華富財經 Quamnet.com Logo
龔成
2022-01-05 10:00:11
【龔成問答信箱】(Q24111-Q24120)

Q24111:

龔sir你好,我follow咗你一段時間,你的意見真的很實用很真誠,首先在此表達我的謝意

不好意思,這次要阻你少少時間,請教你一下,因我手上持有了農夫山泉9633已一段時間,請問建議繼續持有嗎?謝謝你龔sir

龔成老師︰

多謝你的讚賞!

你要先明白一個概念,我地持有一隻股票與否,關鍵位是企業質素、前景,不要被買入價影響。我不知道你而一刻,到底帳面是賺定蝕,但不太重要。

因為我地係希望透過持有優質企業,等佢自然成長,以達至財富增值目的。所以,買入價只是一個心理因素,如果企業核心因素未被影響,我地係唔需要理會。

農夫山泉(9633)有質素的。

是中國包裝飲用水及飲料的龍頭企業,旗下品牌包括農夫山泉、東方樹葉、尖叫等。佢係中國擁有10個區域取水許可證,並在其周邊建立生產基地。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告,2012年至2019年間,連續八年保持中國包裝飲用水市場佔有率第一的領導地位。

業務上,的確有吸引力的,不過,我一向都新股半新股都無興趣,因為真實面要慢慢先見到。此股可投資,但只建議小注,同時你要明白當中的風險。

由於有一定的品牌價值,因此企業質素與發展正面,財務數據不差,生意與盈利都有理想增長,不過上市不久,股價較波動,同時上市前數據可能執靚過,因此要注意風險度。

此股係有長線投資價值,現貨照持有,係可以的。

Q24112:

龔成龔成,6098之前配股,佢會幾耐先升得返上70??

而家又係未入巿好機會?

龔成老師︰

幾時會升翻上$70,無人會知。最重要係,到底這隻股票背大跌原因,同埋長線仲有無投資價值。

碧桂園服務(6098)公布,配售1.5億股新股,相當於擴大後股本4.45%;配售價53.35元,較停牌前收報折讓9.5%。

配售本身,會造成發股票,令現有股東的每股盈利被攤薄。故對現有股東,係不利。不過,新資金能創造更多新價值,則另作別論。

集團今次配售所得淨額80.02億元,主要用作併購用途,以強化自身競爭力,特別是在商業寫字樓及商業管理服務、社區增值服務、城市服務、設施設備管理服務等領域。

碧桂園服務(6098)本身有一定質素和規模,加上行業正在快速發展,要增加資金,作為未來發展和併購之用,都合理。

整體而言,此股有長線投資價值。不過,雖然佢股價回調不少,但都只算合理區中上至頂部,無貨可首注。但由於未算平,故暫時要控制注碼。

Q24113:

你好,龔sir!想請問你有關美股Usana(USNA)是否巴菲特都持有?你對這企業的評價怎樣?還有對同行Nu Skin(NUS)又有怎樣的睇法?

謝謝!

龔成老師︰

USANA Health Sciences Inc (USNA)主要透過自家科研技術學,創造營養和個人護理產品。

集團產品線包括營養優化劑、必需品/細胞必需品、食品、個人護理和護膚品等。

初步睇佢都有投資價值,但你預佢係平穏增長型,唔係爆升類。現價算合理區中上部,無貨已可以首注,並長線持有。

Nu Skin Enterprises Inc (NUS)通過全球直銷公司Nu Skin從事開發和經銷“Nu Skin”、“Pharmanex”和“ageLOC”品牌的通過全球直銷公司Nu Skin從事開發和經銷“Nu Skin”、“Pharmanex”和“ageLOC”等品牌業務。

當中包括美容、個人護理產品和保健等產品。業務覆蓋中國大陸、韓國、東南亞、美洲/太平洋、香港/台灣、歐洲、中東和非洲(EMEA)和日本地區。

業務上,都有投資價值,但增長唔算好快,是一家平穏增長型企業。此股都有投資價值,現價合理,可以分注。

但要注意翻,由於2間公司業務性質相近,係投資時要控制注碼,以免過於集中單一行業。

個別企業和行業,不要佔組合15%和30%以上,銀行業更加不要高於組合20%,否則會有過度集中性風險。(盈富這類一籃子組合ETF,則不受此限。)

在創建組合初期,組合金額較少,出現超標都係可以接受。但長線你要參照這指標,去維持組合的平衡性,才算理想。

Q24114:

你好,想請問下你買邊度樓好同埋要預幾多錢?

