Q24101：
老師你點睇NFT?
會有文章介紹下嗎？
龔成老師︰
NFT「非同質性代幣」（non-fungible token，簡稱NFT），要認識NFT，須先了解「同質化」（fungible）與「非同質化」（non-fungible）的分別。
同質化即是擁有相同外在價值，可以互換，如比特幣、以太幣等，只要幣值相同，這一枚貨幣與另外一枚沒有分別。
而非同質化指是獨一無二，不能互換的資產。非同質性代幣（NFT）是加密貨幣的一種，只是每枚都包含了唯一性的識別信息及資訊記錄在區塊鏈上。
你可以視NFT為一個容器，佢將不同的資產，連結到區塊鏈上。令這些資產可以透過區塊鏈技術，去進行交易，大大提高其發展可塑性。
至於NFT價值，唔係睇NFT這3個字，而係睇翻被承載的資產本身架投資價值。
現時市場NFT，普遍以一些藝術性作品為主。以本質來說，這是人為創造出來的，絕對不是「資產」。市場會如何定義其真正價值，其實係好難掌握。
只能說，現時NFT市場有點過熱，已經有出現泡沫的情況，要小心。
NFT的價格，現時市場主要受其關注度、開發者/藝術品內容的名氣、稀有度等因素所影響。因為背後無太多實質支持，價格經常會大升大跌。
多人關注，可以升得好勁。但當市場關注度減退，可以回調得好緊要。
我唔係話，NFT佢完全無投資價值，但要做個合理估值，係極其困難。因此，你就算十分睇好個NFT項目，都唔好過份進取，小注博下好了。投資永遠都係要先考慮風險，再考慮回報。
Q24102：
龔成老師，我買左美股AAPL@142,而家佢升左我想加注，請問遇到這個情況，什麼時候/價位加注合適呢？
龔成老師：
Apple（AAPL）有質素，無論持術、發展、品牌、銷售網絡都十分強，是可以長線持有的股票。
佢設計了各種各樣的消費電子設備，如智能手機（iPhone）、（iPad）、智慧手錶等。
而iPhone占蘋果總收入的大部分。另外，蘋果亦為客戶提供各種服務，亦是一些延伸的賺錢模式，如蘋果音樂、iCloud、蘋果電視、蘋果支付等。
由於已經發展得好大，因此，最高速增長期已過，之後會進入穩定的增長期。長遠的投資價值仍在，但要留意股價。近年大部分時間在合理區中上部至頂。
你原有貨可持有，但加注，最好等回翻少少先。除非你現金好多，就現價小小注。
Q24103：
成哥你好，我現年45歲，月入58k，有股票700k、現金210K丶月供股票260k丶基金440k，另有一份人壽儲蓄170k(未供完）及MPF 950k。想開始計劃10-15年後退休。
出年2月供完層樓，打算借足9成買530萬內的樓作投資，但近日得悉有融資保險，據說好過買樓，想問吓你的意見，謝謝！
補充：如果明年買樓，需要賣出部份股票及月供股票或基金，但股票現時都在跌的狀態，亦未必在明年升得返，應該如何步署會較明智？謝謝
龔成老師︰
物業都係資產類，有投資價值。不過，現時香港整體租金回報率唔高，投資物業的值博率，明顯較優質股弱。
除非你個盤係好有潛力，個價位又好靚，否則建議你暫時維持以優質股增值，會較好。
至於保單融資，其實就係透過借貸，去以槓桿形式放大回報。相比傳統儲蓄保險，佢增長潛力會相對較大，同時風險會相對較高。
若保單實際回報，係多於貸款利息，投保人自然會因為槓桿操作，而令回報放大左。
但由於保單本身，好多時回報和利率都係不保證。再加上貸款利息，多為浮息。在低息環境，固然會受惠。但進入加息週期，利潤將進一步被蠶食。
因此，用保單融資去投保，係有一定風險。
其實係財富增值上，最好集中係優質資產上(如物業、優質股)。
"保險"只係一種產品，主要係用作防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。
但最好係一些較傳統儲蓄保單，而非這類有槓桿性質的產品。
不過，保險其實主要作用係防守，所以重點係放在保障型計劃上。只要你買足夠保障，已經可以。儲蓄保險唔係唔買得，不過佢增長力唔高。持有過多，會拖慢你財富增值進度。
你現時股票700K和現金210K比例，可以。餘下現金，就等大跌市才動用。整個財富組合，我建議你維持現狀，現時大市氣氛較弱，股價出現調整係正常。
你只要審視翻佢地長線質素，有無轉壞的情況。如果無，你照長線持有就可以。
Q24104：
請教老師8328信義儲電會否是倍升股嗎？
龔成老師︰
信義儲電（8328）由信義玻璃（0868）分拆上市，主要在香港從事汽車玻璃的銷售、安裝及維修。
佢於中國內地生產及銷售鋰電池產品、電池包、儲能系統，以及提供合約加工服務。
這企業長遠發展正面，有潛力，但是否倍升股，暫時未知。因為佢較有潛力的新業務，都係近1,2年開始，較少數據能參考。
潛力股係有，但要留意業務較波動，同時現價貴，如想投資，小注好了。
