Q23281：
老師你好，關於股票私有化的問題想請教一下
華置（0127），獲大股東劉鑾雄家族提出私有化，每股作價4元，較該公司停牌前一天完整交易日收報2.18元，溢價83.5%。公司於公告內指出，私有化作價不會調整。
假設，我本身有華人置業股票，10元買入，而家華置私有化，每股4元，即係我會蝕6元嗎？我有無理解錯上面文字的意思？
龔成老師︰
係，如果你接受佢用$4私有化，你帳面就會輸$6。
作為投資者，你只有兩個選擇。
一，現價賣出。
第二，去股東大會，投反對票，博佢唔通過，但如果真的唔通過，股價會跌，要長遠先有機會上升翻（無人知能否上翻，要睇企業之後有無發展）。
其實我地是否接受要私有化，唔好從自己買入價角度去計，應從要有企業質素和佢將來發展，去考慮值唔值得放。
華人置業（0127）其實質素只是中等。
佢主要從事物業投資及發展、經紀服務、證券投資、放債及化妝品分銷與貿易業務。不過過往有一段時間，賣出了不少資產，並派了大額的股息，現時企業的業務發展力已不足。
往後只會平穩，同時較難再有大額股息，投資價值只是一般。停牌前價格，都只算係合理水平。
其實接受$4收購，再用這筆資金去投資更優質股票，其實可能會較好。
其實不少股東，見到自己企業估值偏低，都會增持股份。係一件平常時，唔一定代表跟住會私有化。
Q23282：
Sir 1833平安好醫生 當初係112高位入左 而定佢回落到56 需要溝一溝嗎？ 這隻股有潛力嗎？
龔成老師：
平安好醫生（1833）長遠有發展力。
佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。
平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。
企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。
雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。
因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區中間，但好波動，月供就得，如直接買入只能小注。是否加注要睇你持貨%。
Q23283：
老師，如果大部份資金都放咗入股票，要買物業係咪要套現？但股票蝕緊點算？
龔成老師
如果是投資性質就不用急。
如果買自住樓，就要睇自己逼切性，如果真的逼切，就要減股票買，但如果逼切性不高，可等多1、2年先買。
第一，可以有時間比你股票套現，第二，可以儲更多錢，第三，現時樓市唔算平，可以觀察下先。
Q23284：
你好老師，阿囡今年11歲，明年升中學，她是慳妹一名，都儲了點利是錢，想開始希望她學習理財及投資
從而將來早點達到基本財務自由，想請問你的書哪一本較適合她看及她現在可以做的第一步是什麼？謝謝
龔成老師：
知識最重要，我會建議份佢睇《我11歲，就很有錢》
、《80後2百萬富翁》。
佢要學理財知識，如果佢對這方面有興趣，可以之後在學校，選一些同商業有關的學科去讀。
如果佢有趣，可以幫助佢做些小生意，可以學到好多野的。
Q23285：
Hello龔成老師你好 第一次message 你問野
我暫時無做野 有一個小朋友 先生係專業人士，每年繳稅要$20幾萬 所以我地想搵退稅方法及增值方法
本身有買開少少股票，但認識唔多所以都無買好多同長揸多
另有一物業做投資 放緊租
以下係一d我搵過簡單又可慳稅/財務增值既方法 想知你既意見
- 扣稅年金同自願性供款強積金邊樣會好d? （各人買一份就可退$2萬多d..) 2.月供股票？
謝謝你
龔成老師：
扣稅年金同自願性供款強積金，是一些可以慳稅的工具，你可以考慮，不過，你最好問清楚這些工具，最終能在稅務上慳到多少。
至於用那一個工具，又或用不用，最重是睇你個人的「需要」，如果自己無實質需要，就不要強行進行，強積金可考慮的。
