Q24331:
老師,我买了您全部的书,基本都看完了,有一个地方不明白,我想请教您一个关于企业估值的疑问,
09988阿里巴巴,2016年free cash flow (operating cash flow - capital expenditure)718亿, 2017年free cash flow 1061亿,2018年1154亿,2019年1480亿,2020年1902亿,free cash flow年均增长率20%+,我保守估计它未来10年的free cash flow增长率为15%,贴现率(2%的美国10年长期国债 + 8%风险溢价×0.86 Beta)= 8.88%
这时候free cash flow增长百分比15%,比折现率8.88%更高,最终计算出企业价值无限大
所以我使用第一年2020,到第10年2030年,free cash flow平均每年增长率为15%
请问是不是如下计算现在的企业价值
10年后折现率现在的企业价值=1902亿÷(1+8.88%)+1902亿×(1+15%)÷(1+8.88%)^2+1902亿×(1+15%)^2÷(1+8.88%)^3+1902亿×(1+15%)^3÷(1+8.88%)^4+1902亿×(1+15%)^4÷(1+8.88%)^5+
1902亿×(1+15%)^5÷(1+8.88%)^6+1902亿×(1+15%)^6÷(1+8.88%)^7+1902亿×(1+15%)^7÷(1+8.88%)^8+1902亿×(1+15%)^8÷(1+8.88%)^9+1902亿×(1+15%)^9÷(1+8.88%)^10
请多多指教,谢谢老师
龔成老師︰
對,大方向早這樣。
現金流折現法,是一個較為正統的估值方法。但佢係好難準確地應用,因為只要你其中的一些估算數字,有輕微偏差,個結果可以差好遠。
我地主要會應用,在一些有好平穏現金流的企業。不是不適用於高增長股,而是高增長股,計算是錯的機好高。
你試想想,你要預一個「永遠的增率」,根本極難得到結果的,所以出錯機會高,就算大行都是一樣。
因此,我課堂會教授另外幾個估值方法,以便學員針對性去進行分析。
Q24332:
以上係本人的投資組合,近呢三幾個月跌到咁,請教下,仲有冇得守,心好慌!
778、2、3067、66、1810、9988、1928、3
龔成老師︰
你要明白一個概念,我地持有一隻股票與否,關鍵位是企業質素、前景,不要被買入價影響。因為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心,照持有就可以。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
你現時持有股票,都係有質素,可以長線持有。近期大市氣氛較弱,就算再優質股票,都會有機會回調,係正常。
不過,你要留意翻,金沙(1928)受續牌影響,不確定性高左,暫時不要加注。
而阿里(9988)近期受政策風險影響,質素係弱左,但長線投資價值依然存在。但暫時不宜持有太多,投資時要控制注碼。
Q24333:
老師你好呀 我想問下你 我宜家做地盤 月入大約30000 應該有15000左右草起 想一半拎黎炒啲高回報既股
一半拎黎開始長期放係到每個月再加落去 平穩增長 平穩增長又可以點做呢 係咪一定要月供 我港股美股都有玩的
龔成老師︰
短炒好難賺錢的,股價中短期一定會有波動。而波動架原因可以同企業本質無關,只有長線股價才會反映企業質素,所以優質股一定要長線持有。
你見全球最賺錢架投資人巴菲特,都唔會做短炒,只會係做長線投資。所以,你唔好用短炒,作為投資方法。並以長線投資優質股為目標,會對你較好。
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
以你現時2X歲去計,還很年青,是財富增值的黃金時期。除了盡力儲蓄、投資、學投資知識外。也要把握這個黃金時間,做好財富增值部份。
策略上,你可以投資「平穏增長股」和「潛力股」。你每月5成儲蓄,即是用$7500做月供。其餘先儲起,用一邊月供一邊儲蓄的策略。
當然,你唔一定要月供,如果你自問已有一定投資經驗,當定平貴係有信心,你直接根據平貴水平,去部署入貨都得。但若你經驗較淺,用月供去平衡買貴貨風險,會係較有利。
如果你現時無太多投資經驗和知識,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資知識﹐潛力股比重可以相應調高,佔組合約3-5成,視乎你投資知識多寡和了解這些股票程度而定。
餘下的另一半現金,我地就等機會,當大市出現較大回調,就加大力度掃貨,然後作長線投資。
除了透過以上方法,去累積資產外。同時間,你要去努力增進投資知識,來提升你財富增值效果。你要多讀投資相關書本、年報,新聞和報讀相關課程。
書本上,你可以睇我寫架《80後千萬富翁》、《財務自由行》和《股票勝經》,都適合初學者。
另外,本人的【投資倍升股課程】適合初學者的,每一課後都會有指引比你,要你在一星期內找那些資料,溫那些內容,只要你跟著去完成,到你讀完整個課程後,你已能自己選股、投資、評估平貴,在投資上已掌握了一定的知識。
Q24334:
想請問一下,6823就咁睇個負債比率好似幾高,可以點樣理解?唔該你
龔成老師︰
香港電訊(6823)負債比率的確有少少高,但是否代表有問題,我地要睇埋佢本身質素。
由於集團業務收入穏定,加上佢有一定規模,在強勁現金流支持下,出問題機會較少。
因此,就算佢負債比率高少少,都可以接受。
Q24335:
阿sir,我想問聯儲局收水同放水會對經濟同股市有何影響?
