Q24181：

阿Sir！用邊個方式較為準確地計出一隻股嘅估值呢？

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

Q24182：

你好，老師。信義玻璃(868)和信義光能(968)邊隻值得長線持有？現價入可以嗎？

龔成老師︰

信義玻璃(868)和信義光能(968)2者都有質素，但後者潛力度會大D，當然風險都會略高。

信義玻璃（0868）在技術上有優勢，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。

現時估值在合理區中至中上部，無貨你可以小注。同時，你預佢中短期會比較波動，要長期先見到收成。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區中上至頂部，如果想入，要慢慢分注，但仍不是大注投資的時候。這股股價上落都大，要注意金額。

Q24183：

你好，同方泰德1206現價合理嗎

龔成老師︰

同方泰德(1206)業務包括智慧交通、智慧建築和園區、智慧能源等業務。

睇翻佢近幾年數據，營業額和盈利唔算好多，而且有出現倒退情況。

加上集團規模唔算好大，投資價值只屬一般。現價算係合理區，可以分注，但此股只宜最多好小注。

Q24184：

老師您好！我31歲，希望5-6年後可以買到300-400呎單位自住，每月可儲$10000，應該用幾多錢去做月供股票？買哪些月供股票比較合適？

感謝及期待老師回覆！

龔成老師︰

我建議你每月閒錢，都用來做增值，咁會較好。

你可以用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

當去到要置業前半年至1年左右，你就要開始慢慢沽貨套現，唔好到用先一次過沽，因為無人知當時個大市水平。因此，你要慢慢沽，去平衡價格波動的風險。

Q24185：

你好，想問下信義玻璃868現價如何，有前景嗎？見佢市盈率不高，息率不不差，想問一下意見

龔成老師：

信義玻璃（0868）有質素，有增長力。

當然，近年股價上升了不少，股價是唯一的風險，業務則仍是長期睇好，市場長遠發展正面。

現價大約在合理區中間，如投資，這刻唔建議大注。

Q24186：

想問，大市成交1000億個位應該係邊到check?我係Boc到搵到，AAStock搵唔到，唔好意思問啲咁簡單嘅問題

龔成老師︰

你可以係AAStock左上角，一個經常會變動架BAR，上面會有不同市場成交量。

或者，你可以係去找一個，叫"市場動態"架選項，都可以睇到成交量資料。

Q24187：

老師想請問下9923移卡點睇啊？

而家32蚊買唔買得過？

龔成老師：

移卡（9923）是有風險，有潛力的類別。

首先，佢的業務為一站式支付服務，包括基於應用程序的支付服務及傳統支付服務，並支持逾500款發卡機構的移動應用程序，以支付為基礎的科技平台。

其中包括微信支付、支付寶或雲閃付，涵蓋了中國大多數的電子錢包。

另外，佢業務亦有科技賦能商業服務，即是提供商戶ＳａａＳ產品（包括實時庫存管理、消費者關係管理、智能訂單管理及全方位僱員管理）、營銷服務（包括量身定製的精準營銷及客戶忠誠度計劃電子工具），以及金融科技服務（包括助貸服務、委託貸款及保險轉介服務）等增值服務。

睇翻佢的財務數據，增長快速，但業務變數大，行業有不確定性，估值上比較難，這一定會令股價上落大，這刻仍唔平，算是合理區中間，投資值博率中等。

你預佢有潛力，同時有風險，如果控制注碼，都可以小注投資。

Q24188：

阿sir，純粹無聊咁睇呢10年既圖，基本上好多隻（無論港股同美股）都係爆升得好厲害。例如Amazon咁 10年前先二百零蚊 今日變到3000幾，都幾誇張下

雖然你有講過投資唔係睇股價 但我只係好奇10年由200去3000 但呢十年人工又無乜點改變 如果出黎社會就識投資 當年應該機會大過而家？

恕我愚昧，只係好奇

龔成老師︰

「唔係睇股價」你誤會左我意思。

我的意思是，不要以短期股價去衡量是否投資，同時，不要見到升少少，「貪賺現金」，例如你上述所講的情況，一個散戶在$200買入，很多在升到$250已賣，根本不會賺到$3000。

而你所講的情況正確，真資產的升幅，會大過現金。

這就是我叫大家要儲資產，而唔係儲現金架原因。

因為現金可以無限發行，過去10年全球不停印銀紙，令現金愈來愈不值錢。

相反，有質素的企業，是有稀缺性。在現金不斷增加，優質企業數量不變的前題下，企業股價當然係會升。仲未計佢本身質素提升，所造成的正面影響。

所以，我地要做到財富增值，必需要學好投資，如何有效地將現金，轉化成優質資產，令我地的財富有理想增長。

至於時機，其實不時會出現，以往有，將來都會有。最重要是你當時有無知識和資金去打握機會，老生常談的一句話"機會，只會留給有準備的人"。

Q24189：

龔sir，呢兩日睇你嘅Q&A中留意到你提及1830唔建議大注。我大半年前已經入咗，大概佔20%，打算希望2年後1830可以幫我賺到第一桶金($100萬)做首期買樓。

請問龔sir, 1830中短期(2-3年)仍然會同之前如期中增長力強，升到$10-$20, 繼續值得長線持有嗎？

唔該晒龔sir!

龔成老師︰

完美醫療（1830）長遠發展正面，我自己都有貨，長線。管理層係有野心，想做大間公司。

不過，正如我之前所講，佢有潛力，但同時不確定性都高。佢最終會否成功、成功又是否一定增幅好理想，係未知之數。

所以，面對這類企業，我地投資注碼唔可以太進取。一般企業，我地最多只宜佔組合15%，這類不確定性高的企業，比重要再少D。

我地投資唔可以一味諗，佢有幾賺，同時都要諗下佢失敗時，對你有多大影響，要取一個平衡。

現價計，算係合理區頂。如果要去到你所講價位，每年佢盈利要差不多1倍。就算佢維持之前增長力，都較難在2-3年升到這個水平。

這股係有投資價值，如果你願意承受較高風險，去博下，你可以保留全部現貨。但就唔好再加注，用新資金慢慢拉低佢個比例。

若保守點，你可以沽出部份，換碼至其他行業的優質股。餘下部份，才長線持有。

Q24190：

老師你好，想請教你屋企有名老人家，今年70歲有100萬作保本投資用，請問有咩建議？

龔成老師︰

你可以將你家人這$100萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、富豪產業（1881）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，以備不時之需。同時，若投資市場大跌，你也可以考慮買到更多的收息股，因股息率會進一步上升。

你可以將$100萬資金，平衡地分配在上述的項目上，對你來說是最好平衡風險，同時有穩定的現金流。