華富財經 Quamnet.com Logo
龔成
2021-12-29 16:00:12
【龔成問答信箱】(Q24071-Q24080)

Q24071:

老師想請問Epic Games既股票代號?你對呢個企業睇法可分享下?

有邊個企業擁有,thanks

龔成老師︰

Epic Games, Inc.是一家在1991年創立的電子遊戲與軟體開發公司,總部設於美國北卡羅來納州。目前是一家私營公司,並無上市。

當中最知名遊戲,就是"堡壘之夜"。這是世界上最受歡迎的遊戲之一,擁有超過3.5億個帳戶和25億個好友連接。

Epic開發的虛幻引擎,除了成為其遊戲世界的動力,同時應用於電影、電視、建築、汽車、製造和模擬訓練等多個範疇。

集團通過虛幻引擎、Epic遊戲商店和Epic在線服務,為開發者和創作者提供了一個端到端的數字生態系統,以構建、分發和運營遊戲和其他內容。

本身這間公司,在虛擬技術應用上,有一定水平。未來元宇宙,相信對其業務有正面影響。

集團股東包括不少知名企業,如SONY、騰訊(0700)等。現時騰訊佔大約4成股權,係其重要股東之一。

Q24072:

我想問埋. 美股房托ETF 邊隻好. 我想月供

龔成老師︰

Vanguard Real Estate ETF (VNQ)投資目標是扣除費用後,追蹤MSCI US Investable Market Real Estate 25/50指數。

其投資範疇包括辦公室、酒店和其他房地產類別。當中佔較大比重持股,包括American Tower Corp、Prologis Inc.等。

近期ETF價格上升左唔少,但長線用月供去儲貨,現價開始係可以。

Q24073:

呀Sir,你好。我上年買左你其中一本書係關於5年買樓4步曲,內容上你寫得好詳細,教左我好多野,買完覺得物有所值。

由於香港既樓市長期係供不應求,最近我家人想投資小物業,除左擔心銀紙會貶值,有塊磚頭始終係好d既。

睇完本書,其實我一開始係覺得買間面積300呎左右實際d,因為出租率高,最緊要係近地鐵,就例如朗屏單幢式大廈,但樓齡40年感覺到時轉手升值率唔高。

而最近舖天蓋地既長實盤LYOS, 主要集中開放式(200呎)同一房單位(280呎), 價錢係可以負擔到,我都有睇到你係本書度提到對洪水橋既樓價增長潛力評價係一般,

未能說向好,其中一個原因係土地供應多。最近林鄭既施政報告話重力發展洪水橋,令到我對洪水橋有些改觀,除左佢係未來既核心商業區,連接大灣區,

而且會提高就業率,就近會起地鐵站,港深西部鐵路。

問題:

1.呀Sir,你好,最後我家人係抽唔中LYOS, 你認為買新樓約10年內既樓齡好d,定係舊樓好d?

取代第一條問題

  1. 最近呀爺係內地推出打壓炒樓政策,令我擔心香港樓價未來會受影響,是否值得投資香港物業? 龔成老師︰
  1. 首先,現時香港整體租金回報率不高。若以值博率計,其實投資優質股會較好。

若你真係好想投資物業樓,其實我會比較建議買二手樓。唔好買一手新盤,因為會有溢價。變相令你係買貴左,影響你長線回報。

二手樓樓齡唔好話太耐,你之前講40年個間,就太長了。雖然你可以一直出租,但中間要做保養費用,可能唔少。而且你要轉手時,新買家較難承造長年期按揭,所以投資價值會弱左。

另外,單位最好有300呎以上,足以一個家庭基本需要,市場需求會較好。

地區上,元朗只係一般。由於本身元朗遠離傳統商區,投資價值已經打折。再加上佢係單幢式物業,樓齡都唔細,長線升值能力有限。

雖然政府新政策,會發展新界北﹐但其實好多野都未肯定。最終會點發展、是否發展成功,成立到新商區,吸引大企業進註、幾時完成相關發展工程等等,都存在好多問號。

所以,唔建議你因為新政策,而對元朗區發展,睇得過度正面。

  1. 香港跟內地樓市,本質唔一樣,所以內地的新政策,未必會應用在香港。

加上香港,本身的供求失衡問題嚴重,唔係一下子可以解決的事。因此,中短期香港樓市,相信都係會依然向上。

所以,香港物業依然有投資價值。不過,以現時水平,物業唔算平。所以,除非你資金好充裕,否則我較建議先投資優質股,個值博率會較好。

Q24074:

多謝成老師你既分析。我問完問題先發現原來你已經出左post特登講物管,已經有好詳盡既分析關於3319同6098。

經過琴日已突然反彈我今日入左第3注諗要真係跌返既話跌返多2成先入第4注。另3319其實係佢既投資者關係有講佢Q3業務成積,我計過下增速大約只有2成半到 (唔知我有無計錯),

可以未必有上半年既YoY 45%同再前下半年既YoY 45%. 新層面積係同業中位數既2/平方米。 另外我發現佢個gross profit 得~30% 屬於行業中較低水平

(我睇過行業係around 30-45%到) 所以我估亦可能係點解佢個PE比同業低。

同時睇老師你既post每次都有新既得著。好多謝你既用心同時間去出post俾大家學習。

其實講起我有少少慚愧。其實我係一個CFA, 不過只不過係一個考試機器而都係近呢一年先實踐投資。我想問有無你既書係適合較為追皆D既投資/估值方法?

