今個月的確有唔少股份好靚仔，講緊嘅唔係那些亂炒的老千股，而係一些績優股，今天想講吓愛康醫療(1789)，亦順便分享吓慘痛的經歷。

有跟開青冰的戰友，都知愛康是愛股之一，業務獨特的半新股，又有高盛包銷，還記得當日撰文其中一個要點，就是高盛，佢哋好少會為一隻細市值公司做獨家保薦人，結果當日不負眾望，由四個幾炒到上6.78元，但始終難敵大市氣氛，見頂後反覆回落，加上本身估值高，市場對業績的要求亦更高，今年3月公佈全年業績，全年賺1.4億人仔，約廿幾倍市盈率，不過較弊嘅係，下半年僅比上半年賺多幾百萬，作為增長股來說，係唔合格，所以青冰也沒再詳細跟進。

第三季表現最好的行業，當然是醫藥股及內需股，最熟悉嘅醫療設備股，自然是愛康，見佢走勢轉好，估佢半年業績應該唔錯吧，一心諗住揸到業績，不過8月港股內憂外患，投資氣氛差，所以決心要調整倉位及減少持股數目，愛康便是其中一隻被犧牲的股份，好記得沽出價係4.68元，好似係賺咗三大格。結果8月底公佈業績，盈利大升81%，股價翌日裂口急升17%，知錯了，諗住等佢調整先回補啦，事實證明強股係唔會有太多機會畀你買。

業績後裂口急升，之後一直沒有回吐，青冰亦百思不得其解，9月10日終於明白了，公司公佈控股股東減持5000萬股，佔4.79%股本，配售代理是高盛，作價7.01元，通告指是配予一個亞洲大型而高質量的投資公司，隨後幾天曾短暫穿過配股價，上周五從港交所的權益披露看到，這間公司就是高瓴資本，持股量由2.47%增至7.26%，消息浮面後股價自然再度急升啦，高瓴資本有幾堅，戰友可自行google一下。

由沽出至星期三，一個月升咗四蚊，感覺的確難受啊，尋常股份就由得佢啦，不過這是自己好有把握的愛股，所以要特地將整個故事寫出來，警惕自己，以後不要再犯同樣的錯喇。昨天再有大手上板，是上市前已經入股的OrbiMed基金批股，2500萬股，每股作價7.78元，留意返2500萬股只是佢持股的三分一，可見這基金雖然賺到爆廠，仍然相當惜售，至於是否又係高瓴資本接盤呢，過多幾日就知。

Fb個人專頁 http://www.fb.com/chingbing888