華富財經 Quamnet.com Logo
龔成
2021-12-29 11:00:12
【龔成問答信箱】(Q24021-Q24030)

Q24021:

老師,想請問老師對虛擬土地decentraland有什麼看法?

龔成老師︰

虛擬土地,你可以理解為建構元宇宙中,一個參與者擁有的單位。

參與者,可以在土地上建議自己的NFT,例如整間屋、整個廣告、開演唱會、甚至賭場等。

但首先,你要明白這些土地,同現實世界不同,有機會係隨時變多,故未必有太大稀有性。

而且,佢內在價值,很大程度取決於這個元宇宙,最終發展狀況。如果係發展得好,吸引到人流進駐,自然就有投資價值。相反,發展得差,將會變成一文不值。

由於現時元宇宙,依然係好初期,成個元宇宙生態的運作模式,未算成型,當中存在不少變數。再加上,近期不同元宇宙的土地,都被熱炒,價格甚至升到比現實世界還要貴。

因此,若你決定投資,就要小心。我唔係話完全無投資價值,但當中有很大不確定性,故風險很高,你要自己衡量。

Decentraland, The Sandbox算係當中較知名,當中已有大型公司,好似蘇富比、Addidas進行佈局,會睇高少少。但你要明白,成件事風險依然好高,有太多未知之數。若你真係投資,必需要控制注碼,這點十分重要。

Q24022:

Hi 龔sir,我新手上路買左人生第一隻股票

02217 譚仔國際,果時抽唔到,上市後買,2.98買左一手

想住佢會上4,但4上唔到,3而家都冇咩可能,計過3.05先叫手續費令番咁走。

3千 唔影響生活,但d人講到會跌到似太興,以後唔駛放,早走止sit,唔知佢地講法岩唔岩?

我冇咩概念,上網搵點計股息資料唔多,因股息手續費$30。唔知我1手派起上黎有冇高於$30,呢隻值得等待派息嗎?

又或等到3.05 平手走算?

原諒我新手一大段野,希望可以學到野

龔成老師︰

你買入一隻股票,你一定要理解清楚間企業投資價值,再好做估值,定平貴,從而制定入市策略,去好憑感覺行事。

你認為「佢會上$4」,當中的理據是甚麼?你認為整間公司的市值應該值多少?投資不是賭,要做功課的。

譚仔國際(2217)不是無質素的。

佢有品牌,有規模,以及有穩定的顧客,現金流強,整體不差的。不過,香港飲食業競爭大,同時入行不難,對是對佢扣分的地方,加上香港人好貪新鮮,因此佢都不能一定話品牌永遠穩固。

睇翻佢資料,譚仔及三哥品牌擁有超過二十年歷史,合共經營148間餐廳,包括覆蓋港九新界18區的72間譚仔餐廳及72間三哥餐廳、中國內地深圳的1間譚仔餐廳及新加坡的3間三哥餐廳。

根據2019年的餐廳數目,調查機構歐睿將譚仔列為香港亞洲粉麵專門店的第1位。

根據佢招股書資料,假設顧客每光顧譚仔100元的生意,食材成本佔22.9元;有31.1元是員工;約23是租金及折舊,扣除其他開支後,譚仔的純利仍有19.7元,扣除所得稅開支後,亦有17.8元的淨利潤,以香港經營食店來說,是高利潤的(不過,數據都是上市前的數據,所以不排除會執靚盤數上市)。

譚仔打算大力發展海外市場,以及中國市場,這會有危有機,如果成功當然潛力不能忽視,但過往不少香港食店打上內地都失敗,因此,存有未知數。

整體上,這企業都有質素,但不能定為最高質類,同時有危有機,這股如控制注碼,都可投資的。

你只係得一手,照持有都可以,但你預佢未必好快上翻去。

至於派息方面,由於佢係剛上市,所以唔會有派息紀錄。

Q24023:

你好,我想問供股是什麼意思?

