每逢大市旺，難免都會有大型配股活動，而昨天收市後便有兩單，是藥明生物(2269)及融創中國(1918)，加埋超過120億元，是否會震散個市，今天便有分曉，今次主要想講吓藥明生物。

藥明生物在2017年6月上市，青冰首次認識此股，是在上市當日前兩小時，有前輩吹雞話隻嘢掂喎，背景雄厚，同前領導人有關，所以二話不說，先上車後研究，用開市競價買入，最後開25蚊，較招股價高21%，嘩乜高開咁多，不過開市後沒令人失望，最後以28.25元收市，升37%，而那個開市價25蚊，至今仍然是上市以來的最低價。

隨後的長升長有，戰友應該都清楚，可惜青冰道行未夠，坐得唔耐，你話坐到今天，真係爽歪歪呢。不過除了長升之外，戰友最記得的，應該就是配股，自2017年中上市之後，先後5次配股，換言之昨天的是第六次了，上市公司頻頻抽水固然非好事，但都總會美其名是集資作營運資金或收購，不過藥明生物六次配股，都是控股股東減持，上市時持有約75%股權，而昨天配售約5400萬股，按青冰的計算，最新的持股是36.2%，即係話兩年幾就將一半股權沽了出街。

尋常的股票，咁樣減持，仲邊有得升吖，接貨者必然血流披面啦，但藥明生物的批股神話就是，每次接貨的最後也會賺錢。2017年12月14日首次批股，作價40.25元，第二次在2018年6月19日，作價79.2元，第三次是2019年3月20日，作價77元，第四次在2019年6月18日，作價69.30元，第五次是2019年10月31日，作價84.80元，而昨天的配股，執筆之時未知定價，若以最低位定價，即95元，仍然比之前所有的價高。

較有趣的觀察是，除了2018年那次批股外，每次批股後，股價都在一星期內完成尋底，大概一個月左右便可回升至批股前的水平，而去年3次批股，有兩次都係股價向上突破，當天收市後便做嘢，而昨天股價一度急升6%創上市新高，結果沒令青冰失望，佢收市真係批股，不過是否會在一個月內收復失地呢，拭目以待。

以千三億的市值，又係藥股，流通量又高(梗係啦減持咗六次)，其實係好有機會成為藍籌，但礙於恆指今年將有變革，如正式許可W股入恆指，相信藥明生物的機會就極低了，所以最後及唯一機會應是二月季檢，但即使佢入硬恆指，對於一隻批股成癮的股票，相信戰友都未必敢博，對嗎？

-- Fb個人專頁 http://www.fb.com/chingbing888