華富財經 Quamnet.com Logo
青冰
2018-12-28 00:54:00
今年學懂了甚麼

2018年將盡,今年係贏定輸應該已有定數,青冰今年幸保不失,錄得微利,除了是幸運之神眷顧,也拜嚴守紀律所賜,但整年以來也交了不少冤枉的學費,看錯當然抵輸,但叫得冤枉,就可能是看對沒有贏,不要以為冇贏係閒事,因為今年贏錢好難,唔積多啲真係唔夠其他輸,最後可以頂到年尾,全靠一兩隻心水股發圍,先夠畀隻熊蠶食利潤。

青冰每年都會為自己的倉位作回顧及檢討,看看大小戰役有咩做錯,下次如何可避免,今年做錯的事勁多,不過今次先回顧今年學懂了甚麼,有咩進步。

首先學到的就是政治,這全拜侵侵所賜,以前專心研究財經大小事,絕對搵到食,今年經常要留意中美政治之事,中期選舉又要識,美國跟沙地的關係又要睇,講真要學睇,都唔奢求可從中取利,反而更希望唔好成日畀佢fake,輸少啲冤枉錢而已。

其次就是今年開拓了新的戰場,多了參與全購及私有化股,當然全部都係消息公佈後去玩,以往冇用心去睇,因為總是覺得水位有限,浪費精神,但當你累積經驗之後,這個以大博少的遊戲,便會懂得何時入場,甚麼level才值博,慶幸今年有點運仔,在盟科(1629)、自然美(0157)、先進半導體(3355)及港機(0044)幾隻股上都有進賬,而在春泉(1426)及國浩(0053)卻沒有進場,算係今年力保不失的主因。

以往炒恆指、摩指及港股通的新貴,都會有少許斬獲,今年唔知係咪市況太差,全部都失靈了,所以無論做了多少功課,有幾多年數據支持,最後都要出門前搵定逃生門。中國生物制藥(1177)於9月7日收市後加入恆指,按以往慣例,新貴極少收陰燭,當日以9.47元開市後向下,照睇就好具值博率,中午前後仲一度倒升,咁睇黎掛定十蚊走都得啦,點知收市前買盤不似預期,最後也決定以競價離場,雖然是微蝕,但一切紀律行先嘛,如果心存僥倖睇多兩日,三日後佢就真係跌夠兩成半添。

最後學懂的,當然是Cash is King啦,15年大時代青冰完美執行過一次,今年明顯係做得唔夠徹底,雖然在6月時看到幾個當炒板塊死直,深信熊市已成,趁不斷的反彈作減持,但大概只維持七至八成現金,但偶爾都有心水股浮現,又會買返啲,如是者現金水平雖高,但未去到大市狂插都唔會痛的境界,這也是Q4的寫照,係呀整年表現係唔錯,但無適時食糊,無辦法完成每年訂下的目標,失敗。

各戰友今年交咗幾多學費呢?交唔緊要,記住一定要學到嘢,下年先會有進步啊。

Fb個人專頁 http://www.fb.com/chingbing888