我有2萬股884,我是4.7買入,昨天話已4元20股供1股,請問供5供好?定全走好?謝謝你

龔成老師︰

其實供股,就係而家發一些新股票,向現有股東再集資。

我地是否去供一隻股票,重點係先要睇佢有無「質素」,是否一隻值得我地長線的股票。若果係有質素,你才進一步考慮是否供股。

由於供股這個動作,會發行新股,令每股盈利被攤薄,股價會因此而下跌。

但個原因唔係個企業質素,出左問題。而係每一股的價值,被這些新股分薄左,所以才出現下跌。

因此,我地係唔會因為出現供股,而去沽一隻股票。當然,佢進行得太多,例如5年內出現2次,我地就要對這些股票較為保守。

另外,如果你選擇不供股,你可以考慮將供股權賣出套現。但若你決定要賣出供股權,最好盡快做,因為越後會越難沽。

旭輝控股集團(0884)質素只屬中等,現時負債偏高,故有一定風險。

佢主要在中國從事房地產開發、房地產投資及物業管理業務。過去業務發展都可以,但負債比率很高,在現時經濟環境轉差時,可能會出大問題,故有一定風險。

用佢來收息,都可以。但由於整體質素唔算好高,因此要控制注碼。

佢現時供股,可以佢資金出現壓力,有機會風險高左,唔供會比較穏當。

Q24024:

龔成老師,你好。本人40,有後備現金30萬存於mortgage link户口,月供組合如下:

2800 $2000

823 $1000

1810 $1000

1177 $1000

請問如要再增加一至兩個組合,有何建議?謝謝

龔成老師︰

我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。

你40歲,應以增值為主,你現時月供組合,都係合適的。

若你想再加1,2隻股票,可以考慮「平穏增長股」 + 「潛力股」。但潛力股風險較高,佔你組合4成左右好了。若你投資經驗較少,最好先控制在2成水,會較安全。

現時大市只在合理區,每月儲蓄唔好用晒,要留少少,等大市出現一定程度的下跌,就可以動用現金去投資,在平宜價加大力度掃貨,然後長線投資。

至於mortgage link户口的資金,你都可以考慮將部份,轉移至上述優質股,去進行財富增值。但換碼時,緊記係分注咁慢慢入,唔好一次過入晒,以平衡價格波動的風險。

Q24025:

您好,想請教以下理財個案

--43嵗,先生及自己有固定工作,月收入共11萬,育一子一女,分別12嵗及10嵗

--持有二個物業,一個自用已還清貸款,另一個收租,租金1.2萬,貸款尚欠120萬,每月供款1.5萬

--持有二個車位,自用,貸款尚欠100萬,每月供款7000

--持有現金250萬,人民幣100萬,其他外匯共值60萬

--持有股票

a.匯豐 1800股

b.工銀1398, 26000股

c.中銀3988, 14000股

d.盈富2800,2000股

e.小米1810, 2000股

f.騰訊0700, 300 股

g.港鐵66, 1000 股

h.美股MLCO, 2000股

i.電能實業6, 1000 股

--MPF 60萬

目標

--7年後夫婦二人一起退休

--7年後預留小孩教育資金400萬

--請問應該把現金去還貸款?還是再投資?

--如何優化現有組合

龔成老師︰

現時在全球息率不高的背景下,令香港按息都處於一個低水平。我建議先用現有資金去做增值,會較有效率。

由於你已經有2個住宅和2個車位,財富組合已經非常偏向物業類。因此,未來新資金,我地應先投入優質股類別,令你財富組合回復平衡。

以你43歲年紀,可以投資一些較有增長力股票,去進行增值。你持有的股票,都係有質素。但配置上,就出現左問題。

首先,我地組合持股除左要有質素外,都要講求平衡性。

個別企業和行業,不要佔組合15%和30%以上,銀行業更加不要高於組合20%,否則會有過度集中性風險。(盈富由於係一籃子組合,故不受此限。)

你現時銀行股,明顯係超左標。而且,匯控(0005)、工行(1398)、中行(3988)都係收息股,增長力唔高,以你年紀,唔建議持有太多。

這些銀行股都有質素,你唔一定要減持,但新資金就暫時唔好投入銀行類,去令組合慢慢拉翻平衡。其餘股票無問題,你照長線持有就可以。

至於外幣,長線都只會係貶值,除非你有實際用途。否則,我建議你換回港元,去進行投資會較好。

未來投資策略,你可以集中投資「平穏增長股」和「潛力股」。

除了現有資金外,你可以每月股票,去加快你增值速度。每月用5成儲蓄做月供,其餘先儲起,用一邊月供一邊儲蓄的策略。

如果你現時無太多投資經驗和知識,潛力股這類風險較高的股票,你就不要持有過多,最多維持2成好了,甚至先集中係平穏增長股類。

若你有一定投資知識﹐潛力股比重可以相應調高,佔組合約4成,視乎你投資知識多寡和了解這些股票程度而定。

現時大市只是合理區,你現有250萬資金可以先投入多50-60萬,用"分注"形式,慢慢買貨。餘下資金和每月所儲倒的資金,就等大市再出現回調時,才慢慢加大力度入貨,然後長線投資。

