Q23741：
老師想問下META ETF新推出點睇?見入面d大既成份股都係有質素既大股, 但怕會唔會新推既ETF有炒太熱既情況出現thx!
龔成老師︰
Roundhill Ball Metaverse ETF(META)主要目標係扣除相關成本後，貼近Ball Metaverse Index表現。
元宇宙係近期一個熱門話題，其發展有機會顛覆現有互聯網生態，加上成件事可塑性高，預計元宇宙前景係正面。
該指數主要追蹤一些計算、網絡、VR平台、支付、數位資產、電子硬件等行業股份。較大比重股票包括NVIDIA, ROBLOX, MICROSOFT, 台積電, 騰訊,AMAZON等，都是有質素的公司。
不過，元宇宙依然係好初型，到底長線邊D行業或者企業會受惠，都係未知之數，故投資該項目，有一定不確定性。
加上近期相關股票，都被市場炒起，現價算是合理區頂，至略貴水平。無貨可以現價小注，等有明顯回調，才開始正式慢慢儲貨，咁會較穏當。
Q23742：
你好龔sir ，近日有些現金需要。之前買咗30幾萬股票而家剩返20幾萬，想請教你如果我想放幾隻股票拿取現金，我應該選那幾隻股票比較好？？
4、435、2638、3988、1429、6166、81、588、1727、1398、386、2007、2202、775、588、2009、3033、2628、9633、6600、788、152、1398、6993、777、2126、2160
十分感謝你的幫忙，謝謝
龔成老師︰
以你3X歲年紀，我建議集中保留有增長潛力和有質素的股票。你可以優先沽出以下這些質素較弱，或者收息類股份。
天任集團(1429)
河北建設（1727）
這兩股是劣質股，盡快賣出
以下增長力較一般，你都可以考慮賣出
九龍倉（0004）
陽光(0435)
港燈(2638)
中行(3988)
中國宏泰發展（6166）
中國海外宏洋(0081)
北京北辰實業股份（0588）
工行(1398)
中石化(0386)
碧桂園(2007)和萬科(2202)這2隻內房股風險唔細，若你沽出以上股票，依然資金不足，可以再沽埋這2隻。
同埋，我發現你組合中股票，不是質素和增長力較弱，就是風險過高的股票。
你未來再投資時，記住要加入翻一些平穏增長股作重心，否則你個組合會好唔穏定。
Q23743：
謝謝老師回應，我終於開始嘗試入市。還有個問題，老師常常說「市場」，如「市場唔係咁睇」、「市場認為你只係值咁多」。
究竟咩係「市場」？係大多數人？大多數投資者？「市場」看法好似係無死錯人咁，但大多數人卻唔係。究竟係咩市場？
謝謝。
龔成老師︰
我經常講架「市場」，主要係講投資者，一班行動會直接影響到股價的人。
「市場」上投資者，對一隻股票的睇法改變，就會有機會令股價變動。
但我地唔係跟著「市場」反應行動，就一定正確。我地要分清，這個是「市場」短期定長期的睇法，長期係講緊1-2年，甚至更長時間。
中短期市場變動，有機會係投資者受一些主觀情緒影響，做出不理智決定。但長線，通常都常都會反映出一個較合理的甪看法。
所以，當我地判斷一隻股票時，發現有1-2年以上時間，投資者都願意出比以往較高價錢去入貨。就代表市場認為這間企業估值，係提升左。所以，我地估值上，可能要作出相關修正。
Q23744：
龔 Sir, 你好
請問我需要調正這些股票嗎
銀娛 8手 @61
粵海 3手 @13
維他 2手 @30
龔成老師︰
以你年紀計﹐持有這些股票係可以長線持有。
而銀娛(0027)因賭牌問題，仍有好多變數。銀娛(0027)在澳門有正面的貢獻，從資產質素、澳門發展、就業等角度，佢都做得不差，賭牌好有機會得到，不過，政治因素就是不確定，這點好難準確分析影響是否大。
初步分析，佢得到賭牌會過半，但政治是一些不能預測因素。
要留意，現時賭牌的條款，要求加入政府人員，這無可避免地影響了企業長遠的賺能力，優質度及估值都會略減。
此股長線投資價值依然存在，但風險度係高左，故暫時要控制注碼。
這2隻股票，都不宜持有太多。
Q23745：
-
