華富財經 Quamnet.com Logo
龔成
2021-12-15 14:00:11
【龔成問答信箱】(Q23851-Q23860)

Q23851:

你好,請問TSLA 可以再大量入手嗎?

我係岩岩這2日先買左幾股。想知道可否再買?

龔成老師︰

Tesla不差,增長快,股價向上好勁。不過穩健度不足,股價上落好大。

市場方面,有危有機,因為電動車是高增長市場,但行業結構變化大,存有未知數。

另外,股價上落太大,市場超前反映前景因素,只要增長力比預期差少少,都會有明顯回落。

現價計PE去到300倍以上,係好貴。如果你長線睇好,預佢股價上落一定好大,唔好理中短期股價,長線持有。由於現價偏貴,只宜入好小注,明顯唔係大注時候。

Q23852:

老師,早晨。我有$10000 月供資金,計劃分配如下:

2800: $8000

3067: $1000

1810: $1000

年齡:50歲

1) 以上分配適合嗎?

2)現價可以開始嗎?

謝謝

龔成老師︰

  1. 這樣分配都可以,但安碩恒生科技(3067)和小米(1810)係潛力股,始終有一定風險。不過你注碼不太大,勉強可以。

另外,你現時這個組合,要按年紀去調整。當你年紀漸長,就要慢慢調低佢地比重,換成收息股。到你退休時,收息股應佔組合100%。

  1. 你現時已經可以開始,緊記月供係一個長線計劃,月供最少維持3年,並持有這些股票5年以上,才會有較理想效果。

當然,可以的話,最好一直持有。因為,優質股持有時間越長,財富增值效果就會越理想。

另外,現時大市只在合理區,每月儲蓄唔好用盡,要留有部份,等大跌市時可以入平貨。

Q23853:

龔sir, 我望住2820愈跌愈有

但我$145入的,可繼續等到家鄉價嗎?

龔成老師:

GX中國生科(2820)基金是被動ETF並旨在提供在扣除費用及開支前,與Solactive中國生物科技指數NTR(指數)表現緊密相關的投資回報。

最大的問題是之前貴。

現價算係合理區頂,這基金可長線的,但類別是風險類,你要預佢價格會好波動。

你要分析這基金長遠是否有發展,而不用太著重這刻的價格。

Q23854:

阿sir,跟左你個page一段時間,我開始會揾一d我自己認為的潛力股,想問下阿sir有冇睇開8328,信義系,有冇潛力?

龔成老師:

信義儲電(8328)由信義玻璃(0868)分拆上市,主要在香港從事汽車玻璃的銷售、安裝及維修。

佢於中國內地生產及銷售鋰電池產品、電池包、儲能系統,以及提供合約加工服務。

這企業長遠發展正面,有潛力,但要留意業務較波動,同時現價貴,如想投資,小注好了。

Q23855:

你好,3067現價可買嗎?

龔成老師:

安碩恒生科技(3067),有長線投資價值。

這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。所以有長線持有價值。由於基金有30隻股票,比起單一股票,風險能減低。

這基金上落較大,現價大約在合理區中間,因此,這刻不能大注投資。

最好的策略,就是月供,或自行分注小注慢慢收貨(例如每月買一次、或2個月買一次),總之慢慢入,不能用盡現金,原理如同不斷儲貨,這樣就能平均買入價,減少風險。然後就長線持有。

Q23856:

之前想30-40%入939 @5.4,我見到佢股價好低,再下跌有限,就算跌有7厘息,所以唔怕。

以你看法不認同,都想聽你意見,如果入左6目標

看到你文章,每月$3000,9988,700,3690,但手續费高,用証券又佢經纪盗用買股,66好稳

Thx 你無私回覆,上次9988 因為你 post 留言我先至入货,可以講係我赚到小小係有你幫助加同事建議

龔成老師︰

唔洗客氣,我都只係分享下一些投資心得。但緊記阿里(9988)係有長線投資價值,唔好賺少少就沽貨,要長線持有。

建行(0939)有質素,不過佢只係收息股,你唔會預佢股價有明顯增長。若你係年青至中年人士,不要持有過多。

另外,銀行股由於本身營運模式,令佢風險會較高。故整個銀行業佔組合比重,最好在20%以內,個股就15%以內。

至於阿里(9988)、騰訊(0700)、美團(3690)你可以月供,但美團不確定性較大,小注月供好了。至於月供手續費,最好係月供金額1%以內。

如果真係太高,可以集中翻係個別股票,或者供安碩恒生科技ETF(3067),佢都包含左上述3隻股票。如果無得供,你就每月1手手咁買,佢1手成本唔高。

但這些都是潛力股,風險比較高。就算你年青,都只宜佔組合5成,若較近中年,比重要進一步下降。其餘組合,應用平穏增長股作主力。

而港鐵(0066)都是平穏增長股,相對這些潛力股會較穏陣,現價合理,無貨可以入首注。

至於你擔心經紀盗用買股,你就選用一些信譽較好或者大型的證券商,咁就會較安全。

Q23857:

