貿易戰愈演愈裂，習總親訪稀土企業，大家預期這些是收緊稀土出口的訊號，翌日梗係喪炒稀土股，但在港股裡，就炒起咗「假」稀土股，又或者只是沾到邊的稀土相關股，若果你稍為做吓功課，其實如果稀土價格暴漲，真正受益的，未必是你近日所見炒起的股份。

美國出招封殺華為，大家都預期阿爺會出手反制，所以當有消息傳出騰訊(0700)決定iphone不能再用微信之後，大家都信以為真，還將那個P圖新聞瘋狂轉發，有股評人更未經核實便在大氣電波散播該消息添，但若果你做吓功課，上騰訊或路透社新聞個官方網站睇吓，相信不用一兩分鐘便分得清真偽。

由於愈來愈多公司加入封殺，當日本松下電器話停止向華為供貨，大家又深信不疑，連港台都轉載嘅，應該係真喇呱，但當青冰去松下中國的官方網站，就只見到有個聲明否認有此事，隨後傍晚的消息又指，總部係話停止，但中國分部稱仍正常，究竟信邊個好呢？

唔單止貿易戰，另一個搞笑假消息係有facebook專頁引述外電，剛在英格蘭完成三冠的曼城領隊哥迪奧拿，突然宣佈離隊，將轉投祖雲達斯，青冰的唔少whatsapp及line群組，都瘋轉這消息，但青冰對球壇都有一定認識，上星期哥帥贏完冠軍，先至親口講下年會繼續玩，所以第一時間就同朋友講肯定唔係啦，之後去google找一下，原來那消息只係意大利有個體育記者在自己的IG爆單消息出來，但當你再去祖記或曼城的官網，都見唔到相關消息，之後那個facebook專頁知衰，索性刪post，當冇事發生過，係呀，不用負責任架。

玩咗咁多年股票，其實都見盡好多假嘢，假消息，假數乜都有，但現時魔高一丈，好多事都扮得好真，合作協議，諒解備忘錄，收購等等，唯一可以幫到自己的，除了靠自己做功課，做fact check之外，更要累積經驗，錯得多就睇得清，而青冰覺得最重要的，是儘量不要在腦內有前設，任何消息都要客觀地分析，有偏見，你點在google找，都只會看到你想看到的資料。

「真的假不了，假的真不了」志雲大師講得好啊！

Fb個人專頁 http://www.fb.com/chingbing888