去年寫過幾次的必瘦站(1830)，昨天公佈中期業績，作為半隻零售股，業績理應大受影響，不過中期盈利仍大升52%，真係非常勁，昨天仲似乎有春江鴨偷步入市，逆市升5%，不過業績卻投下一個震撼彈，足以抵銷強勁業績，就係宣佈不派中期息。

中期收入增長兩成，達7億元，如果拆開每個半年度睇，已經係第六個半年度錄得增長，而且每次增長都唔細，盈利增長咁多，主要都係靠內地業務，雖然內地及澳門業務收入，還未佔集團的三成，但明顯地內地食水較深，帶動整體純利急升。雖然話香港業務仍係主力，但公司都好坦白講，內地旅客來做醫學美容，是增長之源頭，不過這個時勢，相信都愈來愈難做。可能因為盈利仍增五成的關係，談及香港經濟，只是輕描淡寫話政治動盪打擊經濟，就此而已。

不過亦由於經濟下滑，公司決定維持充裕現金在手，不派中期息，而這個亦是青冰所指的震撼彈，因為佢哋認為，這是個做收購的好時機。有跟開必瘦站的戰友，都知道這股除咗增長強勁外，最吸引的就是高息，這幾年雖然股價長升，但仍可維持到八至十厘息率，認真唔錯，而最癲嘅係，最近四個年度，派息比率都高於100%，非常慷慨，所以上月發盈喜，相信大部分投資者都認為，又係派高息之時，好喇，現在一仙都唔派，相信今日的沽壓都會非常沉重。

去年青冰都出個post，指公司雖然有玩股票及基金，但都尚且透明，因為會在業績內公佈買咗乜，及入市成本，青冰還記得去年他們持有騰訊(0700)、微軟及一些債券基金，今次業績顯示，美股全沽了，取而代之係恆生(0011)、中銀(2388)及地鐵(0066)，當然仍持有騰訊啦，不過投資成績就一般喇，截至9月底，7500萬元的投資，輸緊四百萬，如果加埋債券基金，投資總額係有1.1億港元，相對於42億市值，都唔係太多，之但係，當管理層決定在盈利大增之時唔派息，但仲揸住1.1億元投資，當中仲有3隻係同本港經濟息息相關的港股，咁你不如回饋股東仲好啦。

雖然青冰都認同係併購同業的好時機，但在一仙息都冇的情況下，今日真係好難唔跌了。

-- Fb個人專頁 http://www.fb.com/chingbing888