龔成老師︰

唔好客氣,都係分享下一些睇法,希望可以令讀者有更全面的資訊,去考慮自己的投資計劃。

雅生活(3319)由於佢唔係集中住宅類,做得比較雜,由住宅、商用到公用物管都有。住宅以外物業,賺錢能力係無咁高,所以會拖低左佢個利潤率。

不過,同時因為佢多樣化,而避過中央政策的正面打擊。這類企業,可以做到分散風險效果,我覺得會係較穏健。

而且,住宅類物業增值,明顯已經放緩。未來物管企業增長力,相信會進一步轉移至非住宅類項目。所以,有提早佈局的雅生活(3319),長線可以睇高一線。

書本上,你可以先睇我架《80後千萬富翁》、《財務自由行》和《股票勝經》。之後,你想了解多D估值的方法,可以睇埋《選股勝經》和《年報勝經》,會有幫助。

讀CFA,唔可以話無用。不過好多人會有個錯覺,就係覺得完成課程,就等於"學完"。

其實,讀完一個課程,才是真正開始。因為你要用這些知識,去幫自己再累積經驗,成件事才會進步。我都經常提完成股票班同事,你得閒溫書,用我教架技巧,去自己試下做估值。

否則,你係唔會可能,長線保持進步。

所以,你明白到"實踐"的重要性,其實已經勝過好多人。只要你再花時間,去學好相關知識和磨鍊技術,相信你投資一定會做得好,加油!

Q24075:

老師你認為富途牛牛這投資平台值得信賴嗎?因為之前被大陸官媒點名批評過,其股價什至一度大跌,讓人有點擔心

請問老師有沒有其他投平台推薦

龔成老師︰

富途有在香港有證監會註冊,故這個投資平台係可信,因為香港監管其實係做得唔錯。

早前人行金融穩定局局長孫天琦表示,未在中國獲得許可的互聯網券商,如通過互聯網為中國客戶提供境外證券投資服務,屬於從事非法金融業務。

但富途本身在香港證監會註冊,故香港證券戶口客戶,相信不受影響。不過內地業務發展,就有負面影響,故近期股價都有明顯回調。

我自己無用開富途這類投資平台,都係用銀行,所以無特別推薦。

Q24076:

你好老師,本人24歲,由20歲畢業到依家都係freelance,每月不穩定收入,最高可5萬一個月,但有時萬幾蚊。

依家有2800月供$5000同每年要被保險$15000(類似儲蓄10年),同有買股票

目前儲左: 大概十一萬左右

  1. 想問有無可能30歲前,儲一百萬?
  2. 需唔需要再月供其他股票? 感謝你

龔成老師︰

首先,"保險"主要係用來防守,買足夠保障就可以。儲蓄成份架保險,唔係唔可以買。如果你個人風險承受能力好低,或者完全無投資能力,這類保險都有持有價值。

但始終係財富增值角度,佢幫助好有限,一般我都就唔建議太多。做財富增值,應集中投資在優質資產(如優質股、物業等),效果才會理想。

另外,以你平均收入計,每月只係月供$5000,係有點少。以你年紀,財務負擔應該不多,最好可以用每月人工一半,去做投資,就會較為理想。

  1. 我假設投資回報有10%(連股息再投資),你每月投資$5000,由20歲儲到30歲,大約會增值至95萬,故這樣安排相信都可以達至你的100萬財務目標。

  2. 你現時很年青,投資增值可以進取少少。在月供盈富(2800)以外,可以加入一些潛力股,去提升組合增長力。

比例上,潛力股可以佔組合3成左右。到你有較多投資知識和經驗,可以將潛力股比重,慢慢加大到5成。

以下都是一些有質素的潛力股,你可以參考下。另外,現時大市只在合理區,每月資金唔好盡用,而儲起部份,用來等大跌市出現的時候,去入平貨。

潛力股可選安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)、三星FANG ETF(2814)。如果有投資美股,可投資QQQ。

Q24077:

Hi 成哥,我啱啱23歲 買左樓,宜家手上持有以下股票

1810 400股@22.2

00175 1000股@12

1928 1788股@29.6

09888 100股@203.1

09988 100股@196.4

我應唔應該繼續守

我月入32000左右 供樓14000,黎緊想每個月買一手中銀收息 對沖反貸款啲利息,你覺得甘樣O唔OK??

