臨過年前肺炎殺到，相信打亂很多投資者的部署，一月股市勢頭唔錯，連串發債配股新股，都打唔散個市，新經濟股愈升愈有，戰友可能會覺得貴，但其實都唔敢沽，怕沽咗買唔返。

星期一恆指高開，但青冰見到航空股、國內飲食零售及澳門賭股，分別跌4至5%，便開始感到不安，雖然很果斷的減倉，但亦怕是虛驚一場，減得不夠徹底，周二急瀉，自然覺得做對了，周三急彈，又會懷疑是否伊朗飛彈之役，一日就消化晒呢？但當肺炎殺到港澳地區，變成了切身之事，加上好友們瘋狂轉發真消息及假消息，除了肯定自己必須為家人設想，每天外出帶口罩之外，後市都唔太看得透。

今周兩地互聯互通先後休假，港股通周三開始休息，但周一及周二，雖然市況大幅向下，仍無損北水買貨的決心，仍錄得淨流入，似乎北水唔怕肺炎的影響。反觀北向的深股通及滬股通，經過連續幾個月的大量買貨，今星期有兩天大幅度流出，昨天外資更沽了94億元A股，由於A股重開是下星期五，而肺炎在外資眼中是看不透的重大風險，而這更是超過八天的風險，所以沽貨謀定而後動，都係正常舉措，加上昨天武漢封城，人心虛怯，昨天A股愈跌愈急，又係可以理解嘅。

昨天聽到有些戰友話，嘩痴線架咩，有啲公司受肺炎影響較輕微，但都係隊到開花，覺得極唔理性，青冰只想回應一句，市場係咁架啦，有超買升凸就自然會有超賣跌凸，何況港股在過去一個月超強，有個深度調整，但都未稱得上超賣。

由於我們身在危機當中，大家亦唔係專家，在流言滿天飛之時，在投資上好容易落錯決定，最常見是拿沙氏和今天比較，在疫情研究上可能有用，但套用在市場就未必work。青冰仍是會睇實那些領頭跌的股，主要看銀河(0027)、國航(0753)、海底撈(6862)及國內A股國旅(601888)，又或者近日因疫情而炒起的藥股口罩股等，在轉角位之時，必然會給大家一些有用資訊。

明天便是農曆新年了，今年必然要講的一定係身體健康，合家平安，而財源滾滾之類的，希望疫情過去便會來臨吧。

-- Fb個人專頁 http://www.fb.com/chingbing888