Q24251：

您好！輸了很多，近年脚患，工作困難

銀行債務纏身，盼望提示優質股票來還債及維持生活所需。

腾訊700: 在$575入了，請問如何操作？

另外，恒指基金在25025入了，請問如何操作？

龔成老師︰

我明白你困境，希望在財務安排上作出一些轉變，去令生活走出困境。

但我希望你先明白，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。由於係長線計劃，你唔好預期佢對你短期財務上，會有任何幫助。

而且，我地做財富增值的資金，一定要係閒錢，唔好拿生活開銷去短炒，咁係好危險。建議你要先整理好現時財務狀況，每月再有一定閒錢，才好作投資。

你現時狀況，工作不太穏定。我建議你先預留一筆資金，大約等同半年開支，以備不時之需。

至於債務，如果利率較高的話，你必需先清還，後投資。否則，佢會蠶食去你不少投資回報。就算不能短期清還，也看看有無一些較低利率的貸款，可以取而代之，從而減輕你利息支出負擔。

至於你現有投資(恒指基金和腾訊)，都係有質素。但現時大市較疲弱，你預中短期都會較波動。但長線持有，係無問題。

到你將來每月有一定閒錢，你才用來月供股票，去慢慢累積財富。

Q24252：

龔Sir…如果我手上的資金每個月，月供只可以揀小米或者中生，你覺得我應該揀邊隻呢？

投資新手，謝謝你。

因為3067我可以一手手買，所以我就唔選擇啦！

龔成老師︰

我會建議你月供中生(1177)，因為安碩恒生科技（3067）是追蹤恆生科技指數表現的ETF，而恆生科技指數中，已包含左小米(1810)在內。

當然，如果你係好睇好小米(1810)，你照月供小米都可以。

我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

另外，你現時全部股票，都係潛力股類。佢地雖然有增長潛力，同時風險都較高。作為一個新手，不宜持有過多。

如果你係年青至中年人士，可以持有約3成，到有一定投資知識，可以加大至5成。若你係較年長，最多佔1-2成好了。餘下應用以下平穏增長股，咁會較理想。

Q24253：

HELLO龔Sir, 近來股市跌了好多, 我持有700, 2318及1024, 全部都跌。我是沒有分析企業未來的能力, 所以想問問龔SIR意見

700受國策監管, 前景如何?還有高增長的能力嗎?

2318前景如何? 我當初買是想當它是收息股, 這想法正確嗎? 可以持有嗎?

1024 是令我最擔心的，最近公佈的業績比預期好, 但股價仍然大跌, 這股可以持有嗎? 前景如何?

謝謝龔SIR

龔成老師︰

現時全球股市氣氛，都係較為疲弱，下跌都是正常，而且你預中短都會好波動。

但作為理性投資者，我地唔好比而D氣氛影響左。我地考慮焦點，應該集中翻係企業長線質素上。就算佢中短期下跌，只要個本質無問題，我地都可以照長線持有。

騰訊（0700）受政策因素影響，中短期弱，企業的賺錢能力會略減，以及企業估值都會略減。不過，相信政府唔係想佢經營唔到，只係想加大規管，令佢賺錢減少。

此股依然K月長線投資價值，但增長力唔會有以前咁強。現貨可以持有，但由於政策不確性都大，暫時唔建議持有太多。

中國平安（2318）有質素的，佢有規模，有品牌，近年的發展都不差。

不過，因為近期出現一些不利因素，令股價都比較波動。例如佢背後持有一些企業，出現債務問題。加上疫情期間，佢生活都有受到影響。

但我地投資時，個著眼點應放在長線投資價值之上。現時對佢不利因素，主要係中短期，而且都算唔核心性。

因此，這股長線投資價值依然存在。但佢唔係收息股，除了高派息，都有一定增長力，所以個價都會較波動，要留意。

快手（1024）都有一定潛力，但由於依然係虧損，故不確定性較高。所以，當大市較弱，或者有負面消息出現，就會有較大幅度調整。

這類股的分析特點是將來，等之後的收成期。此股有長線投資價值，你預短期股仍會十分波動。

若持貨不多，可以守。如果佢佔你組合已有一定比重，最好沽少少，去平衡風險。

Q24254：

龔sir , 1177，1448，1928，9988，1810 , 6969 質素有無改變?是否值得長期持有?