謝謝

龔成老師:

第一,要睇你目的,如果你是自住的話,最重要就是方便你自己,當然,最好質素唔好太差,樓齡唔好太大,維修不要太差。

如果目的是收租,就找一些較好的地區,一般市區會較好,最好就是供應較少的,如果是入門的物業投資者,一般會建議投資大型屋苑。

至於預幾錢,最重要你的個人情況,首期要足夠,同時要「供得起」,比起預期樓價升跌,供得起原則會更重要。

Q24115:

老師,6993點睇?

龔成老師:

藍月亮(6993)不是劣質,但最新業績令人失望,由於上市前的數據幾靚,因此,有可能佢上市前執靚盤數,這亦是我對新股/半新股有保留的原因。

佢最新的中期虧損約$4400萬元,去年同期純利約$3億元。虧損主因是市場上,其他平台出現過剩的較低價產品,導致佢定價策略及產品在市場上的價格體系受到干擾。

為統一產品在市場上的定價,佢向其客戶提供若干折扣以穩定產品的市場價格,此類折扣對其於上半年的毛利率產生約9%的負面影響。

相信中短期未必強,但長遠,其實又不算好差,佢成立於1992年,擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位,加上毛利率高,賺錢能力強。睇翻佢之前的資料,以零售額計算,藍月亮在洗衣液市場、濃縮洗衣液市場及洗手液市場的市佔率均為第一。

整體有質素,不過之前貴,現價算是合理區中上部,小注投資都可以。

Q24116:

老師請問內房股依家邊隻最有投資價值?

龔成老師:

現時內房行業最大的問題,是負債,因此,只要找負債較少,同時本身較大型的內房,就會較穩陣。

華潤置地(1109)可留意下,佢有質素,佢係華潤集團旗下的地產業務旗艦,是中國內地最具實力的綜合型地產開發商之一。

主要業務為物業發展、物業投資及管理、酒店經營、建造及裝修的服務及其他業務。

佢所持的土地儲備大部分是用作住宅發展用途,是中國地產行業規模最大、盈利能力最強的地產企業之一。

長遠仍有發展,這股有長線投資的價值,現價太約在合理區中上部。

Q24117:

老師,現時有無20%回報工具?

我現在只做到月供股票,但股價不穩定,今年都沒20%升值?

龔成老師:

在現實中,要得到這回報並不易,但亦可以的,就是集中投資潛力股(當然有風險!)。

原理是買入潛力企業,等待佢成長,一般都要5年以上的時間,最少都要3年,因此,你以短期回報去計,是錯誤的。

不過要留意,投資潛力股要求你有一定的投資實力,在選股及分析上,都要有知識先得。

同時,集中投資潛力股是高風險的,因此要睇翻自己承受風險的能力。

Q24118:

請問京東健康是老千股嗎?

龔成老師:

京東健康(6618)不是老千股,只是因為監管因素,令股價大跌,加上之前市場炒作過左火。

以業務發展來說,其實佢有質素,這股可長線。不過,業務本質的風險就較高,如果投資要小心控制注碼。

其業務主要提供線上線下的醫藥出售和健康管理服務,業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房,更是內地線上線下收入規模最大的零售藥房。其互聯網醫院,日接診量超過10萬次。

質素上,京東健康是有的。但由於估值難,不確定性大,暫時合理區中間,所以如投資,小注都可以,股價始終上落大。

這股如本身有貨,可長線。

Q24119:

老師,285同2018前景如何?

