Q23831：
亞Sir，我最近唸起個難題。眼見匯控等cases，好多上一代大藍籌股慢慢都因應時代巨輪積弱！
所以其實如果老左轉水桶3，例如係reit 778 435 或 恒生中銀之類等，根本難保證當你50-60歲買入，到80-90歲佢依然係番度仲要派緊高息。
這方面請問你有什麼見解？？
我就認為，現時看，只有中電係應該到老左都未執笠或未變差，而且仲可以保持差不多息率，哈！66都係但息率太低製造不了或難現金流過生活的效果！
Thanks
龔成老師：
我地最重要是「持續分析企業」。
雖然我地投資的方向是長線投資，但並不代表不理企業，並不代表盲目持有，我地不會經常分析股價，但就會久不久檢視持股企業的狀態。
正如銀行業，賺錢能力已不及過往年代，增長力減減左，因此由過往水桶2，慢慢走向水桶3。
至於你所講的房託，我地要持續分析佢租金回報的情況，去了解佢是否有能力持續派息。
這種持續分析的動作，每6-12個月，出中期業績，或全年業績，就要檢視分析。
另外，我地唔能夠太集中在同一行業、同一企業，要建立一個平衡的組合。目的都是想分散風險，因為一個行業，都有可能因時間而轉弱。
Q23832：
老師，我好想讀你的課程，我在澳門居住，有班開嗎？
現在我只能拜讀您的大作取經，現還欠80後百萬富翁及8O後三百萬富翁二本書，太好賣，沒有貨！已經叫書商返，但可能疫情關係，遲遲未有！
老師，您要關注一下澳門朋友仔！
其實，老師有沒有考慮用視頻方式為遠方的朋友仔授課？
龔成老師：
其實我之前都有開過澳門班的，不過現時疫情，所以暫時停左，之後會再開翻的。
你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。
因為現時已有好多澳門人留左位。
書本方面，水坑尾宏達會較多，你可以去睇睇。
股票班，由於內容太重要，只有實體班，唔會開網上或視象課程。
因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。
Q23833：
老師，點睇隻2191？
龔成老師：
順豐房託基金（2191）質素都有，但又不是好強。
順豐房託的投資組合初步包括位於香港、佛山及蕪湖的以下三處物業，所有該等物業均為現代物流地產，包含配備有自動分揀及供應鏈支持設施的分撥中心。
- 香港物業：位於青衣，為一個15層高的「坡道式」現代物流地產，具備可通向各倉庫樓層的車輛坡道。
- 佛山物業：為配備有智能技術及量身訂造的設施，如自動分揀及供應鏈支持設施。
- 蕪湖物業：於2019年竣工的位於鳩江經濟開發區的現代物流地產。 比起其他房託，佢會更受經濟及物流業發展影響，因此會更加波動。以過往的數據來說，不差的，但又不算好強的增長及賺錢能力。
投資價值都有，相信長遠物流業發展對佢都有利，投資值博率算是中上，但都不能太大期望在股價發展，暫時可以集中收息為主加基本增長力。
Q23834：
老師，見你隻1211好勁，明白長線投資之道，但問題是佢股價波動，其實我地面對這類股，有無一d指標，去衡量當刻投資，係咪值？
龔成老師：
有，方法就是計企業的價值，計算好現時的企業價值後，再比較翻現時股價，從而得到平與貴，但業務較不確定的企業，潛力度較高的企業，估值就會愈難，你要明白這點。
計算企業過程，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。
簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。
例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。
如果要深入計算，基本上要好仔細的研究企業，要分析好多財務數據用比率，先至有較完整的答案。
Q23835：
龔sir, 我對金錢都有很大好奇心，想探討金錢是什麼？但，我最關注你認為自己與金錢是怎樣的關係？
龔成老師：
你可以睇《財務自由行》，你會明白財富的真正模式，現時的現金不是財富，資產才是，而資產有好多種形態，可以有形可以無形。
我是一個明白了金錢規則的人，因此得到了合理的財富，而我會繼續教更多人，明白金錢規則，令他們都得到合理的財富，因為現時仍有9成人，對金錢觀念無認識的。
Q23836：
成哥你好，我持有既股全部都蝕好多，佔左我成80％，係咪只可以等
2318@85
9988@282
美股
jg@7
龔成老師︰
首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。
買入價，你的賺蝕，只是一個心理因素，該企業長遠的發展，才是我地是否值得持有的重點。
如果企業有質素，但股價短期下跌，就不用擔心，照持有就可以。
如果企業無質素，但你現時蝕錢中，繼續持有只會令你財富繼續貶值，因此要賣出。
如果企業質素轉差，就有可能要減持，因為這股佔你組合的比例，未必值得太多。
你現時持有股票，都係有質素。但阿里巴巴(9988)買入價係偏貴，而平安(2318)都算係合理區頂。
而平安好醫生(1833)由於本身未有盈利，估值係建基於對未來睇法，故現時大市較弱時，再加上政策風險影響，出現回調係正常。
這3隻股票都有質素，最長線持有係可以。但平安好醫生(1833)不確定性較高，不宜持有太多。
極光大數據 (JG)是一家經營移動大數據解決方案平臺的中國公司，規模唔算好大。
睇佢過去幾年，營業額有下滑情況，但毛利郤能平穏發展，可見公司賺錢能力係強左。
不過，企業至今依然未做到收支平衡，而我地都不能預計，佢幾時先可以令盈利正常化。所以，這股有投資價值，但不確定性較高，不宜太注。
Q23837：
龔，岩岩買左你的書泥睇
正職工程師,副職大專講師，30歲，月入約70k , 香港做野， 想有20k被動收入
睇緊你本《財務自由行》
龔成老師︰
多謝支持!