Q24105：
老師您好，想問以企業前景同質素，六福00590同中信股份00267 邊隻較好。謝謝您
龔成老師︰
我地當分析企業時，要從長期角度分析，自由行對六褔（0590）有很大影響，中短期一定好弱，不過從長期來看，自由行點都會慢慢好轉，這只是時間問題，這企業亦會因此而回勇。
當然，最重要是企業「捱得過」這關，而六福是無問題的。
現價合理，可以分注。等到自由行好轉，長線。都有投資值博率。
中信股份（0267）係綜合企業，有多項業務：
（１）金融業分部提供銀行、信託、資產管理、證券和保險等服務。
（２）製造業分部從事生產和銷售特殊鋼、重型機械及鋁輪轂等。
（３）資源能業源分部從事原油、煤炭和鐵礦石在內的資源及能源產品的開採、加工及貿易等業務。
（４）工程承包分部為基礎設施、房地產和工業項目等提供承包和設計服務。
（５）房地產業在中國內地主要從事綜合體和商業地產項目的開發和管理以及城市更新和發展業務。
雖然業務多，但不算做得好好，每項業務的發展力都不強，整體質素只是一般。
現時股價有合理區中間，投資價值不是無，但這股增長力始終一般。收息可以，但對股價唔好有太大期望。
2者相比，六褔（0590）在質素和增長潛力，都會較中信股份（0267）好。
Q24106：
你好龔成兄，想問你點睇阿里健康241?值得繼續月供嗎?本人由今年年頭開始月供，計算上已經蝕左40%，但我知道月供就係睇長線的道理。
想問比較241和1833平安好醫生，1177中國生物製藥這類醫療股的長遠發展，哪隻比較值得月供呢?如果只擇其1。
龔成老師︰
阿里健康(0241)和平安好醫生(1833)都有投資價值，但由於佢地盈利模式，都未曾成熟，甚至係一直處燒銀紙狀態。
因此，低風險者未必適合投資，若投資者考慮這股，亦不能大注投資和月供。買入後就耐心長線持有，等待這企業改變整個行業的情況。
而中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。
佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。
但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。
就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。
由於中生已有一個穏定的盈利模式，再在用部份盈利，去研發新項目。這種模式較為穏定，是可用作月供的選擇。
Q24107：
成老師你好 想請教一下我呢幾年一直都好努力咁買收咗息股 從而製造被動收入 希望會有每個月$35000 提早退休 但係好多都賺息蝕價 請問有何建議
其實港股 大部份嘅我都有 好多都係賺息蝕價 例如 808 1881 405 435 97 3 1997 270 ， 老實講比較好的是1883 6 2638 and 6823 778 1038
龔成老師︰
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時不足40歲去計，應先以「平穏增長股」和「潛力股」，這類較有增長力股票，先去累積一筆財富。到有足夠本金，才去換成「收息股」，創造被動收入。
你一開就用「收息股」唔係唔得，不過整體增長力較慢，個效率會低左。
如果你希望每月有3.5萬蚊現金流，以股息率6%計，你需要本金700萬。如果已經有，你就可以直接用「收息股」，去創造現金流。
否則，我建議你將部份股票，換成「平穏增長股」和「潛力股」會較好。
另外，唔好太在意個帳面賺虧，因為再好的股票，中短期都會波動。但長線持有，一定會有理想增長。
你現有持股，都係有質素。但組合中，都幾集中係物業類股份(0808,1881,0405,0435,0097,1997,0778)。記住，任何企業和行業，不要高於組合15%和30%，否則會出現過度集中性風險。
Q24108：
龔sir 我想問下，我而家做緊一份工 做銷售嘅。
我做咗大概一個月到 但係個心成日都好抗拒返工咁 我有喺度諗我係咪未習慣 我又唔想好似好易放棄咁 但可能有啲經濟困難 就喺度諗應該搵返一份穩定啲嘅工
因為個日睇左你個條關於夢想既片 我就係到諗 我係咪應該追隨返自己心入想做既野
龔成老師︰
長線計，你最好追隨翻自已心中的方向，咁會較好。
因為咁樣做，你會較易投入和有動力，成件事會更易成功。
但當然，我地要同現實情況，去取個平衡。如果你希望做的事，得到的收入未必足以支付你生活和投資。
咁可能你要先去累積一筆資金，能夠讓你無後顧之憂。或者至少基本生活無問題，才去做你所想的事，就會較為穏當。
當然，如果你想做的事，係可以同時做到致富的效果，就最理想，加油!
