華富財經 Quamnet.com Logo
青冰
2019-02-01 01:12:00
信自己不如信市場

首個月恆指升咗8%,相信令極大部分人跌眼鏡,青冰在月初時亦偏向看淡,但寄語即使市況幾差都好,一年總有幾個月係好炒的,所以不必過份擔心,調節倉位及心情就可以。結果大市再次殺大家一個措手不及,跌到殘的藍籌識反彈,亦都有幾個主概念在炒作,甚至靜咗好耐的二三線股,都可以單日升兩三成,證明個市真係返咗黎,只是唔知可以玩幾耐。

青冰幾時都話,估下年點行真係冇用,下個月都估唔到啦,所以炒股永遠都避免有既定立場,例如今年中港經濟唔好,美國科技股已洩氣,今年好難有得升啦,這就是既定立場,如果思維上都根深柢固地覺得自己不會錯,一月應該錯失咗唔少機會,冇賺已經係較好,最弊就係同個市鬥氣,一路做淡但唔認錯唔止蝕,最後愈挾愈有,青冰唔太熟甚麼牛熊理論,但記得前輩老曹講過,熊二係會有反彈,仲要升到好似牛市一樣,最後消弭埋這些購買力,進入最慘烈的熊三,究竟係唔係,日後市場自然會話你知。

月初時青冰以輕倉上陣,看法偏淡但不做淡,現金keep在高水平,只留一些核心股,但最深刻的是,頭十日個倉都係潛水,雖然都只是淺潛,但其實個市第三個交易日見底,換言之都有超過一星期落後個市,開頭就可以阿Q話去年贏錢,呢幾日當做拉近返少少囉,但之後愈升愈有,開始頭痕了,跟住在專頁都講過,有些股出咗壞消息或數據都冇再尋底,市場其實係話緊畀大家知,市底轉好喇,要搵嘢買喇。

在月中之後改變策略,將手上一些死股(唔郁嗰啲)減持,之後追返一些國策概念股,整體上現金水平沒有大幅下降,但總算為個倉注入動力,一月埋單梗係升唔到8%啦,但都達到自己每月的目標,稍感欣慰。

去年12個月加今年1月,其實是一個很好的歷練機會,青冰並非甚麼大師,只是一個專業少少的老散,但深深感受到,沒既定立場,不時調控倉位,及嚴守止蝕,這些連盲毛都知的概念,做得到一定有益,你叫青冰寫十隻必升股份真係未必做到,但以上的幾點,青冰好肯定的說,一定得囉。

係喎,點解個市升到咁靚仔,都講呢啲嘢呢?補充返句,青冰信誠哥早前之言,雖則升到咁開心應該愈來愈少人記得架喇,但自己心裡仍謹記誠哥的話,短時間精神分裂沒問題,之後有事記住識走就OK喇。

Fb個人專頁 http://www.fb.com/chingbing888