至於月供股票，無法慳稅的，但就可以視為累積財富的一種方法，由於月供股票是一個長期的累積財富工具，因此要選有素的股票，如果無選股能力，就投資指數基金。
由於你本身已有物業，因此在財富配置，建議你投資股票，能令組合更加平衡。
你可以投資平穩增股+少少潛力股，如果承受風險能力不高，就不要投資潛力股。
另外，如果每年的稅務問支大，建議你尋找一些專業的稅務顧問，了解一下無些有效慳稅方法，如果工作適合，以開公司模式，去合法地達到慳稅目的，都是一個方法。
Q23286：
多謝龔sir回覆，我已購入700，2800，9988
可惜我較早之前已入3333 $5.9入 ( 現價 $3.6 ), 3888 $38入 ( 現價 $32 ), 我應唔應該賣出止蝕？特別3333，跌得太誇張
謝謝回覆
龔成老師︰
你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
你新購入的股票，無問題。
至於金山軟件（3888）業績弱，相信中短期會較一般，要耐心少少守。佢主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。
業務有質素，長遠發展力不差，不過擔心股價較為大上大落，現價才算合理區頂位，你買入價係有點貴。
初步睇，企業仍有長線投資價值。你出現帳面虧損，主要係因為買貴左，而唔係佢核心質素出問題。
但此股始終有一定不確定性，如果你持貨太多，宜減少少，餘下要耐心，企業業務未必會太快好轉。
至於恆大(3333)，佢本身唔係劣質，但佢負債真係好多，當現時大環境轉弱，加上政策影響，令佢開始出現周轉問題。
雖然佢投資價值仲有，但風險高左。而且就算今天過到關，之後個質素相信都會比以往弱左。
若你持資只係佔組合好少，持有係可以。但持貨較多的話，最多沽出，保留部份博佢會轉好。
Q23287：
老師您好，如果31歲，月入23k，每月能儲17k
一直沒有想買樓，但最近開始心態改變
我的人工每年都會加1.5k
親人叫我學投資，前年開始買保險
- 想另外買保險儲蓄（10年期的），但是不是不太有效？
- 買樓是不是真的要樓換樓？
- 同事說月供股票較隱定，但我對股票不太熟 因為我對買樓沒什麼概念，感覺只靠儲錢很難買，所以買了老師的三本書準備學投資。
龔成老師：
1）保險儲蓄是一個防守性工具，對不懂投資的人說，都是一個擇，不過要留意，我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
你31歲，唔應該投資太多防守性工具，應集中「增值」方面。
2）你可以閱讀《5年買樓4部曲》。
一般人以「人工追物業」，這是一個錯誤的概念，我地應該用「物業追物業」，不要一下子買心頭好物業，而先買細價樓，慢慢再轉上去，因為人工與物業兩套不同的財富法則去運作。
同時，當你儲蓄買一個物業，不要單儲現金，要利用投資。
3）月供股票的原理，就是不斷儲股票，對於不懂掌握買賣時機的資者來說，能平均買入價，因此有平衡風險的作用。
其實原理如同儲錢，但不是儲現金，而是儲股票。
在選股時，要選有質素的股票，如果不懂股，就投資一些指數基金。
Q23288：
龔Sir你好今年一口氣上了你的兩個股票班，終於明白應該怎樣投資股票。現正努力溫習及檢視自己的投資組合，希望可以10年後成為千萬富翁。
附件為我現在的股票組合，現有以下問題，希望阿Sir賜教:
- 我持有25隻股票是否太多太分散？ 怎樣決定賣留那些股？
- 時常聽你說分注入貨，每注應該有多少？ 每注一手？ 或用價錢來定？
- 是否應該計算自己買入股票的平均買入價，用來計算賺或蝕了多少？
- 現在月供股票 $10,000, 分佈如下: 中電 $2000
煤氣 $2000
港鐵 $2000
領展 $2000
盈富 $2000
月供股票組合應否調整？
- 另有現金 $2,000,000 及 每月額外 $20,000 可用來買股票，麻煩阿Sir 建議一下我的入市策略。我希望10年後可成為千萬富翁，每月最少有 $50,000 現金流。 謝謝阿Sir 一直以來無私的分享!
