Q19031:
成哥!!
-
請問5/3988/1038是否可以在合適價位賣出?? 還是擺放著??
-
安碩恒生科技(3067)是新股嗎?? 沒有以往的價位?? 因我是用中銀, 此股票不在範圍內, 可否再提供其他潛力股參考!!
龔成老師:
1)要睇翻你目標的「長期組合」,我地理財,最重要是建立一個長期的組合,當中的配置要適合自己,這幾隻股都是收息類股票,你要睇翻自己長遠,組合有多少%想持有收息股,如果適合,就長期持有,如太多,就減。
2)安碩恒生科技(3067)是上市不久的ETF,追蹤著恆生科技指數,這指數都是一些新經濟股,風險較高,潛力度高,所以要睇你的風險承受能力。
現價在合理區頂,如無得月供,就自行分注投資。
現時大部分潛力股都貴,舜宇光學(2382)算是合理區中上部,未算貴。
Q19032:
你好,想問下老師點睇8473
謝謝
龔成老師:
彌明生活百貨(8473)業務不過不失,發展能力中等,不是高增長的類別。
以佢現時的經營情況,算是合理價,但這股始終規模不大,加上近年的盈利有下跌情況,存有風險,因此不建議太大注。
另外,政治相關因素,都會令這股波動,要明白股價風險,政治因素是好難預測的。
Q19033:
龔成老師,現有保險公司月供基金
已差不多十四年
基金 沒有特別增長 只係打和
中國成份的增長得最多
大約全部基金有55萬港紙
由於增值不太理想是否應該停供基金?
轉做月供香港股票市場?
定係繼續供?但更改基金的投資組合?
保險公司的基金投資組合有什麼好建議
另外本人有大約110萬股票
80萬現金
想穩陣增長
現時股票的組合有
005 (58入)8%
27 (43入) 4.8%
175 (12.5入) 3%
388 (230入)7%
700 (473入) 5.2%
823 (61入) 6.6%
884(1.6入) 5.1%
941(56.5入) 4.95%
981 (31入) 2.59%
1299(49.2入) 6.8%
1347(32.5入) 3%
1928 (42.6入)2.3%
2318 (39.55入)8%
2628 (10.45入)1.8%
2822(13.86入)10.5%
3988(2. 96入) 8.8%
9988(250入)11.5%
是否應該更改是否太高風險?
應該怎樣更改現有的港股組合
龔成老師:
如果基金長遠的回報,是跑輸大市,可以轉其他基金,其他項目,賣出基金。當然,你可以分析是中短期問題,還是長期問題,如果長期的話,就應該賣出。
至於你現時的股票與現金比例,無問題,而選股方面,基本上並不是無質素,但個別股票在可能在較高位買入。匯豐(0005)及中行(3988)都佔了一定的比例,唔好加注,如果你明白這兩股只是收息股,增長力不強,都可以守住先。
組合的風險不算高,整體都可以長線持有。不過你唔好心急動用現金,見到你個別股,會在當時熱炒時買入,應該等回翻D先入,唔好心急追貨。
另外,以你的情況,財富仍有一定的增值力,建議你多增加投資知識,在選股、企業估值、投資時機上落功夫,對你長遠財富有好大影響。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
Q19034:
你好,老師
我現在有200萬現金想買樓置業3房單位,正考慮搵康城嘅單位,你覺得嗰區有升值潛力嗎?
龔成老師:
當區質素,算是中等,不算好差,亦不算好好。
始終供應較多,唔算有好大的升值潛力。
不過,配套開始成熟,加上新橋連接九龍的發展,以及啟德長遠的發展,都是加分因素。
所以,如果你找到合適的單位,價格合理,都可以考慮的。
Q19035:
老師,十分十分感謝你,我兩年前買了比亞迪電子和比亞迪,現在回報非常好。
亦儲夠二百萬首期,我見到你之前嘅post, 南區你有建議田灣和黃竹坑XX,我屬意XX,請問老師如果你睇這個屋苑,尺價幾多較平
因為你提過現時貴,我想參考一下老師意見,如果睇啱可以大約議多少價?
如果投資,你會建議什麼尺數較好?十分十分感謝你能抽空解答
龔成老師:
太好了!