老師我而家有40萬現金，投資初學者，打算買入四隻股票，藥明生物、完美醫療、金沙、贛鋒鋰業，各佔7-8萬，留大約十萬現金，請問這個組合有冇問題？同埋買入合理價幾多？
-
龔成老師，嘉泓物流有咩睇法，想7.8入
龔成老師︰
- 以你80後年紀，投資上可以較進取，但你現時4隻股，不是高風險的潛力股，就是較大不確定性的股票。
藥明生物（2269），主要提供有關生物製劑藥物發現、開發與生產服務。
佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。
潛力是有的，因為過往的財務數據的確理想，但現時的估值唔平，這刻投資值博率一般。
不過，這類股好難話現價一定貴，因為佢有好高的增長，只可以話現價唔平，但如果之後有高增長，那就未算太貴。只可以話，如果你真的想投資，小注好了，你要明白業務有不確定性，同時股價會好波動。
贛鋒鋰業（1772）是潛力股，但估值較難，分析時的確資料較少。由於上市年份少，我地較難有長期數據分析。
佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。
其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。
我相信佢長遠有潛力，有長線投資價值，問題只是平貴度的問題。現價偏貴，小小注好了，之後等佢回落先正式入貨，始終行業有一定的變化。
至於金沙(1928)，由於續賭牌有一定變數。現價合理，但暫時不宜太大注。
完美醫療（1830）長遠有發展，本身有一定的質素。但不確定性偏高，同樣小注好了。
除了以上股票，我建議你加入一些平穏增長股，去令你組合不致過高風險。
- 嘉泓物流（2130）係總部位於香港的物流解決方案供應商，主要經營以下兩項業務：
（１）貨運代理服務：提供空運及海運代理服務（包括收到客戶之預訂指示後安排托運、貨物取件等
（２）配送及物流服務：主要分類為倉儲及增值服務（包括取件及包裝、掛衣設備、標籤、分類等。
睇翻佢的客戶，有零售商（如Ｔｈｅ Ｌａｎｅ Ｃｒａｗｆｏｒｄ Ｊｏｙｃｅ Ｇｒｏｕｐ）、品牌擁有人（如Ｋｅｒｉｎｇ Ｇｒｏｕｐ）以及葡萄酒批發商及零售商（如Ｌ’Ｉｍｐｅｒａｔｒｉｃｅ）等
企業規模唔算大，業務算可以，生意與盈利都有上升，整體質素算是中等。
由於規模細加上股價有波動，因此這股有少少風險，現價合理區上部。
如果你等佢回到$7.8先入係可以，這個水平會較合理，值博率都較高。
Q23746：
老師，幾時入1211好
我走咗一轉，想再入
龔成老師：
坦白講，現價略貴，不如考慮：GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。
持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。
此股現價合理區頂至略貴。無貨可以現時入少少，到有明顯回調才再慢慢加注。
潛力度是有的，但會比較波動，如投資宜慢慢分注，可長線。
Q23747：
Hi, 26歲，做左2年野左右，本身係月光族，月入24000，有10000蚊投資，想睇下可以點分配
龔成老師︰
首先，你要想辦法令自己脫離月光族的狀況。要透過開源節流，盡力為自已每月空出一點資金，去做月供股票，來累積資產。
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時26歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。
策略上，你可以投資「平穏增長股」和「潛力股」。如果你每月有$10000可儲蓄，就先用$5000做月供。其餘先儲起，用一邊月供一邊儲蓄的策略。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
餘下的另一半現金，我地就等機會，當大市出現較大回調，就加大力度掃貨，然後作長線投資。
同時間，你要去多讀投資相關書本、年報，新聞和課程，努力去加強自己投資知識。
書本上，你可以睇我寫架"80後百萬富翁"、"財務自由行"和"股票勝經"，都適合初學者。