龔成老師︰

其實以上股票，都受到不同程度的中央政策風險所影響。

好似金沙(1928)要續牌、阿里(9988)業務被加大監管力度等，都令佢地賺錢能力弱左。不過，長線投資價值依然存在，現貨可持有。

但思摩爾國際(6969)、金沙(1928)、阿里(9988)是當中不確定性較高的股。

若你持貨不多，可以守。但如果有較多貨的話，可能你要沽少少，換碼至其他優質股，去平衡風險。

Q24255：

老師，想問下騰讯音樂 TME 美股之前-買股價下跌，是否值得長線持有

龔成老師︰

騰訊音樂 (TME)業務主要為在線音樂娛樂平臺和音樂應用，公司的主要平臺包括QQ音樂、酷狗音樂、酷我音樂、WeSing、酷狗直播和酷我直播等。

此股有投資價值，暫時睇佢發展都理想。不過過往股價都幾波動，現要算回調至合理區中上部。

你現貨可持有，若現時只有好小注，現價加少少係可以。但此股有一定不確定性，要控制注碼。

Q24256：

老師你好，初頭我銀行月供一，兩隻好大機會輸手續費同存倉費，對我影響會吾會好大？

另外如果我揀66,823,3067又如何？

另外如果我揀6,66,823月供3067直接買入又如何？

龔成老師︰

如果你可月供金額不多，你可以集中供1隻指數基金。

令到你月供費用佔投入比重下降，或者你可以儲埋D錢，夠一手才自己去買，都可以。

以你2X歲年紀，月供港鐵(0066)、領展(0823)和安碩恒生科技(3067)會較合適。而電能(0006)只係收息股，增長力唔高，唔適合你年紀。

不過，你要記住。長線我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

Q24257：

阿sir 恒生銀行11可以買嗎？

或者2388中銀香港邊隻好D？

龔成老師︰

恆生(0011)和中銀香港(2388)2者都有質素，前者會較平穏，主要係收息為主。

而後者，除了有一定派息外，都有一定增長潛力。但同時間，風險都會較高。

若你係年青至中年人士，可選中銀香港(2388)。如果你係中年至退休，恆生(0011)會較為適合。

Q24258：

wht causes the rise tday

do u think it will rise or drop tmr

龔成老師︰

每日指數升跌，可以由於好多不同原因組成，所以好難估。

你要記住，我地做投資決定，唔係靠睇走勢，咁係好危險。因為我地買緊係一間企業，你要知道的應該是其質素、行業前景、財務數據等，去分析佢有無投資價值。

之後，再透過估值，去了解佢現時平貴度，從而制定投資策略。

Q24259：

老師，唔好意思，可否幫我重組一下重新配置

2845、3067、9988、9911、1810、1931、2800、0003、0981、1177、1448、1610

其中阿里巴巴月供4000

盈富月供6000

龔成老師︰

現時你持有的股票，大致上都不是無質素的，質素方面係無問題，只是在配置上，怎樣優化整合，去令成個組合更適合你個人情況。

你而家太偏重左係潛力股(除了2800,0003,1610外)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

另外，由於阿里(9988)近期受政策影響，雖然長線投資價值仲係存在，但預期賺錢能力會弱。而且，不確定性暫時都高，你本身有一定持貨，建議你停一停個月供先。

華檢醫療（1931）和中糧肉食(1610)質素只屬一般，故不宜大注。

Q24260：

龔成老師，想請一下，現在我月供以下股票各1000蚊，請問現階段需否轉供其他股票，例如不供2318轉其他股。

另外，我可以每月多1000作月供，想問下加碼供以下股好，還是用1000蚊供其他股好呢？

700

1177

2318

2800

龔成老師︰

緊記月供係一個長線計劃，月供最少維持3年，並持有這些股票5年以上，才會有較理想效果。

當然，可以的話，最好一直持有。因為，優質股持有時間越長，財富增值效果就會越理想。

除非，現時個股票已經"嚴重"偏離合理值，又或者佢長線質素轉差，否則我地係唔會換碼。

你上述月供股票，都係有長線投資價值，無需要轉換月供股票。但你這個組合，是由於平穏增長股(2800, 2318)和潛力股(0700, 1177)構成，若你係年青至中年人士，這個組合係合適。

如果你係近退休之年，潛力股不太合適，應將轉為收息股，去創造現金流會較好。