上星期五，恆指服務公司季檢，恆指成份股沒有變動，而國指就加入旺旺(0151)、吉利(0175)、復星(0656)、太保(0966)及融創(1918)，經過幾輪的更新，加入了紅籌及民企的國指，H股的比重已下降至59%，所謂的國指，已不是以前的國企指數，而是中國企業指數了。

由於八月的投資氣氛較差，今次季檢都沒有太多大行出黎估恆指新貴，青冰在上周五本欄都有諗過點評幾隻有潛質的股份，不過在翻查資料之後，打消了念頭。所謂的資料，其實是恆指的編算細則，這個只有13頁的小文件，清楚列明有潛質的新貴，需要具備有甚麼條件，其實最重要係得兩關，市值及成交，當然如果同時有幾間入圍，就要睇埋財務表現及行業代表性。

點解上星期欲言又止呢，因為青冰心目中的幾間潛在新貴，欠了一樣嘢，就是資歷，亦即係上市時間，在恆指編算細則列明，如果你的市值已經係全港頭五位，理論上係可以上市三個月就染藍，排名低啲就要耐啲，如果市值排名在二十五位之後，就需要兩年的上市時間，才符合條件，而青冰想講的那幾間，全部都未夠兩年啊，所以慳返唔講喇，依家可以提返啦，分別是海底撈(6862)、翰森(3692)、藥明生物(2269)、藥明康德(2359)，而夠兩年又未入得到的，就有安踏(2020)及中國燃氣(0384)。

如果單以市值及成交量計，其實仲有唔少內房、內銀及內險有資格的，但只要你睇返恆指現時的成份股，就知以上三個行業已經爆晒額，需要減而不是加。而上面提過的幾間公司，都係市場上的熱門股，市值大成交旺，屆時如果夠兩年而又未炒爆的話，絕對有機會染藍。

跟開青冰的戰友都知，青冰經常不滿恆指的選股準則，以市值及成交行先，往往都只會滯後地選了一些炒過籠的股，究竟有幾多隻入咗恆指後仲持續交出表現，真係唔多囉。而另一個詬病的，就是挑選新貴的那把尺，很少會放在現有的藍籌中去量度，例如有些藍籌，平常成交都唔夠1億元，例如信和(0083)、旺旺及長建(1038)，市值又唔係特別大，究竟係咩原因阻礙到新舊交替呢，可能是背景吧。

舊嘅唔去新嘅唔來，內銀又唔郁得，地產股又唔郁得，郁來郁去都係工商類股份，恆指了無生氣也是可以理解的。

Fb個人專頁 http://www.fb.com/chingbing888