你最重睇翻佢近期的成交價,以及銀行估價。
整體的樓市,在近3個月未算有好大的上落情況,你可以找XX,近3個月的全部成交,然後了解這些單位的坐向、樓層等因素,從而從少少調整。
另外,你同時向多間銀行為你的目標單位進行估價。有了這些資料,就可以得到合理價。
現時的樓市,大約在合理區的頂位至略貴水平,從投資角度吸引力不算強,但自住角度則可以考慮。
黃竹坑受惠地鐵,加上該區不斷將工廈轉做商廈,以及發展大型商場,潛力有的,所以XX可考慮,只是平貴的問題。
Q19036:
其實本人是廚,有自己外賣食店,今年37歲,已婚有兩個仔6及4歲。
Portfolio有100萬港幣,十五隻英國股,現金有80萬,每年可以儲蓄用作投資最少40萬左右。希望可以四十歲前買層三至四百萬嘅樓英國。
不過有兩個問題,太太比較保守覺得投資樓好過股票因為啲公司有可能倒閉。
我個人十八歲已有買股票,至今其實總體係有十幾萬賺到。不過就浪費了時間值。希望可以財自。其實都有睇唔同價值投資書值,所以ratio之類都知道係乜roe, roce, debt equity, earning yield, FCF etc,,有睇公司做乜生意。不過去到分析公司時好亂,又唔知從邊開始睇起。
財表嘅數知啲又唔明,之前三四月系統性下跌有入貨,唔係沽出,克服咗之前嘅心態。
估值嘅又係知啲唔明啲。謝謝
同埋有時睇完唔知點樣整合去開始分析。
龔成老師:
我地理財,要建立「平衡」的組合。
物業、優質股,都是重要的資產,你都可以持有,兩隻同時持有可以有平衡風險的作用。
股票方面,你已經有經驗與基礎知識,問題是知識較亂,不懂有效運用。我會建議你睇《股票勝經》,可以打好你基本知識,同時,《年報勝經》在最後的部分,有一張好重要的「投資過程完整圖」,你現時的問題是無法整合知識,所以要好好消化這圖,同時加強翻現有知識。
你主要是「無法整合知識」「不懂運用知識」這兩大問題,這問題不大的,打好基礎後,之後運用起來就好易。
Q19037:
龔sir,想問下,散戶在股市損手,是否因為只關心數字的升跌,而不去深入瞭解該股票的業務數據所致呢?
龔成老師:
我過往做了10年銀行與證券行,都算見盡大量散戶投資情況,佢地輸,主要有幾個原因:買入連佢地都唔知係乜的股票、無花時間研究、買左劣質股、人買佢又買、升左先買、唔肯止蝕、無系統地投資。
Q19038:
20歲 沒有穩定嘅工作 與家人同住
人工60-90k,可能有時得10-20K
每月可以儲到90%的人工
目前手持現金7萬,最近先開始玩投資,目標係三至五年內或更長的時間達到財務自由,每月被動收入約30-40K
股票方面持有:100股騰訊、5000股神州數碼、10000股深圳高速公路
目前有咩可以做?
未來的發展要如何?
應該買咩類型嘅股票?
龔成老師:
由於你收入不穩,現時持有的$7萬,你就當做備用現金,除非大市大跌,否則不用。
當你之後的每月儲到資金,就可以投入股市,利用月供或分注都得。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
現時持有的騰訊(0700)無問題。
神州控股(0861),唔建議持有太多。
佢主要從事大數據運營、物聯網及人工智能業務,業務領域包括智慧城市、智慧產業鏈、金融科技、智能製造、智能農業、智能運維、量子通信等。
都是有前景的行業,長遠有發展,不過,業務就有較大的不確定性,始終行業結構不穩,變數大。
過往盈利增長不差,不過就有少少波動,這是企業的風險所在,股本回報率不高是扣分的地方。
整體來說,業務長遠仍有發展,不過現時估值唔算平,投資投資值博率只是中等。長線投資都可,但就唔好持有太多。
至於深圳高速(0548),是收息類股,未必太適合你。你現時應該「增值」。
你可以考慮潛力股,但你最好有一定的投資實力,否則唔好太集中,只能佔組合的一部分:華夏恆生科技ETF(3088)、阿里(9988)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,你要自己平衡。部分要等回少少先入。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
Q19039:
你好啊 我想請教下 你點睇 中國聖牧(01432)
中國有讚 (08083)
中國聯塑 (02128)
謝謝
我1432 ,0.67 有80000股
2128, 14.62 有6000股
8083, 1.56有36000股
龔成老師︰
中國聖牧(1432)在中國從事生產及分銷原料奶及乳製品。此股賺錢能力唔算高,過往盈利十分波動,而且有些年份甚至出現虧損。
加上佢負債都唔少,整體質素好一般。長線計,最好慢慢換碼至其他優質股。
中國聯塑(2128)有質素的,這股可以中長線投資,但由於這股比一年前已上升了幾倍,擔心股價會有潛在波動。
唔建議加注,現貨可長線持有。
中國有贊(8083)主要於中國從事經營電商業務及支付服務業。佢連年虧損,而且有數年核數師係表示"保留意見",即係盤數可能有問題。
此股業務雖然有增長,但都要小心,我有少少保留。
Q19040:
老師,你點睇比特幣?可買?
龔成老師:
抱歉,我無了解過比特幣,我自己無投資,因為我只投資「自己熟識的項目」
但我都在這裡簡單講少少,虛擬貨幣,是人為創造出來的,絕對不是「資產」,有沒有真正的價值,如何定義真正的價值,我有相當的疑問。
這些人為創造的貨幣,因為關注度由很少變得大,價格會大升,但這背後是否有真正的支持,我不知道。只能說,投資這些貨幣,投機味好重,可能大賺,亦可能蝕到一文不值,因為,當中有沒有價格,我不知道。
因此,這些虛擬貨幣,由於我不懂,所以,我不會投資。但如果你分析到佢長遠的交易大,大家都持續關注,就有價值。