上星期本欄話未來兩個月，阿里巴巴有機會實現回港上市，點知今星期已經疑似應驗，路透社傳出最快將於11月掛牌，集資額約100至150億美元，今次就集中討論如果落實上市，對港股的影響。

首先留意兩個月日子，就是今天及11月11日，今晚美股開市前，阿里巴巴將公佈第三季業績，管理層難免會被投資者問上市的細節，如果是不願置評之類，咁相信都肯定是事實，只是會否乾脆直接宣佈消息而已，如果今晚唔講，按路透社的消息，將會在11月11日後宣佈，大家都知每年雙十一對巴巴幾咁重要，所以揀重要的日子宣佈，亦都唔奇。

貴為超級企業，集貨額又大，對港股肯定會帶來沽壓，尤其是近期熱炒的新經濟肢份，因份屬同類，資金沽貨換馬至巴巴，乃是正常操作，較大影響的，自然係騰訊(0700)及美團(3690)，兩股都是重磅股，或會成為套現目標。不過對於新經濟股的實際影響，青冰偏向會利淡騰訊，而不是全部股份，只要招股反應好，資金追捧，其實都會帶起同類股的估值，究竟套現及估值邊個大力啲，還是視乎新經濟股自己的質地。

由於現時同股不同權股(W股)，已被納入港股通，所以巴巴一到，入港股通就變成順理成章，青冰亦fc過，恆指公司寫到明，無論W股是第一還是第二上市，都符合納入恆生綜合指數，換言之，港股通就入咗九成九。咁呢個情況係會利好港交所(0388)，因為內地資金等咗咁多年，終於可以買阿里巴巴，初段的成交額將非常龐大，再者應該又會係上市時百輪齊發，兩方面都會增加港交所的收入。

而另一個影響，就是會抽緊銀行體系的資金，話晒都係百幾億美元的集資額，仲要計埋屆時投資者狂抽孖展，各金融機構都會預早留定個錢傍身，咁自然會令拆息趨升，如果上市日期是在12月就更麻煩，臨近年尾，資金只會緊上加緊。

究竟傳聞會否成真，等多十日應該肯定知喇！

-- Fb個人專頁 http://www.fb.com/chingbing888