龔成老師：
1）的確較散，你持有約25隻股票，你這樣會好難管理組合，我建議你整合一下，用以3個角度去進整合。
第一，優質度，質素較弱的就要賣，或不應佔組合比例太多。
第二，你持貨的比例，如果某股票或某行業的比例太多，就要減。
第三，你本身投資目標，如果該股與你的目標不匹配，就要調整。
我希望你長遠的持股，在15隻-20隻，會較易管理。
2）其實分注有好多方法，最重要的目的就是買入價平均，最簡單就是先定好你要買入的總金額，然後分3-5份，分注去買入。可以同時間平法，或價格平均法。
3）不要太過著重，雖然你都可以作為參考，但決定你往後財富能有多少增長，關鍵位不是你過往的買入價，而是你現時持那些股，以及當中比例，這些企業長遠的發展。
4）無問題，可以長期行，都是平穩增長類股。只要每月保持月供，同時留有一定的現金，就得。
5）時的市況約在合理區範圍，以穩健的角度，可投平穩增長類股，運用當中的$100萬已得。如果你年齡較輕，以及能承受風險，就可以部分考慮潛力股如：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177）、三星FANG ETF（2814），如果有投資美股可考慮QQQ，但就要明白波動性比上述會高左，同時風險大左，你要自己平衡。部分要等回少少先入。
Q23289：
你好龔成，我已看你的專頁5,6年了，也跟隨你買潛力及增值股，看到價值投資的威力，謝謝你！
背景:
我現年32歲，月入3萬，有一層自住物業，與老公一起月供約1.3萬，有約20萬放在按揭高息户口。另外，我們剛生左一名女兒，因此想整體評估一下現有組合，並想額外投資為女兒的將來打算一下。
投資策略:
一直月供投票11,66,1177,1211,1448,2800，最近停供了66, 1211，轉供了1177,1448，都想問下要不要停供1928轉供其他潛力股？
現時持有：
11 - 467股
66 - 1018股
737 - 500股
1177 - 513股
1211 - 807股
1288 - 1000股
1448 - 510股
2800 - 2453股
3988 - 1000股
謝謝你的幫忙！
龔成老師：
現時你持有的股票，基本上都是有質素的，整體無太大的問題，至於轉供其他股，你可以轉中生（1177）、褔壽園（1448）。
雖然長遠增長力會提高，但要明白，對組合的風險度高了，褔壽園是賺錢能力強的企業，但同時面對監管上的風險，原因是「太好賺」「影響民生」，因此都要明白有這風險。
你可以考慮加入恆生科指ETF（3067）去月供，當然，你睇翻整個組合，潛力股的比例會過多。
Q23290：
老師，有些關於樓的問題想請教一下？係旺角近先達附近有層舊樓，約58年樓齡，尚餘 1M按揭，家人舊年走左留低，
我一直未去律師樓辦手續，我好矛盾唔知應否賣咗佢分錢，好坦白講，理性上我覺得個地段好方便，賣咗又買唔返，而且其他家人又住緊，
情感上我唔捨得買，因為有家人的回憶，但唔賣，層樓好舊，又未聽聞有收樓重建的政策，但最近聽業主立案法團講政府要求裝返哂 d防火設施以符合最新防火條例要求，
可能要大維修夾錢，每戶夾十零萬走唔甩，我其他家人大花筒，不擅理財，冇積蓄，負債的，二家姐成日想我賣樓分錢，好讓她搬出去租 d靚樓住，但賣咗，
我細佬就無地方住，佢冇經濟能力，主要靠我供養，所以我成日想唔通應該點做好，老師，我個案有 d複雜，想聽吓你意見，謝謝！
哈哈，老師d班太多人，我諗應該冇乜機會face to face問到你野，太多人爭住同你傾計，所以我都係私下問好 d, 始終我家庭比較複雜
龔成老師︰
課堂上，我都比較建議，先問翻課堂上架問題。而你這類較複雜的個案，在這裡INBOX講會好D。
其實從家人回憶角度，係無得計，所以我只能從投資角度向你分析。之後，你自己再去平衡一下，到底點樣做，先最適合你。
由於你物業已經有58年，其實會出現好多保護問題。除非你係一心諗住住到老，唔會賣。否則，我建議愈早賣愈好。唔好諗等"收樓重建"，中架機會好低。
因為這個樓齡的物業，新買家好難做較耐的按揭年期，所以投資價值大減。
就算你放租，相信未來維護費用唔細，令你租金回報被蠶食。
至於你細佬架問題，我相信佢已經是成年人，對嗎? 他總需要自立門戶，成家立室。在賣樓後，佢都會分到一部份資金，可以幫助佢短期住屋問題。但長線，就得靠自己。
你唯一可以做，就係教佢自立和理財方法，因為你無可能一世照顧住佢。