貿易戰去到首階段的末段，現在談的已不是deal唔deal，而是幾時簽，及首階段包啲乜，雖然來到末段，但消息仍是很飄忽，昨天早上有傳聞話簽約時間由十一月推遲至十二月，人仔即時轉弱，由低於7算上返7.02，但午後商務部又講幾句，重點係話中美雙方同意在首階段減關稅，港股即時急彈，人仔又去返7算之下，跟車太貼，真係好容易左一巴右一巴。

由於現時的焦點在於降關稅，往後選股方面，可從之前受關稅打擊得較嚴重的入手，不過降關稅降幾多，為期幾耐，有冇指定行業，都是要等細節出來。而青冰亦即時想到，因貿易戰打擊，內地降稅減費力谷內需，用以刺激經濟，而熱炒的內需股，已經由貴變成好貴，再變成超貴，雖則強化內需是大趨勢，但會否借勢調整，促使部分資金換馬至早前受害的股份，臨近年底，更加需要提防啊。

而另一個重點就是人仔，過去半年內憂外患，人民幣匯價幾乎是一面倒看淡，而一直是強大心理關口的7算，更在8月升穿，目標睇7.80都大有人在，情況有如早兩個月唱恆指跌一萬點，亦都係會有人信。早前因人仔下挫而受害的重債股，如內房及航空股，可能值得再度留意，不過，個別內房賣樓條數好得，這個月來都升返唔少，是否值博就要逐隻細心睇喇。

貿易戰其中一個重點，就是要內地開放金融市場，又會唔會推郁長期唔掂的內銀股呢？最大那幾隻可能未必有水位，但不要忘記，其實仲有十間八間青冰同你都講唔出名的內銀，是在本港上市的，日後會否成為併購對象呢？

不過仍然係嗰句，現時貿易戰看似好順暢，歌舞昇平，侵侵亦唔得閒出來搞亂市場，通常這個情況，就會震一震，如果戰友想入市而苦無機會，就睇吓你把唔把握到喇。

-- Fb個人專頁 http://www.fb.com/chingbing888