華富財經 Quamnet.com Logo
青冰
2020-06-19 09:39:49
老散朋友抽新股趣聞

昨日青冰搭車時,聽見兩位女士有以下對話:「喂你抽唔抽得中呀?嘩你就好喇,抽一手都中,聽講要幾十手先會中一手呀。」「係呢,呢隻沽唔沽好,可唔可以長揸呢?」從言談中推算,大概都係講緊京東(9618)吧,公開發售部分超購179倍,申請人數有39萬,首日掛牌高開6%,最後收市微升3.5%。在這之前,網易(9999)都有37萬人認購,都係曇花一現,最高升過約一成,而上市前,有朋友問,隻網易升唔升到五成呢,青冰當堂嚇一跳,然後得啖笑。

新股市場多初哥,屬正常不過,大家都是趁熱鬧,覺得京東及網易比較熟識,應該比較穩陣,所以入張飛博吓啦。青冰的朋友,並不是初哥,但始終只當股票係一種玩意,不會下苦功去研究,所以才會有白痴一問。青冰當日係咁答佢的,網易本身在美國有預託上市,折合返港元係幾多,心中有數,唔係話港股這邊不能帶動預託上升,但幅度始終有限,如果真係會升五成,你估投資者會否搶先買入美股?美股作為一個有效率的市場,錯價較少,意思係那邊個價應該相當有指示性,偏差不會太大,再者,你有冇諗過佢哋已經因回歸而率先炒上,一來一回水位不多了。當然,如果日後有新股通,或者係第二上市股份能加入港股通,有北水因素後,升幅可能會有兩成嘅。

講開新股,青冰亦有另一位朋友,熱衷新股市場,近日抽中京東後,話自己已有不少99字頭的新股,細聽之下,發現大多是潛水後上水,但無甚表現,或者是深潛股,青冰反問他,你之前將升得唔錯,首日升兩、三成的股全部沽清,但卻將敗家的全部留低,這個是甚麼邏輯?朋友當然顧左右而言他,話難保當中有一隻成為日後的騰訊(0700)呀。

炒股方法有千百種,適合你的,不一定適合他,始終大家都有份工作,能花在股票上的心力亦大不同,但青冰總結多年的經驗,有一個硬道理是值得尊重,就是汰弱留強,贏錢急急腳走,輸錢就死坐爛坐,這個方法肯定不適合任何想在股市贏錢的人,克服心魔,將衰股手起刀落,撇掉散戶的陋習,久而久之,成績必會反映在回報上。

--

Fb個人專頁 http://www.fb.com/chingbing888