華富財經 Quamnet.com Logo
青冰
2020-04-24 09:16:34
別跟生科股談戀愛

港交所早兩年修例,容許未有盈利甚至未有收入的生物科技公司上市,首隻是歌禮制藥(1672),招股價14蚊,高開6%已是生涯中最光輝之時,昨天收市價係2.79元,累跌八成,不過之後的生化股都叫偶有佳作嘅,今天上市的康方生物(9926)就是第十三隻生科股。雖然擺明車馬冇盈利,但睇返過去12隻生科股,散戶只要純抽IPO唔長坐,獲利率都頗高,青冰專頁內有附圖,做了一些小統計,有興趣的戰友可睇吓。

 

這兩年的12隻生科股,只有3隻在開市價已穿底,最勁的是亞盛醫藥(6855),開市勁升55%,最曳的是復宏漢霖(2696)及中國抗體(3681),開市穿底4%,但表現都尚可接受啦,唔少有盈利的主板IPO,遇啱跌市,第一口價跌一成係閒事。

 

青冰都講過好多次,唔識分析生科股,睇唔通的,最佳策略便是hit and run,和生科股談戀愛,下場都幾慘,上文雖然話開市只有3隻穿底,但以昨天的收市價計,係有8隻潛水的,潛水率幾高,而且都潛得頗深,最深嘅係老祖宗歌禮制藥,而8隻裡有5隻,都潛緊三成以上。而表現最最最好的股,青冰早兩星期都在專頁內出post講過,康希諾生物(6185)累漲逾六倍之後批股,翌日跌了22.2元,但招股價係22蚊啊,可想而知升得幾誇張。

 

最近上市的三隻生科股,啟明醫療(2500)、康寧傑瑞(9966)及諾誠健華(9969),表現明顯比那些前輩好,啟明及康寧開市升逾兩成,而諾誠健華上月上市,可謂生於最動盪之時,只係高開5%,青冰還記得諾誠健華首日已錄得近400億孖展,但美股幾次熔斷,熔晒大家的信心,最後有過百億抽飛添。三者現時已累升七成至一倍,換言之上市後買,都仲大把水位。

 

可能是珠玉在前的關係,今日上市的康方生物,超購逾六百倍,凍資1650億,昨天暗盤升近五成,雖然氣勢咁好,但睇返同門師兄弟的歷史表現,高開咁多仲有冇水位呢,不過,即使你想食盡啲,都要謹記設下止賺,嚴格執行。

-- 

Fb個人專頁 http://www.fb.com/chingbing888