執筆之時，美股全面下挫，道指跌900點，而早幾日破萬的納指，也回吐至9800點樓下，跌市的原因眾說紛紜，有說是疫情第二波再爆發，這個是否主因就好難證實，但青冰看到跌900點之時，在watchlist上卻仍然有6隻美股上升，分別是Neflix、Zoom、CrownStrike、Activision及Moderna，仲有隻中概股拼多多，而這些股都是在疫情初期，股價表現最佳的一堆股份，所以有理由相信，個市的確似因第二波而跌，不過又坦白講，美股近期升咗咁多，搵個藉口震倉及回吐，都好正常啫。

在最近兩星期的升市，最令投資者大惑不解的，應是疫情重災股大幅反彈，航空股、郵輪股及金融股等等，其實疫情暫時只係初步受控，但歐美兩地已經急不及待想重啟經濟活動，理由大家都明白的，實在有太多的企業頂唔順，雖然聯儲局無限QE救返個市，但經濟活動一日唔重開，QE的作用只會逐漸減退。好喇，大家飛機又未坐得，郵輪又未坐得，點解股價會反彈得咁犀利，市場再次提醒大家，股市都係向前炒嘅，至於有冇過份反映重啟經濟之利好，青冰答你唔到啊，實在沒有一條算式可以計到，反映咗60%?80%?還是120%。

平心而論，實體經濟係冇咁快可以回復元氣，聯儲局今星期在會後也講明，2022年底前不會加息，但經濟唔好股市狂升，就令更多人睇淡做淡，因為經濟同股市脫鈎了。青冰認為股市沒有完全跟經濟脫鈎，可能只是跟指數脫鈎啫，指數主要受幾大科網龍頭推動，他們強勢，指數也不會太弱，但只要你看跟實體經濟相關的股份，雖由谷底反彈不少，但仍然未有耐返家鄉。

無論在美股及港股市場，科網龍頭都係超強勢，疫情初期跌得快彈得更快，之後仲創埋新高，戰友可能會問，佢哋啲生意及盈利，係咪真係受惠疫情呢，又係咪受惠到咁多呢，答案當然不是，但現時全球水浸，息低錢又多，基金們總不能像末日博士咁，100%現金嘛，基金mandate並不容許，咁作為投資人，舊經濟實在買唔落手，唯有跟大圍去買好貴的新經濟股，所以貴股更貴，殘股更殘。

寫到呢度，已經由900點變咗接近1100點，究竟收市係見V彈，還是自三月以來再次熔斷呢，無論結果係點，都要留心看細節位，睇吓升咩股跌咩股，在港股時段更易部署。

--

Fb個人專頁 http://www.fb.com/chingbing888