龔成老師︰
聯儲局收水同放水的動作,有機會影響到資金供應和息口走勢。
若單以收水計,市場資金會減少,息口會上升,都係不利於投資市場。
但我地唔會單單以這個作動,去作出判斷。我地還要考慮埋背後原因,例如係經濟轉好才收水,咁係利好。
之後,再因應企業情況,才去作出投資決定。
Q24336:
龔成老師,什麼是ADR?如果要買這種股如何買?(澳門好似買吾到)
龔成老師︰
ADR(American Depositary Receipt),即係預托證券。
意思是一些不在美國上市的公司(如香港上市公司),在美國市場發行票據,令到美國投資者,可以在當地市場交易相關股票。
而港股ADR,就是指本身於香港上市的股票,再到美國市場上市的預託證券。
至於澳門能否買,你要向銀行或證券商再問清楚。我相信大銀行有提供的。
Q24337:
請問老師銀河宜家仲值唔值得月供?
龔成老師:
銀娛(0027)長遠仍有質素,但質素比過往減左少少,但不是劣質,不過,賺錢能力就比過往減少左。
現時賭牌進行初步的諮詢,仍有好多變數,銀娛在澳門有正面的貢獻,從資產質素、澳門發展、就業等角度,佢都做得不差,賭牌好有機會得到,。
初步分析,佢得到賭牌會過半。
要留意,現時賭牌的條款,要求加入政府人員,這無可避免地影響了企業長遠的賺能力,優質度及估值都會略減。
另外,全球疫情反覆,都對佢有不利影響,不過,相信這只是中短期,以長遠的角度分析,疫情因素影響不算大。
但由於仍有未知數,加上之前虧損,因此將企業估值調低左。
這股投資價值仍在,但由於優質度減左,以及有不確定性,因此,值得佔股票組合的比例,都會略減。
現價合理區中下部。
如果你月供金額較多,持貨%多,就不要再加。相反,只要月供金額不算多,可以繼續小注月供。
Q24338:
老師你覺得翔龍灣升值潛力會好過元朗ma?
龔成老師:
我相信翔龍灣會好少少,始終是市區,加上啟德新發展,對佢有利。
至於元朗,如果一些近鐵路站的,其實都不差,加上政府發展新界北都會區,長遠都對佢有利。
Q24339:
Hi 龔sir, 想問2806好嗎?咩價位先算合理區?
龔成老師︰
GX中國消費(2806)是被動ETF,並旨在提供在扣除費用及開支前,與Solactive中國消費品牌指數NTR(指數)表現緊密相關的投資回報。
其10大持股,包括貴州茅臺(600519)、蔚來汽車(NIO)、比亞迪(1211)、李寧(2331)、百勝中國(YUMC)等等。
這些股票,都有一定投資價值。但由於投資目標是消費品,會很受經濟週期所影響。此股有投資價值,但現價偏貴,最好等佢有較多回調,才開始入貨,或者用月供去儲貨都可以。
Q24340:
Hi, 想問美股Longeveron如何?買左少少。
見佢都有成功既藥,又拎到FDA認證,而且佢研究既範疇都幾正面同大路
龔成老師︰
Longeveron LLC (LGVN)是一家臨床階段的生物技術公司。該公司專注於開發針對特定衰老相關和危及生命疾病的細胞療法。
我未仔細研究這公司,初步睇佢業務,都有值得投資地方。
但問題係佢依然未做到收支平衡,故不確定性較高,見佢過往股價都極之波動。加上佢負債都唔少,係一個扣分地方。
若你想投資,係可以。但必需要控制注碼,同時預佢係較長線投資。