以投資回報有10%計(連股息再投資),假設你每月可投資$20000 + 現有250萬現金 + 70萬持股,7年後大約會增值至840萬。

扣除你子女的400萬教育基金,你將餘下440萬投入收息資產,用6%股息率計,你每月大概可以有2.2萬被動的現金流收入。

你可以以此作參考,去制定你的增值計劃。

Q24026:

Hi龔成老師,可以請教一下,如果持有華南城1668服票$1.2買,咁而家要點做,已持貨1年半,唔急錢用

龔成老師︰

華南城(1668)質素的確有減少左的情況。

佢業務係中國開發及經營大型綜合商貿物流及商品交易中心,為內地和國際批發供應商、買家、製造商及分銷商提供原材料和製成品的全面交易平台。

業務模式除營運這些大型的商品交易中心外,亦會銷售交易中心的商舖,成為主要的收入來源。

長遠不過不失,不過增長力比過往略有減弱,現價合理,但潛力度不足。

此股唔係無投資價值,但整體質素只係平平,唔建議持有太多。若佢佔你組合比重好少,你可以守。

但如果佔較大比重,建議你沽出部份,換至其他優質股,咁會較好。

我相信現時內房的問題,對佢無核心性影響,但股價會不利,相信過1年會好翻D,到時股價會上翻D,但未必上到你買入價。

Q24027:

龔sir,想請教你。思摩爾控股股東建議融資,消息是好是壞?謝謝

龔成老師︰

思摩爾國際(6969)這個動作,簡單咁講,就係發債去收購其他公司。

而這個債券的持有人,係有權將手上債券,換成思摩爾國際(6969)的股票。

若這些債券持有人,真係去進行債換股的話,集團總發行股票會多左,變相每個股東的盈利會被攤薄。單單考慮這個動作,係對現有6969股東不利。

不過,我地要考慮埋新購企業,對集團發展,有無正面影響。而且,就算這批債券全數被兌換成6969股票,都只係會總已發行股本的0.97%,影響好輕微。

所以,你去決定投資這間公司與否,這件事唔洗佔太大比重,主要考量翻現有公司品質就可以。

係霧化科技解決方案提供商。近期國家衛健委表示電子煙並不健康,相信對佢會有影響。

先講佢業務,第一,佢以ODM模式為全球煙草公司及獨立電子霧化公司(如日本煙草、英美煙草、Reynolds Asia-Pacific、RELX及NJOY)研究、設計及製造封閉式電子霧化設備及電子霧化組件。

第二,佢做研究、設計、製造及銷售自家品牌(包括「Vaporesso」、「Renova」及「Revenant Vape」)開放式電子霧化設備或APV(高級進階私人電子煙設備)。

相信,中國將加強行業監管,對佢有核心不利,這點都會影響企業估值,加上這股一向唔平。

基本上業務不算差,有當中的獨特性,以及長遠有增長力。不過,現價唔算平,加上監管風險,如投資,要小心控制注碼。若要投資,小注好了,這股有長線投資價值的。

Q24028:

你好,我今年36歲。每月會存3000到銀行,1500儲蓄保險,另外1000自願性供款。

今年11月會升職加薪,預計每月可存到$10000-12000。想知道如果運用儲蓄或投資才恰當?初學者可先看那些書?

龔成老師︰

你36歲,應以增值為主,建議你用「平穏增長股」 + 「潛力股」作組合,去創造一個增值平台。

"保險"主要係用來防守,買足夠保障就可以。儲蓄成份架保險,唔係唔可以買。如果你個人風險承受能力好低,或者完全無投資能力,這類保險都有持有價值。

但始終係財富增值角度,佢幫助好有限,一般我都就唔建議太多。做財富增值,應集中投資在優質資產(如優質股、物業等),效果才會理想。

現在你每月先用5成儲蓄,即$6000做月供。其餘先儲起,用一邊月供一邊儲蓄的策略。

由於「潛力股」係需要一定經驗和有一定波動性,如果你經驗較淺,可以先小注,大約佔組合2-3成左右。若你學到一定投資知識,才可以慢慢加到約5成比重。

至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨,然後長線投資。

除了透過以上月供方法,去累積資產外。同時間,你要去努力增進投資知識,來提升你財富增值效果。你要多讀投資相關書本、年報,新聞和報讀相關課程。

書本上,你可以睇我寫架《80後千萬富翁》、《財務自由行》和《股票勝經》,都適合初學者。

另外,本人的【投資倍升股課程】適合初學者的,每一課後都會有指引比你,要你在一星期內找那些資料,溫那些內容,只要你跟著去完成,到你讀完整個課程後,你已能自己選股、投資、評估平貴,在投資上已掌握了一定的知識。