想問下你意見

龔成老師︰

首先你要明白一個概念,我地持有一隻股票與否,關鍵位是企業質素、前景,不要被買入價影響。因為我地買股票就是買企業。

買入價,你的賺蝕,只是一個心理因素,該企業長遠的發展,才是我地是否值得持有的重點。

如果企業有質素,但股價短期下跌,就不用擔心,照持有就可以。

如果企業無質素,但你現時蝕錢中,繼續持有只會令你財富繼續貶值,因此要賣出。

如果企業質素轉差,就有可能要減持,因為這股佔你組合的比例,未必值得太多。

你現時持有股票,都係有質素,可以長線持有,但有幾個問題你要留意翻。

你而家太偏重左係潛力股(除了1928外,其餘都係),佢地雖然有增長潛力,同時風險都較高,不宜持有過多。

你算年青,潛力股可佔約5成,餘下應用以下平穏增長股。若你投資經驗較淺,潛力股比重,要再調至3成以下。到你學到一定投資知識,才慢慢調高。

未來時間,你就要加大翻平穏增長股部份,令組合更平衡。

而金沙(1928)由於續牌問題,不確定性高,現貨可保留,但暫時唔建議加注住。

至於入中行(3988),去對沖貸款利息,我就唔建議。資金應先用來買平穏增長股和潛力股,而非收息股。因為長線計,增長力會係平穏增長股和潛力股較好。

但若你所講的利息,係來自一些較高利率的貸款。你就應先還款,才去做投資。

Q24078:

老師,我屋企人有2018瑞聲兩手係65蚊買。貨就唔多既,但係都失望已經。主要係業績唔好,加上而家D人都比較著重鏡頭多過speaker,而且就算著重音質都係會自己用耳機。

想問下你如果想換注,你會建議小米,阿里定係6098碧桂園服務?定有其他選擇?

龔成老師︰

瑞聲科技(2018)雖然比以往高位,回調左唔少,但長線發展依然係正面。

集團本身有一定的規模與技術,近期業務受疫情影響,令手機出貨量下跌,直接影響到集團盈利能力。但相信只會係中短問題,長線會慢慢回復正常。

不過, 你預佢增長力不是好強,只能視為平穩增長類別。你手上持股,其實可以長線持有。

若你真係好想換碼,你所講的3隻股票,都係可以。但以現價計,小米(1810)值博率會高。現價算合理區中間部份,已可以首注。

Q24079:

你好老師, 我係股票新手, 留意左騰盛博藥呢隻股一排而家值得入嗎, 怕會高追, 請指教

龔成老師︰

騰盛博藥(2137)屬有危有機類。

佢主要從事生物製藥業務,專注於研發傳染病療法。候選藥物產品管線例如有BRII-179(VBI-2601)及BRII-835(VIR-2218):授權引進候選藥物(其中BRII-179為核心產品),許可範圍為大中華區(中國內地、香港、澳門及台灣)。

用於開發HBV(乙肝病毒)的功能性治癒,已在中國內地、香港、新西蘭、澳大利亞、泰國及韓國完成BRII-179的1b/2a期臨床研究,及正在中國開展BRII-835的2期臨床研究。

這類股較難分析,因為要了解藥品將來的價值,以及市場情況。只可以話有危有機,這股不建議大注。

Q24080:

你好,龔成先生,經媽媽介紹,幾個月前開始睇你的fb和書,本人有些儲蓄投資問題希望得到你的意見,謝謝。

本人42歲女,家裡有丈夫,10歲子,8歲女,丈夫做汽車維修買賣小生意,半年前賣樓,現在沒有物業,本人早前10年沒有工作,2020年2月開始投入番職場,

沒有儲蓄習慣,半年丈夫給了50萬現金,現在每月$20000家用,另工作薪金大約$15000,沒有投資知識及經驗,因為閱讀了龔成先生的書準備開始供股票。

請問除了每月供股外,手上的50萬現金我可以怎麼處理,龔成先生書中提及現金貶值,但我又未有知識用作投資。

謝謝你的寶貴意見

龔成老師︰

由於現金係可以無限發行,長線只會一直貶值。所以,我地做財富增值的目的,就是將現金轉換成資產的動作。除了令財富不被貶值外,更希望可以做到有一定增長。

我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。

你42歲,應以增值為主,建議你用「平穏增長股」 + 「潛力股」作組合,去創造一個增值平台。

由於你係初學者,對企業估值,點去定平貴未必太了解。我建議你先利用月供模式,去建立一個股票組合,以減低買貴貨風險。

現在你每月先用5成儲蓄做月供。其餘先儲起,用一邊月供一邊儲蓄的策略。

由於「潛力股」係需要一定經驗和有一定波動性,你經驗較淺,可以先集中在平穏增長股。

現時大市只是合理區,你現有50萬資金可以先投入10萬,用"分注"形式,慢慢買貨。餘下資金和每月所儲倒的資金,就等你有一定知識,或者大市出現一定程度的下跌,才加大力度儲貨,然後長線投資。

除了透過以上月供方法,去累積資產外。同時間,你要去努力增進投資知識,來提升你財富增值效果。你要多讀投資相關書本、年報,新聞和報讀相關課程。

書本上,你可以睇我寫架《80後千萬富翁》、《財務自由行》和《股票勝經》,都適合初學者。

另外,本人的【投資倍升股課程】適合初學者的,每一課後都會有指引比你,要你在一星期內找那些資料,溫那些內容,只要你跟著去完成,到你讀完整個課程後,你已能自己選股、投資、評估平貴,在投資上已掌握了一定的知識。