睇返今年的交易記錄，原來都有玩過唔少馬雲系的股份，一如以往，佢嘅股票都係甚難玩，又或者青冰跟馬雲的八字唔夾啦，記憶中損手及不過不失的佔多數，當中兩隻贏錢的，一隻係阿里健康(0241)，另一隻係雲鋒金融(0376)，係呀即使阿里巴巴(9988)今年係大漲小回，似乎都未有為青冰帶來顯著得益。
雲鋒金融在本周宣佈配股，翌日股價一度急漲48%，今次可以講吓如何解讀。先回帶至4月，青冰曾撰文講雲鋒，就是看好其保險業務，及低殘的股價，當時股價約在3.2元，以昨日的收市價計，累漲24%，但極多股票自4月起升五成甚至一倍，所以升得兩成零絕對唔合格，況且只要戰友開個圖出來，就見到走勢係行三步退兩步，每次以為有突破，都會返回原地，本周二早段升48%，但及後升幅曾收窄至一成，走勢相當嚇人。
雲鋒在3年前收購美國萬通保險的亞洲業務，當中部分代價，是發新股予美國萬通，作價6.5元，有8億股，佔約24%股權，由於股價這幾年乏善足陳，青冰都有懷疑過，是否要將美國佬的持股收歸，隻股先至識行，結果本星期的配股，將這個疑慮掃清。
公司話經過慎重考慮，想集資又唔想供股或者發債，下刪一百字的壞處，亦有想過批股予第三方，但最後認為，想加強跟美國萬通的策略性聯盟，所以決定發新股予大股東及萬通，作價3.17元，集資約20億，交易完成後，大股東(馬雲及虞鋒)持股將由41.66%增至47.25%，美國萬通就只是按比例認購，股權仍維持在24.82%，但公眾持股將由33.52%減至27.93%，交易在稍後要舉行股東特別大會表決。
早前擔心美國佬要批股走人，現在反而按比例接貨，證明萬通都有意長期持有雲鋒，所以及後股價大升，就是因為掃除這不明朗因素。通告話集資所得的60%，會用作潛在策略性投資，詳細資料就欠奉，只係一句提升業務多元化，照睇就不會是投資保險，最有炒作味道，就是跟螞蟻有合作，一個有錢，一個有保險產品，理應合拍，不過又提返戰友，睇個圖就令人相當唔開胃，要頂得住行三步退兩步的步法，先好入場呀。
--