如果你係初學者，你可以睇埋我架《80後百萬富翁》《股票勝經》，可以強化你投資理財的基礎知識。
若你希望每月有2萬被動收入，以股息率6%計，你需要本金400萬。因此，我地要以這400萬作為目標，透過一些有增長力的股票，去累積這筆資金。
到你退休時，再將這些有增長力股票，換成為收息資產(如收息股、年金、債券等)，去創造你需要的2萬蚊現金流。
以你現時30歲去計，是財富增值的黃金時期。緊記盡力儲蓄、投資之外，都要努力增進投資知識，也要把握這個黃金時間，做好財富增值部份。
策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
餘下的另一半現金，我地就等機會，當大市出現較大回調，就加大力度掃貨，然後作長線投資。
假設每年平均投資回報有10%（連股息再投資），你每月投資$20000，10-11年後就可以累積到大約400萬，助你達成財務目標。
Q23838：
老師，昨天開始上堂，你的理財觀念我好認同，同埋都解答咗我內心一些疑問。你講解都好清晰。
你提到真資產，令我想起數字貨幣/資產，其實我完全無概念，想知數字貨幣是否真資產？價值投資理念下，它是否值得了解和投資的？它賺錢的原理是如何？
近來看到不少新聞講有關NFT，睇咗d資料都唔係好明係咩黎⋯但小學生都接觸這並拍賣賺錢。
我都想了解下這些新興貨幣。謝謝你。
龔成老師︰
就虛擬貨幣而言，以本質來說，這是人為創造出來的，絕對不是「資產」，有沒有真正的價值，如何定義真正的價值，未知。
這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。
但這不代表佢無價值，佢可能好勁，只是我自己不知佢好勁定好差。
佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。
如果你分析到佢長遠的交易大，大家都持續關注，就有價值，就值得你投資。
另外，你可以從這些貨幣和其智能合約平台上，長遠是否有功能上的價值去分析（部分可能有的，但就要仔細分析）
至於NFT，係非同質性貨幣。主要係令一些虛擬物品，可以透過區塊鏈作交易。現時主要應用在一些藝術品，可以係一張畫、一首歌，甚至係一個圖像。
由於藝術性比較高，故比虛擬貨幣更難判斷其真正價值，因為藝術品價值係好抽象。
如果佢係多人認同，價值自然會提高。但我地一般投資者，就較難去作出判斷。
我並沒有支持或反對投資虛擬貨幣/資產，只能說風險高，因此不建議大額投資。
或者你可以用以下的心態投資，首先，你預期可能會大跌，心態上只用「閒錢」投資，就算不幸大跌對你都無影響，但你的要求回報一定是倍計，博有多倍計的升幅，絕不要升少少就賣。
另外，中央近期對加密貨幣都加強打壓，禁止相關交易活動。香港會否跟隨，還是未知之數，故你要明白會有這方面的風險。
Q23839：
你好,龔成老師！我今年35歲，每月收入大約$25000-$30000,每月需要支出大約$12000內，資金只有$60000左右，想為未來打算，從未試過買股票，真係一位新手，真的唔知如何入手
有朋友叫我月供股票，有提議月供(2800)，亦有朋友介紹幾個股價，939,1038，941,1398這幾個，我真的不知如何入手，我月供會唔會比較好呢？
如果月供，有邊幾個會比較好呢？謝謝龔成老師
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
你35歲，應以增值為主，建議你用「平穏增長股」 + 「潛力股」作組合，去創造一個增值平台。
不過，你現時無投資知識和經驗，對企業估值，點去定平貴未必會太了解。所以，你朋友叫你先從月供股票入手，係正確的做法。
因為咁樣做，你可以減低買貴貨風險，對你這類初學者而言，會係穏當。
至於你朋友建議的4隻股票，長建(1038)係合適。其餘3隻雖然都有質素，但佢地都同屬收息股，增長力唔太高，不太適合你咁後生的年紀。
月供策略上，現在你每月先用5成儲蓄做月供。其餘先儲起，用一邊月供一邊儲蓄的策略。
由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。
至於現有資金，可以現價入一手盈富(2800)。餘下資金和每月一半儲蓄，就等你有更多知識，或者大市出現一定程度的下跌，才動用來掃平貨，然後長線投資。
同時間，你要努力學習，去提升對投資理財的知識。你要去多讀投資相關書本、年報，新聞和課程。
書本上，你可以睇我寫架"80後百萬富翁"、"財務自由行"和"股票勝經"，都適合初學者。
另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
Q23840：
老師，想問下成日見到有公司回購並註銷股份，佢地用錢回購左又註銷埋，註銷左係咪即係報廢?咁係咪即係比錢買野，買完又掉左佢，咁咪浪費金錢，唔明佢地點解要咁做?
唔該老師
龔成老師：
公司回購並註銷股份，是回饋股東的其中一種方法。
因為集團的總股數會減少，每一股的價值就會提高，你想想，一個餅由原本切10份，變或只有8份，每一份的面積就會增加。
有時，當公司唔想用派息去回饋股東，就會用這方法，因為有時派開息，小股東就會一直有期望，下次都想派，如果企業只有一筆資金而又想回饋股東，就可以用這方法。
同埋，有D國家派息要比稅的，因此這方法可避稅。