Q24029:

你好呀龔sir,我依家上緊你嘅股票初班,上一堂見你話如果有「困難」可以同你傾,比下意見,我就冇財政困難,不過有啲計劃上想你比d「意見」

我既情況係敢三十多歲,哥哥同我暫時未婚,目前同父母住係由父母名購買的居屋。上年同哥哥聯名抽到白居二置業要供20年。

每人月供$5000,原本的計劃係我做業主,哥哥係家人。2年後哥哥除名,佢再抽居屋。但最後因為我係自僱人士上年疫情影響收入,冇稅單做入息證明。

結果要加哥哥一齊做聯名業主先可以過壓力測試置業(因為購買的居屋樓齡太大要好似私樓敢壓力測試)

所以我哋一家四口只有2個物業,但就冇哂首次置業既資格。將來如果結婚,各自都不符合資格抽居屋

敢我上咗4 堂課,我都有個目標想儲100萬,再將去滾大,將來有機會可以再置業

問題係,我係自僱人士,暫時收入平均約1.5-2萬,有30萬儲蓄,我係度諗,如果將來有機會滾存到首期再置業,將父母名既居屋出售,新物業用父/ 母名購入,因為父母已經退休,

只可以以我/ 哥做擔保,哥哥收入約2 萬,我可以以稅單做收入證明

因為上次置業嘅經驗,有朋友建議我成立有限公司,出糧俾自己,咁樣就有入息證明同稅單(因為其實只係手作生意,收入不算十分穩定,但我期望學懂選擇優質股去增加資產)

雖然距離再置業還有一段距離,不過我都想一個目標。

敢我是否應該成立有限公司,還是照只是以收入去報稅證明入息?

還是我已經有一層負債,基本上都比較難再以父母擔保人置業?

當然一切重點我都知係以儲錢為主先,感謝回覆

龔成老師︰

你現時最大問題,如何在若干年後,幫你哥哥除名外,而你又可以一個人承造到按揭。

首先,如果你2年後居屋是不會補回地價,業權是不能自由轉讓。你哥哥能否除名,係要提供原因(例如結婚要搬去同配偶同住等,你可以睇翻官網資料),等房署批准。

以你現時情況,你成立一間自僱公司(必需有實際業務,有盈利),去定期出糧比自己,去提升自己借貨能力,都係一個方法。

其次,就係儲錢去令你可以減低按揭成數,幫你可以過到測試,去一個人做按揭。

至於你將來有機會再置業,你係可以在父母出售現有物業後,去用佢地首置名額去買。

但以你現時經濟狀況,你和哥哥本身已經有按揭在身,較難再去做擔保。而且,你買首間物業都較吃力,唔建議急於去再考慮第二間物業。

加上,現時租金回報率不高,若有新資金,應先投入優質股去增值會較好。

Q24030:

老師 想問下3800點睇

我3.2入

龔成老師:

保利協鑫能源(3800)復牌後升翻,主要是業績唔差,同時停牌期間,多晶硅價格上升不少,加上行業對產品一定需求,都令股價反映過往停牌時的利好因素,不過,我對這股有D保留。

佢之前有核數師請辭(雖然已再任命新核數師),但我對這類股票,會較有保留。

睇翻2020年度業績,收益錄得146.21億人民幣,按年下降24%,毛利37.02億元,下跌20.9%。虧損由2019年度1.97億元,擴至56億元。

到2021年中期業績,盈利約24億元。

你會發現,盈利的波動好大,其實好受多晶硅價格影響,而價格其實可以有好大變動,令投資這股都有風險。

另外,獨立核數師提出關於持續經營的重大不確定因素,不過,並無發表保留意見,算是好轉翻。

第一,你要明白這股的風險。

第二,你一定要控制注碼。