MSCI上周五宣佈季檢，今次青冰沒有在專頁上講有咩股重點，主因上周五早上有私務要辦，只能在手機上睇，碌上碌落始終比較麻煩，到青冰得閒坐在電腦前搵料時，各財經傳媒已經列出重點加入的股份，失咗先機更加冇乜動力去出post啦，不過睇MSCI季檢都要花點功夫，否則很易中伏。

如果從MSCI網頁去睇，佢每次都有幾個不同的文件，有概要、標準指數、小企指數及微企指數。簡單來說就有三個指數，恆指就會分大中小，MSCI就分標準、小、微三個，每個指數文件都包含了全球各地區在今次季檢中的增加及被剔除股份，最易中伏的就在這裡，標準指數剔除了希慎(0014)、MGM(2282)、香格里拉(0069)及九倉(0004)，但在小企指數卻加入了希慎及香格里拉，換言之兩股只是換了類別，並沒有真正被踢走，但青冰在一些傳媒中，看到MSCI加入了希慎及香格里拉，咁樣呢，你又唔可以話佢錯嘅，但就並非事實之全部。

其實同樣的事都會在恆指及富時指數的公佈內發生，恆生綜合指數會用一個excel作為詳細公佈，因市值變化而調整了大中小類別，尚且可以容易搜尋得到，而最佳的表達方式便是富時了，成份股變動，佢會寫清楚係類別調整，還是真係踢走。

經過多年的血與汗實證，玩這些季檢，始終都係標準指數有最大效應，因為追蹤大股指數的基金較多，所以相應買盤亦會較大，力量亦最明顯，咁今次入了標準指數，而又值得留意的是雅生活(3319)、中國東方教育(0667)、中國聯塑(2128)、翰森(3692)、平安好醫生(1833)及中聯重科(1157)，其實仲有幾隻的，例如妖味甚濃的雅高(3313)，寫出來都係嘥氣嘅。

由於這個星期市況回調甚多，亦提供了一個較佳的入場位，如果已經持有又想趁反彈走人，亦可以等多一陣，等月尾指數基金逐漸買貨時，有一個更佳的沽貨點，生效日期係11月26日收市後，戰友們自己睇實吧。

-- Fb個人專頁 http://www.fb.com/chingbing888