肺炎在歐美地區開始擴散，觸發了全球金融市場震盪，各國央行聯手放水，雖則大家都明減息無助疫情，但央行咁做，無非都是想預早放鬆銀根，到大家恐慌時都唔會感受到流動性抽緊。   恐慌呢樣嘢，一開始咗就好難收科，試想想早幾星期，大家去搶厠紙、搶洗手液及搶米時，點解會恐慌？因為真係搶完個貨架就空空如也，因為物流品題補唔切貨，愈見到冇晒就愈要搶咗先，但近期已經少見此場面，係大家買齊貨還是見超市大把貨而無需恐慌呢？   聯儲局突然減息大家都眾說紛紜，究竟是否做對了，可以拗到面紅耳熱都冇答案。股市太差，當然會影響消費信心及經濟表現，但重中之重是流動性問題，因為這會影響金融體系的系統性風險，戰友可以回想吓當年雷曼爆煲，事後孔明就睇得通啦，應該係要出手救佢嘅，因為佢瓜咗，會火燒連環船影響好多行家的流動性，為了令自己唔好出事，當然會不問價沽其他嘢，自己個袋多個錢先挨得過風暴嘛，但咁做只會令個市場更恐慌，最後政府咪又要搵人救美林同AIG，當年股神巴菲特也有入股高盛，幫手頂住挨過呢關。   流動性這概念好似好抽象，講白啲即係現金周轉囉，你樓下間餐廳呢個幾月都係艱苦經營架，人流銳減，收入大減但又要交租兼出糧，現在要挨就要睇老細個底夠唔夠厚，周轉得到，頂兩、三個月可能見到曙光。上市企業同樣面對這個問題，強如蘋果，都講明今季因為供應鏈問題，而令營收未能達標，蘋果咁多錢，流動性當然不成問題，最多係股價跌吓啫，但其實仍有不少歐美日港企業，因為啲廠在內地，復工慢而影響周轉，如果拖長了或會小事變大事。   今次會搞幾耐，青冰當然唔知啦，因為連聯儲局都話唔知，但受影響行業將會面臨洗牌，龍頭企業在疫情過後相信會受惠，因為底厚挨得過嘛，仲可以收購行家，減少競爭，所以日後市場有震盪，戰友可鎖定目標慢慢吸納吧。       --  Fb個人專頁 http://www.fb.com/chingbing888