早兩日天保能源(1671)獲中證監通知，其H股全流通的申請已獲批准，1.15億股內資股將可轉換成H股，在港交所買賣，而東陽光藥(1558)亦在周三宣佈，中證監批准了H股全流通的申請，接連兩單獲批，證明中證監開始做嘢，應會陸續有來。

究竟將內資股變成在H股流通，市場係會借勢大炒，還是加重沽壓，實在難以一概而論，就以天保能源及東陽光藥兩者為例，在發通告後的反應，都截然不同，前者曾大升19%，後者就點咗穴咁，郁都唔郁，所以炒唔炒還是要看本身的質地。

翻查兩間公司向中證監申請的日期，也見到個有趣發現，東陽光藥在去年11月22日提申請，而天保能源就在今年1月8日，到最後天保能源是在6月1日獲批，東陽光藥在6月2日，換言之就唔係早遞表就早啲批，當然啦，交表都要睇你齊唔齊文件之類，這些青冰無法得知，但睇到這星期已經有兩單獲批，或者之後真的會提速，記憶中眾安在線(6060)及招金(1818)分別在4月及1月作申請，戰友可留意是否下兩個幸運兒。

當內資股變成H股後，簡單啲講就是由死股變生股，有機會在市場套現，是會對內資股股東有利，至於這個沽壓會否隊散個股價，兩睇啦，數量多寡固然重要，仲要睇有冇概念配合，如果是物管、醫療機械及內需等板塊，相信市場都會消化得到。

去年青冰提及過百仕達(1168)，手持眾安在線的內資股，共8100萬股，折合市值廿幾億元，但又係嗰句，到現時為止，仍是一堆死股，紙上富貴而已，你睇吓百仕達的股價，亦都係死吓死吓，但如果未來幾星期，戰友看到眾安在線的全流通計劃獲批，相信市場資金應該唔會炒眾安在線，反而會搶入百仕達，自問眼明手快，就可以等通告才出手，因為此股係極為難炒，太早入場隨時更蝕底。

--

Fb個人專頁 http://www.fb.com/chingbing888