先生你好!#2380我於$1.8買入,本來打算用作收息,升至$2.8全數沽出。打算低時再買入,但現時持續$3.5或以上,現價請問應否再買入用作收息?或應如何部署?謝謝!

龔成老師︰

中國電力(2380)業務不差的,近年有發展新能源,帶動業務增長。

佢主要在中國開發、建設、擁有、經營及管理發電廠。過往業務都有增長,不過盈利有少少波動,主要受成本及定價因素影響。

近年有發展風能及太陽能業務,成果不差,帶動企業增長,現價已經係合理區頂,你有貨就暫時不要再加注。

另外,我地投資唔好去"估走勢",無人知你沽左貨之後,會唔會一如你預期咁再跌,佢可能會反而大升,到時你就會進退失據。

所以,除非去到大市好狂熱,或者佢質素變差,你才好考慮減持。

此股現價已經唔算平,如你無貨想再買,可等回少少先小注投資。

Q23858:

請問1148新晨動力 你的分析是怎樣的?

龔成老師︰

新晨動力(1148)2013年由華晨中國(1114)分拆上市,主要在中國從事開發、製造及銷售乘用車及輕型商用車輛的汽車發動機,以及製造乘用車發動機零部件。

睇翻佢過去幾年數據,無論營業額和盈利都出現下跌情況。而且,佢本身負債水平都略高,係一個會扣分地方。

整體而言,此股投資價值一般。現價已經係偏貴,值博率不高。

Q23859:

老師,想問問近日內房跌咗唔少,如果宜家趁低價小注可分段入市可以嗎?另外,近日車股急升,但冇貨可以點部署?

龔成老師︰

你要睇翻佢本身質素和財務狀況,過去內房負債高,現時因政策問題,令樓市放緩。因此,不少內房股都出現回調。

但唔好因為佢地跌左,就覺得抵。你要睇翻個企業,有無因為咁而令財務問題,進一步惡化。

另外,由於樓市放緩預期係一個長線情況,在大環境改變下,這些內房股價值都要作出調整。以往算平的水平,可能今天只是合理,所以你投資前,要分析清楚。

至於新能車相關股份,近日出現大升,好多都到了貴水平。如果無貨,就只能等。若該隻股票未自貴得好過份,你可以小小注。等有明顯回調,才正式入貨。

如果你睇好新能車,可以考慮GX中國電車(2845),這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股(002594),以及與中國電動車產業有關的股票,中國因為能源問題,長遠一定要發展電動車,這是大方向,故此股有一定投資價值。

此股現價合理區頂至略貴。無貨可以現時入少少,到有明顯回調才再慢慢加注。

潛力度是有的,但會比較波動,如投資宜慢慢分注,可長線。

Q23860:

阿sir, 想問2845同3162邊度Etf既潛力度好d呀?因為低位錯過比亞迪,之後又一直升無錢買,又唔想買其他車股,想搵etf,

但2845都升左唔少,岩岩有一個新既3162,入埸費低,可唔可以長期去買,持有3162定應該草錢買2845呢?謝謝

龔成老師︰

唔好有個錯覺,入場費低就係平。你要用企業價值去分析,而唔係1手買入成本。

南方全球智能駕駛指數ETF(3162)長遠有潛力。

基金涵蓋智能駕駛全產業鏈,包括智能升級的三大部分,即電池、芯片、車企。

基金跟蹤指數為Solactive全球智能駕駛指數,選股範圍包括在美股、A股、港股上市的智能駕駛產業鏈公司。相關行業包括汽車和零件,半導體製造,電氣設備和電力系統,特種和高性能化學品等。當中最大持股,係TESTLA和寧德時代。

現價唔算平,但可以月供,長線,只要控制投資金額就得。

如果你想買比亞迪,我建議你買GX中國電車(2845),這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股(002594),但現價都係略貴,只宜小注或月供。