另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
Q23748：
Hi龔sor 見到你隻1211，好勁！恭喜你！
借位問下 比亞迪電子又點睇？
龔成老師：
哈，多謝！
比亞迪電子（0285）這股正面的，佢是1211的子公司，主要從事製造及銷售手機部件、模組及其他產品、提供手機設計及組裝服務，以及提供其他電子產品的部件及組裝服務。
過往發展正面，有技術，前景不差。長遠睇好佢的。
如果考慮佢近年的增長，現價合理區中間至中下。如果之前有貨，可以長線持有，由於股價波動，現價小注分注可以。
Q23749：
早晨呀成哥，請教一下對於Global X 中國電車（2845）及GX 中國潔能（2809）有咩見解。呢兩隻etf適合長期投資嗎？
龔成老師：
兩隻都有潛力的，但要留意都唔平，因此這刻只建議小注或月供。可長線。
GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。
持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。
此股現價合理區頂至略貴。無貨可以現時入少少，到有明顯回調才再慢慢加注。
潛力度是有的，但會比較波動，如投資宜慢慢分注，可長線。
GX中國潔能（2809），其目標為追蹤SOLACTIVE中國清潔能源指數NTR之表現。
當中佔最多為"半導體產品與設備"股份，約組合4成，其次是逾2成的"獨立電力及可再生電力"。
此股平貴不易分析，而且頭10大股份中，除了信義光能（0968）外，其餘都在內地上市。
潛力度是有的，但會比較波動，如投資宜慢慢分注，可長線。
Q23750：
你好龔成老師，本人快40了，想請教下如何調整現有投資組合，是否應沽出/減持銀行股，轉投入吉利 或 比亞迪電子比較合適？現價9988可增持嗎？謝謝！
現時股票組合如下：
香港中華煤氣有限公司 (3) 3024股@ 17.30
思捷環球控股有限公司（330）600股@ 50.00
中國建設銀行股份有限公司—Ｈ股（939）3000股@ 8.00
金利豐金融集團有限公司（1031）4000股@ 6.00
工商銀行—Ｈ股（1398）4000股@ 7.00
醫渡科技（2158）1000股@ 65.15
京東健康（6618）50股@ 71.00
阿里巴巴－ＳＷ（9988）500股@ 250.00
謝謝老師
龔成老師︰
以你年紀計，應以增為主。
你現時組合，要先處理我之前講的思捷環球（0330）。因為大環境改變令佢「生意持續下跌」，質素已經改變左，要進行止蝕沽出。
另外，金利豐金融(1031)質素一般，都建議你慢慢換去其他股票。
至於內銀股，工行(1398)和建行(0939)主要係收下息，增長力不高。你持有係可以，但預佔你組合最多2成好了。
未來資金，你應集中在有增長力股票上。吉利(0175)、比亞迪電子(0285)係可以，但吉利現價算係合理區頂至略貴，最好等佢回少少才入。
而比亞迪電子，現價在合理區中上部，已可入首注。
至於阿里(9988)，由於已佔你組合一定比重，唔建議加注。因為個股高於組合15%，就會有過度集中性風險。
以下都是一些適合你的股票，你可以參考下，但由於你投資知識不多，要先集中在平穏增長股。到你知識提升左，才慢慢加大潛力股部份，會較穏當。
平穏增長股︰指數基金、恆基（0012）、平安(2318)、中銀（2388）、港鐵（0066）、長建(1038)、領展(0823)、粵海(0270)。如果有投資美股，可投資VOO。
潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。
平穏增長股，現處於合理水平，可分注入市。但潛力股，部份係略貴。
現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、小米(1810)、QQQ勉強算在合理區中間至頂部，可分注入貨，其餘都略貴，想買就要等一等。