恒指服務公司周一宣佈推出科技指數，這幾天坊間都有唔少評論，切入點有很多角度，例如點解冇港資企業，點解選股行業咁有趣，會冇咗一些新經濟股份，青冰十分贊同選股有問題，不過由於恒指公司慣性出人意表，既容許金融股佔恒指比重近半，又唔敢踢走一些沒落中的地產股，所以砌個科技指數砌到三不象，青冰不會感到意外。

要成為一個旗艦指數，除了成份股要勁，主題鮮明，最重要的是究竟有冇得炒，早幾日青冰在專頁中都提過，要有ETF、期指及期權，才會衍生得到牛熊及窩輪，整ETF可能係最快，買貨砌掂就OK，當然要對沖，一定要有期指及期權配合，而這個需要較長時間，仲要等成交活躍，多機構投資者參與，慢慢才會變成「納指」。即使所有監管機構及市場人士光速配合，這些事都起碼要三個月至半年才有睇頭，換言之，在此之前，這個指數都係read only，有得睇冇得炒。

這個指數會每季作檢討，假如半年之後先有得炒，咁其實成份股可以有很大改動，所以無需花太多唇舌去爭論成份股名單，試想想，下半年應該有更多的中概股回歸，仲有螞蟻集團要上市，曾傳過回流的拼多多、攜程、百度、新東方及嗶哩嗶哩，隻隻市值都過千億，仲未計或者會來的字母跳動及滴滴出行，坦白講，現時排名二十以下的隨時要全部out，所以現時話恒騰網絡(0136)要out，香港電視(1137)應入，意義不大。

如果港版納指搞得起，咁青冰即時會諗到，三大指數定位會更趨模糊，戰友都知道，現時恒指及國指已有不少股份重疊，美其名國指係中國企業作主體，但重磅股同恒指都差不多，較大的分別可能係，國指冇弱雞匯豐(0005)及土炮地產股囉。恒指公司8月會首次納入W股為成份股，市場認為日後會引入更多新經濟股，為恒指添動力，但如果投資者想避開金融股，買旗幟鮮明的科技指數會更佳，咁嘅情況有啲似倒自己米，但青冰都係嗰句，這些事發生在恒指公司，絕對唔出奇。

有說恒指及科技指數，應該以道指及納指為目標，但人家兩大指數定位咁清晰，道指不會被單一行業獨大，選股嚴謹，不是市值大就大晒，相反恒指就以摸頂揀新貴聞名，相信科技指數都會繼承這個傳統，有得炒時應該「只是近黃昏」了。

-- Fb個人專頁 http://www.fb.com/chingbing888