昨天午後收到個新聞通知，話內地科創板已超過200億人仔成交，當時青冰望一望港股的成交額，嘩原來只得400億，認真可憐，須知道科創板只得廿五隻股，香港都成千幾隻股票，真係失禮。話說回頭，科創板剛剛開波，炒風梗係熾熱啲，轉手比率極高，港股乃是成熟市場，難作比較，加上近日政經不穩，資金都偏向睇定啲先，所以買賣自然兩閒。

科創板的成立，只要搞得好好睇睇，長遠而言，一定會吸納更多創新企業上市，尤其是內地估值全部偏高，對需要資金再發展的創新企業來說，一定較本港吸引，所謂好好睇睇呢，其實不外乎唔好爆鑊假數，又或者炒完一浸，之後長期向下炒，股民自然有返啲信心，對A股市場也是好事。

港股成交額低迷，最擔心的肯定是港交所(0388)，雖然李小加話唔怕科創板搶生意，但此消彼長下，實在面目無光，月頭百威臨上市先拉停，固然係管理層錯判形勢所致，但在環球的投資者眼中，也造成一個壞印象，係唔係承受唔到大型IPO呀，令更多巨企唔敢來香港招股。

作為普通散戶，其實百威黎唔到，港交所不能成為本年度全球IPO之冠，係完全唔會關心的，投資者只想贏錢而已，如果好似早兩年咁，咩股IPO都熱爆，本港成為IPO之王，但爆炒幾日，之後跌足兩年，這個冠軍之名，又要黎有乜用呢。

講到呢度，好似好悲情咁，港股係唔係要等死冇出路呀，又唔係嘅，先唔講細股，你睇返恆指，雖然在現水平牛皮咗一段時間，但有些成份股明顯轉強了，騰訊(0700)在兩個月高位，蒙牛(2319)創歷史新高，平保(2318)及招行(3968)差幾蚊破頂，石藥(1093)、中國生物製藥(1177)及舜宇(2382)，都有轉勢的跡象，只係大市成交未跟得上，如果戰友太著重個指數，因為上唔到29000點，就令自己冇乜信心，但留意返地產股近期腳軟及中移動(0941)長期積弱，也是拖住恆指的主因，太著緊個指數，只會令自己錯失搵好股的良機，炒股都是重質不重量吧，唔需要雞犬皆升嘅，自己買嗰啲升就得啦。

Fb個人專頁 http://www.fb.com/chingbing888