去外地旅遊，青冰全部都是自由行，當然要在網上訂唔少嘢啦，但因為互聯網太強大，google map又勁，真係未到達目的地，已準備好晒，酒店、交通、餐廳及玩樂，全部ready，回想初出來工作時，雖然網上已經有唔少資訊，但可以即訂即畀錢咁方便，同依家真係冇得比。

金管局剛發出第四個虛擬銀行牌照予Welab，聽聞仲有4個嚟緊，而這8間虛擬銀行，在6至9個內就可以推出業務。現時最大的賣點，都係開戶不用去分行，所有嘢可以網上搞，開頭應該都係一些簡單的存貸及信用卡業務，日後應該可以玩複雜啲，進軍按揭、保險及理財產品。

青冰上次去分行辦理銀行業務，無錯，就係去兌換外幣去旅行，再上一次呢，都係兌換外幣，再上一次就可能係買禮劵，但講緊係兩年前的事了，相信年輕的一代，如無複雜的訴求，應該都唔想落銀行排餐懵。去年金管局推出轉數快，真係惠澤社群，現在連落ATM機或寫支票都慳返，要打機課金甚至要買賣遊戲內的虛擬物品，轉數快及Payme已經超方便，出來吃飯吹水，埋單亦不需要再拎住啲現金交來交去。有理由相信，虛擬銀行會火速被接受，再推動老掉牙的銀行作改革，若干年後會否再有實體拼購整合呢，拭目以待。

現時四個虛擬銀行牌，分別係渣打(2888)、香港電訊(6823)、電盈(0008)及攜程金融的合營，中銀(2388)、京東及怡和的合營，眾安(6060)及百仕達(1168)的合營及Welab集團，而Welab集團的投資方，則有Tom集團(2383)、阿里巴巴的創葉基金、ING及紅杉資本等等。對於一些大機構，發個牌對股價刺激有限，但眾安及Tom集團，在消息公佈翌日都大升，所以餘下的四個牌，認真去搵吓有咩細公司會參股，或有獲利機會。

當然炒完第一浸，佢哋都要埋手去準備開業，相信開頭都未必有錢賺，反而一些周邊的技術支援公司，可能就搵真銀喇，早前看過貿易通(0536)會提供遙距開戶解決方案，相信會受惠，至於其他，青冰搵到就報告各位戰友啦。

P.S. 青冰下星期起外遊兩周，Quam專欄會休息至5月3日

Fb個人專頁 http://www.fb.com/chingbing888