端午節休市，但美股就因憂慮疫情第二波而急跌，大家都好關心港股在假期後會否跟住插水，這個當然要睇埋昨晚美股是否反彈，執筆之時仲係跌嘅，今日就想講吓，青冰平時會睇甚麼外圍指標，幫助應對翌日港股開市。

外圍走勢就梗係睇實美股，傳媒最常報導的道指，其實在專業市場就較少人注視，現今睇納指及標普是最重要的，不過港媒幾十年來習慣使然，都係講道指大家先有feel，都係嘅，即使你知道標普係約三千點，納指係約一萬點，但升跌幾巴仙都係一百幾十點，完全感受唔到個威力，道指的上落夠大，同恒指又差唔多，較易理解。

隔夜美股指數，會影響港股開市，但別忘了更影響港股當天走勢的，就是美股期指在港股交易時段的走勢，這個嘛，青冰必然會看標普e-mini，作為成交最活躍的期指，認受性最高，近期都開始看多了納指100期指，因為科技龍頭太猛了，點都要睇實。

而在亞洲時段看這些美股期指，很多人就只看升跌，但欠缺理解當中的時點。舉個簡單的例子，美期在亞洲時段跌4%，港股肯定受影響啦，都好難唔跟跌，但到夜晚美股開市，裂口低開後回升，雖然都係跌，但收市跌幅收窄至2%，然後美股的夜期，亦即太平洋時段，港股未開市之時，再升返1%，咁你覺得港股開市應該係升定跌呢。看似好複雜及波動的例子，但在今年經常發生，只是方向有時不同，冇留意這些時點及走勢，股民可能會諗，點解美股昨晚跌咁多，港股仲有得反彈架，肯定係人為托市啦。現時資訊發達，市場極有效率，你要面對的是更多更專業的跨市場交易員，甚至是AI，又要炒得貼市，但又唔搞清楚這些，只能說祝你好運。

另一個傳媒經常講的黑期，即是新加坡某場外交易商的恒指期貨，坦白講青冰真係好少睇，主因係從來唔知成文量有幾大，彭博機都冇這個指數，加上現時有恒指夜期，標普e-mini，能覆蓋的交易時段已十分足夠，黑期最有賣點的，就係假期都繼續有交易，例如昨天端午節咁囉，港交所夜期在周四凌晨三點就收工，昨晚休市冇交易，咁黑期自然成為唯一指標，但唔代表有好大用處。

講到尾，港股升跌，始終都係睇自己主場，這是最近兩年的體會，外圍市況都只是用作參考而已，但參考都要識睇細節，否則每天都會問，點解美股大跌我哋又升嘅？

--

Fb個人專頁 http://www.fb.com/chingbing888