張紙幣,還是全部痴埋一齊,如是,我可否將D紙幣剪返開一張張來放售呢?

謝謝解答

龔成老師︰

冬奧紀念鈔,都有升值潛力,可以認購。至於點賣,以往係會展取炒的話,其實行到出會展外面,已經會有人出價。或者,你可以主動去問這些買家。

其實以往,係場外架買家,好多時都係幫內地客買,所以應該唔關疫情事,係內地一直有需求。

我以往都有賣完紀念鈔,其實有時都要睇運氣,如果係靚號碼,或者相連號碼等,會有較高價錢。普通號碼未入賺到好多,甚至有無人收購的風險,你要明白。

因為雖然今次都係限量發行,但無人知疫情,會唔會影響到內地買家的投資意欲(因為可能而1,2年,佢地都唔見左唔少錢),故係係風險。

絕對不要剪開連鈔,原裝保養最好。

至於保養,只要放於乾爽的地方,不要曬,就得。最好放入櫃,不要潮濕位。

Q24276:

點睇美股Snow呢?佢上市到而家我都每月供買一股,謝謝

龔成老師︰

Snowflake Inc (SNOW)是一家雲數據平台提供商。透過其技術,為金融、零售、醫療、教育、政府等客戶,提供解決方案。

上市至今,營業額都有唔錯增長,但問題是成本同樣按比重增加,故一直未能做到收支平衡狀況。

這企業係有質素和規模,但何時才可以做到收支平衡,之後再出現穏定盈利增長,暫時較難預算。故你投資係可以,但暫時不要大注,再觀察佢未來發展。

Q24277:

龔sir, 我想幫媽媽買收息股+少量平穩增長股,想問以下組合是否合適?

另外,想問1881和709哪一個會比較好? 我見1881在疫情期間, 都可以較穩定派息。 至於709,雖然股價同派息因疫情同經濟情況大幅下跌,

但見公司仍然努力拓展業務,是否值博率會更高? 謝謝!

  • 6823
  • 3
  • 1382
  • 1881/709 龔成老師︰

你以下4隻股票都可以,煤氣(0003)派息不算多,但有一定平穏增長力。而其餘5隻,主要係收息為主,但增長力就唔會明顯。

至於佐丹奴國際(0709)好,定富豪產業信託(1881),無一個明確答案。因為2間企業業務,係完全唔同,好難比較。

佐丹奴國際(0709)整體質素中等,業務不算差,但增長力不強,因此都不算好。

佢主要從事經營零售及分銷佐丹奴牌子便服與配襯用品。

業務分為六個子分部營運,計有中國大陸、香港及澳門、台灣、新加坡、澳洲及其他巿場。各根據不同品牌之觀點,零售及分銷分部細分為Giordano& Giordano Junior、Giordano Ladies、Concepts One(前名為Giordano Concepts)、BSX及其他。

中短期相信仍弱,但長遠不算差,都有投資價值,只要控制注碼就得。

不過,這股增長力不強,主力是收息。

富豪產業信託(1881)其實都有質素的,是不錯的收息股。但佢地其他房託,會波動少少。加上酒店中短期的風險較大,不過,現時以投資值博率的角度分析,其實都有投資價值。

睇翻佢持有酒店物業投資組合,持有8間酒店以收取當中的租金收入,4間在香港島,2間在九龍,1間在沙田,1間在香港國際機場。整體來說不過不失,位置與質素都不算差。

雖然酒店業務有波動,但由於富豪產業的收入模式是收取較穩定的協定租金,因此波動較少,令過往的可分派收入保持平穩上升狀態,過往股息大致穩定,但到近期,當然會好波動。

因此,預佢中短期弱,長期則無問題。

你可以考慮,2隻都供晒。但富豪產業信託(1881)業務你預中短期會較弱,而且性質上風險都比0709為高,故月供不宜佔太大比重。

Q24278:

如果708同136呢? 而家好似好低位。

龔成老師︰

恒大汽車(0708)雖然可能有潛力,但風險高,佢資金投入的確強,大力發展新能源車,但這些仍未有賣產品真正的實力,長遠能帶動多少收入,未知。

由於仍有好多未知數,可能佢真的有潛力,但連基本的銷售銷售都未有,我地作為投資者,就好難分析。

這類建基於"未來"的股票,當遇到大市較疲弱,或者一些不利消息,可以跌好多。

其實恒大汽車(0708)過往其中一個優勢,就係有中國恒大(3333)這家大型母企支撐住,就算未有產品,研發的資金鏈都唔會成問題。

但現時母企3333這樣情況,佢資金鏈斷裂機會係大左。雖然近期已有真車落地,並預期2022年中會出廠。但具體業務發展到會點,而家都係無人知。

我唔係話佢無投資價值,只係不確定性和風險都偏高。投資時,必需控制注碼,不能太大注。

恒騰網絡(0136)有危有機類。

現時企業盈利不多,之前市值極高,市場對「前景」有無限幻想,有時炒作會升好多,但跌都可以好勁,最近就是因為資金問題而下跌,因為佢的發展,是極要資金去支持,因為佢自己未能有正數的經營活動現金流。

如果長遠業務成功,會增長得理想,但失敗,會跌得好勁。因此,長線投資要很小心,要明白高風險,同時只能小小注。

Q24279:

老師 , tesla幾錢入好?值得投資嗎?

龔成老師︰

Tesla不差,增長快,股價向上好勁。不過穩健度不足,股價上落好大。

市場方面,有危有機,因為電動車是高增長市場,但行業結構變化大,存有未知數。

另外,股價上落太大,市場超前反映前景因素,只要增長力比預期差少少,都會有明顯回落。

現價計PE去到350倍以上,係好貴。如果你長線睇好,預佢股價上落一定好大,唔好理中短期股價,可以好小注入貨。

Q24280:

龔sir,你出版的書都有睇咗好多本,現手持:

388,2手平均價$516

2800,6手平均價$25.51

285,4手平均價$30.5

3323,4手平均價$11

請問龔sir, 我應該放咗少少止蝕嗎?

還是現在趁低再買入,現在跌咗好多,有點慌張,唔知點算好。股市日日跌,好驚一直跌落去蝕更多

其實一直都想報名上堂但是照顧小朋友實在抽唔到時間,請龔sir見諒

龔成老師︰

先多謝你一直支持!

首先你要明白一個概念,我地持有一隻股票與否,關鍵位是企業質素、前景,不要被買入價影響。因為我地買股票就是買企業。

如果企業質素轉差,就要賣出。如果企業某些核心優勢減少左,就有機會減持,因此,我地要分析企業的核心因素,一些長期的賺錢能力,有無改變。

至於買入價,除左港交所(0388)係買貴左之外,其餘都合理。

你要明白,就算質素再好的股票,面對大市氣氛疲弱,都會被影響,而出現調整。但只要長線質素無變,你照持有就可以。

你現時持有股票,都係有質素,可以長線持有。除了中國建材(3323)本質不算太強,現貨可持有,就不要加注了。