執筆之時心情都頗為複雜，真係唔知寫乜好，這一星期對於我們香港來說，實在是很大的衝擊，青冰的文章從來少沾本港政治，一來唔熟，二來免卻紛爭，有違青冰寫財經專欄的宗旨，就是分享炒股票的軼事。但有些事你唔理，唔代表最終唔影響到自己，最終還是要去面對的，行文至此戰友梗係覺得青冰要寫政治了，錯呀，仍然係想寫財經。

還記得早幾星期，在本欄題為「瘋狂轉發假消息」講過，現時假消息太多，真係少點道行都唔掂，不過只要沒有預設立場去看事物，有助客觀分析。奈何現時我們活在大是大非，非黑即白的年代，客觀分析似非市場需求，大家尋求的是啱聽、順耳的文章及意見，青冰一直以為在財經領域，應該唔會咁，但原來唔係啊。

例如這星期聽到的「兌換美元」理論，引來很大的迴響，作為一個普通市民，實在係較難理解聯匯的機制，當中涉及的不只是匯價，當中還有利率、遠期合約、銀行體系結餘及拆息等等，再深入些更會牽涉到儲備、外匯基金票據、貨幣互換協議等的串連關係，並不是一般人想的簡單。青冰有幸在工作上認識很多業界人士，問吓問吓都識多咗唔少，市場運作，同在書本上的仍有很大的距離，相對上，青冰覺得股票簡單好多囉。青冰也有想過，不如做吓功能請教吓人，出返個以正視聽的評論，後來又冷靜啲諗，大家都係想聽一啲啱聽的事吧，吃力不討好又花力氣，青冰不如做功課搵隻股炒吓好過啦。

係喇，結論都係回到炒股。這幾天的市很波動，跟「逃犯」完全冇關的股著實不少，但跌呢又會跟埋一齊跌，件事究竟點收科，要搞幾耐真係冇人知，但青冰肯定暫時不會碰土炮股，意即大部分生意都在本港的，相信資金在冷靜下來後揀股態度亦會有轉變。

Fb個人專頁 http://www.fb.com/chingbing888