龔成老師:

比亞迪電子(0285)這股正面的,佢是1211的子公司,主要從事製造及銷售手機部件、模組及其他產品、提供手機設計及組裝服務,以及提供其他電子產品的部件及組裝服務。

過往發展正面,有技術,前景不差。長遠睇好佢的。

如果考慮佢近年的增長,現價合理區中間。如果之前有貨,可以長線持有,由於股價波動,現價小注分注可以。

瑞聲科技(2018)之前見佢業績較弱,中短期股價一般,但長遠不是無質素的,本身有一定的規模與技術,長遠發展正面,不過,佢增長力不是好強,只能視為平穩增長類別。

如果要2選1,建議考慮比亞迪電子,但就要注意股價上落都會較大。

Q24120:

龔成老師你好,好多人都鍾意PM搵你攞貼士,但小弟反而有件趣事想分享。

小弟今個月尾就29歲,之前單身日久,係兩年前的生日,又係一支公渡過的時候,曾經打算買份禮物比自己,但思前想後,都無結論。

最後,反而記起你的Facebook post, 推介人買電動車股票,當時當係笑話咁同自己講,睇下買電動車股票,有無機會可以送返部車比自己做生日禮物。於是我就用手頭上的$30,000,買TSLA(因為工作時間關係,不能投資港股),而亦因為咁,開始我的美股之旅。

當時,Tesla 未拆股,只係$300,亦未被人重視。當年12月,仲睇住佢跌一成,睇見都驚,我置之不理。

係2020年頭先再睇,發覺開始有錢賺,升20%後,就沽左,係我第一次係股票市場賺錢,個種感覺覺得好奇妙,發現原來錢唔需要勞力,都可以得到。

可能基於你推介電動車的關係,過去的2020年先有自信,不斷買賣Tesla, 而次次都有斬獲,而且本金亦越放越多,甚至比年薪多,係十次交易當中,賺十萬左右。呢十萬,我要多謝龔成老師。

2020年尾由於部署轉工,想專心工作,所以好少投資,連愛股TSLA都清倉,以示自己專心新工的決心。

2021年的大半年,我都係睇住我之前買落的科技股,由年頭一直不斷縮水。又來到2021年尾,工作發展並不如意,薪金比以往減少三分一,眼見短期內未有起色,於是醒起你開始投資時都係由一萬左右開始。

最近我才重投美股旅途,開始時,一直反省到底自己過去2年,投資路上的不足,而我發現自己手上有隻靚牌tesla, 反而無好好善用,無月供兼長揸,錯失大好良機,而且炒賣的本金太大,輸唔起。

重溫龔成老師的著作時,發現自己原來只著眼股價,而非公司的業務和潛力,心情永遠好似同股價掛鉤,嚴重影響判斷力。

雖然我一直投資的係美股,但相信老師的方法係正確,價值投資法才是贏錢的要訣,好多所謂美股專家都只係炒熱潮,甚至借孖展短炒,傷神不止,亦可能傷財。另外,自己細膽,成日抱住「試下」的心態去買股票,所以先至做唔到大事。

今日寫呢篇文,除左回顧自己兩年來的經歷,其實亦想趁機多謝老師一直咁願意教人,我好佩服老師年紀輕輕,已經獨當一面。希望老師往後都可以教大家,繼續普渡眾生。

亦希望我兩年後真係買到部tesla ,甚至得到更多啦!

龔成老師:

恭喜你!投資有不錯的成績,並累積到一定的財富!

其實港股、美股,並無衝突,最重要是尋找到投資機會,你已行在正確的方向,之後保持進行就得。

相信你已經有基本的知識,明白短炒、孖展等好難賺錢,同時,當你找到一個潛力行業,一間不斷發展的企業,就最好長線持有,等企業成長,這是最好的方法。

我建議你在工作的同時,投入更多時間去學股票,分析股于票,因為這方面長遠為我地創富財富的比例,往往比一般打工更多。

投資是一個長期過程,我相信美股長遠仍是正面,當中很多機會,但中短期都要留意股市波動的風險,因為你未經驗過考慮(這是我最擔心的),在2000年,美國的納指由5000點跌到1000點,要15年才能重上5000點的位,因此,不要盲目認為股市一定只升不跌,要明白風險。

加油!保持知識與財富的進步。