華富財經 Quamnet.com Logo
青冰
2020-08-28 09:16:36
香港電視的鴻圖大計

香港電視(1137)公佈中期業績,上半年營業額急增114%,亦都終於扭虧為盈,賺1.09億,整體毛利率由21.2%升至24.8%,在六月底時盈喜話會賺9000萬,最後都仲多了千幾萬,相信除了王維基開心,香港人都戥佢高興,而青冰覺得今次睇香港電視份業績,似乎未來藍圖大計,比營運數字更值得看。

以前香港電視一直在虧損狀態,大家都很著緊何時扭虧,所以好用心去睇營運數字,搵蛛絲馬跡,睇吓搵唔搵到虧損見底的跡象,香港電視以往都是每季公佈一次營運數字,但踏入2020年後,改為每月公佈,跟住好運就來了。作為全港最強的疫情受惠股,銷售數字持續上升,也是年初股價急炒的原因,由1月底時不足4蚊,兩星期內升至7.30元新高,而其實創新高前一天,香港電視係出過通告,暗示可能配股,咁結果都真係翌日收市後批了,每股5.15元。

雖然疫情比想像中持續得更久,生意受惠,理應支持股價,但其實股價在配股後一度跌至3.71元,返回起步點,更在4至5元區間玩了三個幾月,直至6月底發盈喜,才有這一波接近一倍的急升,所以有時捕捉這些股,有眼光更考你的耐性。

每次看香港電視的業績,都係好好睇,數字多又有圖表,表達清楚,主席報告書係講實事,而不是亂吹幾千字口號式沒內涵的東西,睇完你真係了解王生想做乜,雖然結果如何是另一回事。今次佢先講本港的電子商貿市場發展,指兩大超市不是沒加入競爭,只是成績未如理想,仲直指對方用一貫手法去營運網購平台,並不理想,另外也有講即使內地大型電商來襲,也認為HKTVmall仍不可被取代,並認為今次疫情,並沒有改變消費者行為,而是加速了消費者已經轉向的購物習慣。

未有計劃有幾個,就是實現數碼生態系統,換言之就是用這幾年累積的大量消費者數據,跟其他人共享,如專上學院、研究機構、廣告公司及銀行等,咁當然啦,青冰認為share寶貴的數據,不可能免費,日後或許是一條財路。另一重點就是增設外賣功能,目標在9至10月推出,仲有就係同Citibank合作發展電子錢包,讓KOL在HKTVmall頁面建立專頁。

這些或是王生一直構想的鴻圖大計,甚麼數碼生態,外賣呀,帶貨直播,係極之有爆發力的概念,相信你睇完成份業績的數字,都唔會搵到更好的炒作藉口,或可大幅提升估值,不過要新發展自然要燒吓錢,如果股價再一輪急衝,又係大時代葉天出場的時間了: 股市原意,乃讓集資搜資有其地......。

--

Fb個人專頁 http://www.fb.com/chingbing888