數月前同事跟我講SPAC，聽落是很有趣。純一張空白支票，找項目，股東通過入股等業務爆升，找不到原銀奉還，不過，再細心諗下，天下那有咁大隻蛤乸隨街跳，我覺得似街邊保藥黨騙案。

首先，SPAC是找一些不達IPO要求的企業，不排除可能真的找到滄海遺珠，但可能去鴨寮街尋寶勝算更高。這類初創企業一般是創投的目標。創投管理OPM，但作為GP也放錢入基金，大家坐埋同一條船。GP的目的是湊大初企，有毛有翼可以IPO，到時GP除了資本增值，並且還有利潤分成（carries）。當然不是每一間初企都可以畢業，但一將功成百倍奉還。

但SPAC的發起人基本上不用出錢，找到項目便分紅股，就算股價由十蚊跌到一蚊，也袋袋平安。所以若大家出錢，我也不介意弄一隻SPAC出嚟。當然不會有人睬我，因為SPAC靠名人效應。上年年尾Peter Thiel跟小小超弄了隻Bridgetown ，振臂一呼，集資5億5美金，諗唔明有咁多儍強，要找一個項目能鯨吞這舊錢也不容易，一度傳Tokopedia，但神女無心呢！我諗唔明這些名人，究竟背後目的？為人民服務？

對投資者而言，十蚊底價似乎是最大保障，但這個IPO價是沒有你的份兒，其實最怕是找到項目並過會，往後見真章，往往見光死。相信最有趣是中間的炒作，興奮度猶如食咗偉哥。

還是腳踏實地，勤力做功課，從價值找機會。玩投機，可能有一剎光輝，甚至極其風騷，但可以永恒嗎？過去一年中資股升上天堂，但過去一個月，已跌落地獄。靠吹水，是不切實際，其實是微信女2.0，到成績表，便知龍或鼠，假的是真不了。

蔡光華 [email protected]]（香港證監會持牌人，客戶沒有持有以上股票）