Q24109：
你好啊，老師，今年29歲，今年年初開始睇你嘅page，開始買入股票， 想問下你嘅意見， 邊隻股票應該加注，同埋有無其他股票可以介紹。
依家買美國股票會唔會太遲呢？同埋有咩美國股票可以介紹？
呢度係我買左嘅股票：
3033 南方恆生科技
2845 GX中國電車
1448 福壽園
285 比亞迪電子
1972 太古地產
0003 中華煤氣
龔成老師︰
以你現時29歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。
你現時買的股票，都係有質素。現時這些股票都在合理區，但GX中國電車(2845)會係現價較高的一隻，暫時不建議加注。
其餘股票，如果你持貨不多，現價加少少都可以。
未來策略上，你可以投資「平穏增長股」和「潛力股」，去作為增值目標。你每月5成儲蓄做月供。其餘先儲起，用一邊月供一邊儲蓄的策略。
例如潛力股部分，就可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、三星FANG ETF（2814）。如果有投資美股，可投資QQQ。但佢地波動性和風險會較高，你要自己平衡。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
餘下的另一半現金，我地就等機會，當大市出現較大回調，就加大力度掃貨，然後作長線投資。
至於美股，現價已經係合理區頂至略貴水平﹐如果你無太多研究，我建議你先從佢ETF入手。現價雖然唔平，但用月供去儲VOO和QQQ這類ETF的話，都係可以。
Q24110：
龔老師，多謝你教咗好多長線投資的知識，只後悔識得太遲，以前10年前買落嘅股票都輸咗30%，總結咗10年收息同見賺就賣股票都係輸少少。但我又好想買層樓自住，
麻煩龔老師幫幫忙睇下我個案。
本人一家五口（3X歲夫婦，囡囡，奶奶，工人姐姐）一齊住九龍兩房居屋，而細囝將會下年新年出世，因地方太細，奶奶同姐姐又不能相處（已換3個工人），
所以想搬出黎自己住，請問可以有咩部署？
家庭月入$50000，總支出$38000，每月儲$12000。現金50萬，股票70萬（40%增長股，60%收息股，現價計仲蝕緊，主要係001，005，345，2888，2018共蝕14萬，其他有賺如386，700）
居屋月供$5000，老公單人名，欠72萬，2035年供完，無其他負債，又無兄弟姐妹。
而我名就俾父母自住村屋用咗，我不用供款，佢地月供$6000，欠60萬，2030年供完。本身想將間屋轉返個名俾屋企人，但佢地年紀大又收入唔高做唔到按揭。
家姐同姐夫聯名買咗私樓，又轉唔到俾佢地。
1/ 因為我地兩夫婦名已用，首置做唔到，如將現金full paid其中一層樓，再轉返名俾屋企人，就可以有一個人嘅名用，但到時我地又無錢俾新樓嘅首期，由頭再儲起碼要等多5年。
2/ 將其中一層樓做轉按，有多d現金，但到時又要俾雙倍印花稅，我地資金同收入唔多，實在負擔唔到。
3/ 試過增加收入來源，曾開舖做小生意，但投資失利，買股票10年都蝕多過賺。
眼見人人有車有樓，有朋友高收入樓換樓，有人租樓月月清，但為自由就無計。請問我地有咩可以部署？定係咩都唔好諗繼續一家4口要屈係一間房？
龔成老師︰
- Full paid其中一層樓，再轉返名俾屋企人，係一個方法。另一個方法，就係儲多D首期和15%印花稅，用非首置身份去買。
你睇翻邊個成本低D，又可以實行到，就可以用個個方法。雖然錢係會用多左，不過都無辦法。
- 的確以你們狀況，以無首置身份再置業，係較困難。你用轉按去增加資金係可以，但你會令自己負債水平高左，有機會影響新屋的借貨能力。
其實如果真係計唔掂，但又有實際需要，建議你先租屋住，去解決這個生活問題。
- 坦白講，以你現時狀況，除非生活有實際需要，否則你維持現狀會較好。同時間，你要努力做增值，為將來置業和生活做準備。
首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
你上述的股票，大部份都係有質素，係可以長線持有。至於出現虧損原因，唔係因為股票質素有問題，相信好大機會係你買貴左。
以你現時狀況，應應以增值為主。滙控(0005)、中石化(0386)只是收息股，不宜持有太多。渣打（2888）質素較一般，建議慢慢沽出。
其餘股票都有質素，你可以保留。
未來時間，建議你用「平穏增長股」 + 「潛力股」作組合，去創造一個增值平台，去累積置業資金。
現在你每月先用5成儲蓄，即$6000做月供。其餘先儲起，用一邊月供一邊儲蓄的策略。
由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。
至於餘下的50萬現金和一半儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。